破壞再建設  中國年花4,600億拆樓

破壞再建設 中國年花4,600億拆樓

尋日講過香港大白象,但原來偉大祖國大白象祖國仲多。你睇吓!金光閃閃嘅外表,呢座位於河南開封朱氏崗村嘅毛澤東坐像,再一次用自己嘅方式話畀世人知,有錢就是任性。

本來大家好快就可以睇到佢嘅完全體,一日最衰都係班熱愛毛主席嘅傳媒,經佢哋日以繼夜,夜以繼日嘅報導後,引來一眾內地廢青批評係大白象工程,最後仲勞煩到該縣監察大隊拆除,真係好可惜囉。


毛澤東像未起完已經要拆。(網上圖片)

話時話,大陸搞拆樓真係世界級。仲鬼馬地整埋啲「中國第一拆」、「中國第一爆」,個名夠威威之餘,真係拆都拆得開心啲。

從前內地人是很專一的,如果要佢哋為建築物落一個年期,會係一百年。根據《民用建築設計通則》,「重要建築和高層建築主體結構的耐久年限為100年,一般建築為50至100年。」

唉,正所謂,人會變,月會圓。睇返2014年中國建築(股評)科學研究院發布嘅《建築拆除管理政策研究》,報告指出「11.5」期間,內地共有46億平方米建築被拆除,其中20億平方米建築物起好未夠40年就被拆下,「12.5」期間,每年過早拆除建築面積將達到4.6億平方米,五年計落都有23億平方米。

有媒體粗略估計,如果按照每平方米拆除費用1,000元人民幣計算,「12.5」期間每年建築過早拆除,涉及的拆除費高達4,600億元人民幣,五年就有23,000億元人民幣,係金融海嘯後「四萬億」救市資金的57.5%。

嘩﹗ 花40,000億搞建設,再花23,000億拆樓,全因為政府唔想人民住危樓,唔想執爛尾樓,更加唔想舊嘢阻住搵錢,呀唔係,係發展呀!為人民服務呀!


「水岸銀座」係幾靚嘅,睇相。(圖片來源﹕網上圖片)

中國第一拆

早前,天津樓盤「水岸銀座」就因為爛尾而停工。「水岸銀座」於2011年底開盤時,曾連奪當地銷售冠軍,開發商就係當時紅到發紫嘅江蘇省委原秘書長個仔趙晉。

「水岸銀座」分三棟,分別高41層、58層同65層,今年停工時,已經賣咗70%。不過家陣真係送畀你都唔好住喇。

自從打貪之後,有不少高官中晒槍,就連趙晉爸爸都被立案偵查。Daddy唔見咗,就自然錢都冇埋,再加上已建成部分擅自更改規劃、偷用面積、仲存在嚴重安全問題,同危樓冇分別。

內地政府一向都好著重國民人生安全,有危樓就一定要拆!內地人民亦對呢單工程非常重視,更賜佢名為「中國第一拆」,娛人娛己得嚟,最重要係個名夠威。

但面對呢三座尚未完工但超高建築(分別約為137米、188米同208米),天津政府就話:「天津乃至全國都沒有拆除200米以上超高層建築的經驗,可以說拆除難度非常大」,發言人仲話連最終拆除費用目前都估唔到。睇嚟呢單拆爛尾樓都好有機會爛尾。


你以為雲海呀?塵嚟㗎!(圖片來源﹕網上圖片)

中國第一爆

上年年尾,西安亦上演一場「目前國內城市爆破拆除中最高的樓房」Live Show。西安市高新區嘅環球西安中心一期,樓高26層,高118米,1996年起建,1999年封頂,曾是金花藥廠辦公大樓,可惜荒廢多年,拆卸後將重建為商業綜合體。

為紀念今次爆破行動,大家更將佢命名為「中國第一爆」。有市民專程拍照留念,亦有市民趕收工都要嚟見佢最後一面,睇嚟每次爆破都可以係商機。

據內地傳媒報道,總建築面積37,290平方米嘅環球西安中心爆破時,樓內安裝咗1.4噸炸藥同1.2萬枚雷管,大樓在10秒中內頃刻倒塌。爆破後騰起的粉塵擴散了一個街區,建築垃圾20多米高,堆了兩三個足球場大的地方。總之就用咗好勁好勁好勁(好重要)嘅炸藥,仲有好多垃圾。

根據《建築拆除管理政策研究》報告統計,瘋狂又拆又建下,中國每年過早拆除建築,將增加建築垃圾約4億噸,約佔中國年產垃圾總量40%,同時中國每年增加約10%碳排放量。

小編明白政府都係想振興經濟先曲線搞破壞,有破壞先有建設嘛,但為人民好時,都要諗吓地球伯伯㗎嘛。

說好的冬天呢?