渣打瘠己肥人  盤數爛仍派錢做brand

渣打瘠己肥人 盤數爛仍派錢做brand

【好心分手啦渣打】
是否很驚訝,講不出說話,

沒錯我是說,Fing 錢的渣打,
蝕錢為何要死撐做sponsor ,
何解幾千萬不慳下,你知嗎?

一年一度渣打馬拉松下個星期日就舉行啦,今日開始參賽者已經可以攞號碼布,小編行過銅鑼灣都覺熱鬧。

不過話時話,乜渣打集團(02888)唔係好窮咩?近兩年盈利大幅倒退之餘,去年第三季除稅前盈利仲意外地見紅,搞到股價由200幾蚊跌到落50幾蚊,仲曾創歷史新低。所以渣打管理層舊年底話要展開救亡大計,又搞重組,仲話要裁員,英國渣打就宣布要裁15,000人,而香港渣打的股票衍生產品部亦「摺咗」。

小編都知在目前經濟放緩之下,好多公司、銀行都要節流,第一樣cut的「畢直」就係推廣開支,即係sponsor,這是常識吧﹗ 所以廣告行業係經濟不景氣時,通常都係首當其衝的行業。

贊助全球10個城市馬拉松

不過睇返渣打,咦咦~~~~ 贊助咗渣馬已經20年喎,仲要愈贊助愈多比賽,唔止香港,全球仲有台北、新加坡、印度孟買、肯雅奈羅比、吉隆坡、曼谷、杜拜、史坦雷及澤西九個城市有冠名贊助馬拉松比賽。

雖然渣打冇公開過贊助金額,而香港田總盤數又神神秘秘,話贊助金額係「商業秘密」,令大家無從得知。不過,如果參考其他馬拉松比賽贊助,或者可以推敲一二。

贊助過倫敦馬拉松的Virgin Money就公開講,五年贊助費約1,700萬英鎊(約2億港幣),除返開每年大約4,000萬港元。咁香港馬拉松級別又冇倫敦咁勁,倫敦假假地都係世界六大馬拉松之一,所以香港馬拉松照計就冇咁貴既。

不過,倫敦馬拉松只得大約40,000人參加,香港假假地都有70,000幾人喎,而且香港渣馬又啱啱得到國際田聯(IAAF)的金標賽事認證,八位數字應該走唔甩。小編睇網上資料,就有小道消息透露,香港渣馬冠名贊助費高達2,000萬元,唔知真唔真。

如果香港渣馬贊助費真係2,000萬元,當其他九個地區冇咁貴,平均1,000萬一個啦,十個馬拉松贊助費都已經要成億元。

傳利物浦贊助費達3.5億

唔止馬拉松喎,原來佢地今年決定繼續贊助英超球隊利物浦,再簽三年贊助合約,有傳新簽贊助費高達3,000萬英鎊(近3.5億港元),加價五成,除返開每年贊助大約1.2億元。渣打在2014年報曾指未來會加大對利物浦的贊助,藉以提升市場知名度,所以呢單傳聞都有啲可信。

渣打贊助利物浦加馬拉松,估計每年就要花接近2億元,雖然與2014年渣打總開支107億美元相比,呢筆錢唔算好多,但如果將呢筆錢繼續請前線員工,假設請一個做得嘢的前線員工平均要30,000月薪計,一年就可以多留大約555個員工幫渣打打併搵錢。唔知渣打股東及被裁的渣打員工,見到渣打咁洗錢法,會唔會酸漏漏呢?