經典鬼鼠加價方法

經典鬼鼠加價方法

近期窮人恩物麥當勞推出好多優惠,經常買一送一,不過唔好以為好抵,其實麥記已經將22元餐加價至23元,已經連續兩年加價。

雖然成日話全球經濟放緩,原材料價格不斷跌,但唔知點解仍然好多商戶話食材不斷加價,所以無奈地要將開支轉嫁落消費者身上。

有啲商戶唔想加價影響競爭力,就係其他方面縮水,變相陰啲陰啲加價,過去幾年大家唔知有冇發覺食開的嘢不斷縮水?以下就係一啲典型例子。

茶樓點心

傳統蝦餃一籠四隻,但最近有人發現稻香集團(00573)旗下有酒樓的蝦餃已經改為三隻,並用一小棵西蘭花代替。雖然假錢不變,都係23元籠,但每隻蝦餃價錢就由5.75元急升至7.66元,變相加價33%。酒樓回應話每粒蝦餃都加咗少少份量,不過站在食客立場,食咗都唔係好覺囉。

杯麵

唔知大家有冇發現,食杯麵愈來愈唔飽,要食兩杯先夠?早前有市民就曾經向傳媒投訴,話發現好多杯麵包裝「得個樣」,個杯就大,但麵餅就只係得杯身的四成,實際是空氣多過麵。個別牌子仲墊高咗個底,造成好似滿啲感覺。雖然公司解釋係要令麵同湯有良好比例,之但係對唔少人黎講,食杯麵都係為充飢,唔飽就勢係假!

飲品零食

幾年前,飲品及零食已不斷陰啲陰啲減份量,好耐之前罐裝汽水就係355毫升,但之後可口可樂率先減到330毫升,其後不少公司跟隨。而雀巢就更青出於藍,罐裝減到315毫升,通常是1.25公升的大型樽裝飲品就減到1.2公升,500毫升的細支裝就減到480毫升。

零食都係,唔知大家有冇發現,食薯片幾塊就冇哂,一排香口膠由25粒變20粒,好多朱古力、餅乾等重量輕咗。

快餐/茶餐廳
近年唔少大型連鎖快餐店及茶餐廳,為減成本,不但飯菜份量少咗,加飲品的價錢仲愈來愈貴。以前通常係送熱飲,凍飲加1元,但依家,熱飲加5元,凍飲加7元的餐廳大把,有啲旺區餐廳仲索性唔做餐,飲品要原價散叫。為咗慳,唔通以後要帶水出街?

薄餅

幾年前有網友就發現,有專賣薄餅的餐廳,個批吋數縮水,由12吋變11吋,切的件數少咗,料又少左……係咪變相加價呢?講真,無理由每次叫外賣都拎把尺出嚟度下幾多吋架嘛,而網頁又冇提及每個批既呎吋,如果真係細咗都好難追究。