少於3000元入場費的利是股

少於3000元入場費的利是股

今日係大年初一,小編當然要同大家講聲恭喜發財,買股票一買即升。

其實呢幾日,相信未結婚的朋友,最興奮的就係四出逗利是。根據小編非正式的統計,通常大家的利是錢都係由1,000至3,000元不等。除非係富二代,否則都好難走出呢個框框。

正如黃子華所講,投資愈早愈好,媽咪幫BB仔開始投資,利疊利,一畢業就可以退休啦(唔知的話,可以重溫返早兩日的經濟一週facebook黃子華楝篤笑)。

或者你會話,3,000元可以買得乜呀?小編今次就幫大家搵幾隻入場費又低,質素又有返咁上下既股份等大家參考下,唔單止利是錢買得,如果想月供股票又唔想搵銀行或證券行每月畀手續費的投資者,都可以每月一手咁儲,尤其是依家跌市,可以做到平均成本法,第日一個大牛市就乜都賺哂。

唔講咁多,即刻睇股﹗ (以下入場費按2月5日收市價計算)

新意網(08008)

一手入場費:2,380元

投資風險指數:低

依家經濟衰退,但有一個行業前景就仍然向好,就係互聯網。因為就算經濟點差都好,都好似唔見有人話少左上網,反而多咗企業話關閉實體店,專攻網上業務。

所以,好似新意網呢類主攻互聯網數據中心的股份,可以預見未來收入仍會穩定增長,有強勁的現金流,而此股過往派息紀錄都唔差,現水平有逾5厘息率,可以說是一隻不俗的防守性股份。

現時很多公用股,入場費都要萬萬聲,呢隻係互聯網界的公用股,唔洗3,000元就可以買到,絕對諗得過。

特步國際(01368) / 361度(01361)

一手入場費:1,695元/2,450元

投資風險指數: 低至中

體育用品股經過了漫長的去庫存期後,行業已逐漸走出谷底,去年訂貨會表現開始回升,所以一眾體育用品股股價在去年跌市時,股價都十分硬淨,龍頭安踏體育(02020)仲係年底創過上市新高。

不過安踏入場費唔平,想平平地買到內地體育用品股,其實可以考慮特步及361度,呢兩隻雖然是二線品牌,但銷售網絡同樣覆蓋全國,尤其是特步近年又不斷贊助馬拉松賽事,內地知名度愈來愈高。今年又舉行歐洲國家盃及奧運,體育用品股下半年隨時重拾升勢,買定唔怕。

合景泰富(01813)

一手入場費:2,485元

投資風險指數: 中

內地雖然經濟有重重隱憂,但卻造就內房政策不斷鬆綁,所以內房股跌幅亦相對較小。很多股份如資源股、中國人壽(02628)都已跌至海嘯價,但像龍頭中國海外(00688)及華潤置地(01109)較海嘯低位仍有一定距離。

不過,呢兩隻龍頭都係入場費唔少,其實市場有好多有實力的二、三線內房可以選擇,合景泰富就係其中一隻。合景泰富重點發展一、二線城市,包括北京、上海、廣州、蘇州等,這些地區受庫存影響較少。而內地正值減息週期,對高負債的內房亦有利。

合景泰富股價最近跌至5元水平,其實金融海嘯後股價都算平穩,現價息率亦超過8厘,就算股價唔升,每年收息都算唔錯。

南方A50(02822)

一手入場費:2,044元
投資風險指數: 低至中

A股雖然跌到怕,但換個角度看,A股都已經跌了那麼多,若然還原基本步,上海證券綜合指數返回2,000點水平,都是再跌700點左右,再大跌的空間不多。

而且內地經濟雖然放緩,但都增長都仲超過6%,加上中央又積極托市,「水」一定繼續放,若然再加上「深港通」失驚無神開通,A股回勇,咁追蹤A股升跌的南方A50 ETF都會有得升。

而且南方A50是實物ETF,長揸冇有怕,但大前提係,你一定要相信阿爺可以救到經濟,如果你係信索羅斯的「硬著陸」說法,建議都係唔好買啦。

中國信達(01359)

一手入場費:2,340元
投資風險指數: 中至高

最近A股咁差,就係驚內地壞帳出現。不過,信達業務就正正專收壞賬,經過一輪重組後再賣出資產。內地經濟增長放緩,反而造就信達可以用更低價收壞賬。

其實信達是內地四大資產管理公司之一,背景夠雄厚,睇返集團去年上半年的業績,純利都有47.7%增長,表現亦唔差。去年底又宣布買下中銀香港(02388)旗下的南洋商業銀行業務,同時進軍港銀,前景並非完全暗淡。

近期信達股價不斷創上市新低,或者反而是入市機會。

中國再保險(01508)

一手入場費:1,820元

投資風險指數: 中

呢隻係內地最大的再保險公司,而再保險係外國已經非常成熟,內地相對仍有龐大發展空間。因為內地保險業發展迅速,保險公司要分散風險,便需要將保單「再保險」,可以說,近乎有保險公司的一日,就需要有再保險公司。

再保險的風險就是遇上如天津大爆炸等重大災難事故,始有機會蝕錢,但發生這些級別災難的次數並不多見。

近期中國再保險股價連番下跌,或多或少與A股有關,因為這些保險股都有投資收益。然而,當股市回暖,保險股通常會跑贏大市,而中國再保險為行業龍頭,自然更多捧場客。入場費如此低,投資者大可分多注入市,慢慢儲貨靜待股價回升。

國美電器(00493)

一手入場費:1,120元
投資風險指數: 高

國美自從大股東黃光裕入獄後,股價一落千仗。不過黃光裕入獄期間,其實國美已不斷轉型,積極發展電商業務,最近股東會又高票數通過收購黃光裕旗下非上市零售門市資產,零售門店將增逾1,800間,市佔率由5%升至8%,在行內算係數一數二的家電巨無霸。

不過論估值,國美就真係超殘,市盈率只係11倍,而收購後全面攤薄所得的市帳率都係1.3倍左右,同蘇寧及京東過百倍100市盈率、分別超過2倍及6倍市帳率相比,國美堅係抵買。

保利協鑫能源(03800)

一手入場費:1,010元
投資風險指數: 高

1,000元多少少就可以買到中國光伏行業龍頭?! 珍珠都無咁真呀!保利協鑫雖然股價勁CHOK,不過內地時不時都炒清潔能源行業,無辦法,鬼叫內地咁多霧霾,污染咁勁。

所以每年3月的「兩會」、10月的「N中全會」,都會例炒環保股,保協都有機會炒返轉,升起上來仲好鬼勁。依家保協股價貼近歷史低位,自問唔怕CHOK,想博一個大升浪的話,有膽可以試買呢隻。

僅過3,000元的股份 港燈-SS(02638)

一手入場費:3,145元
投資風險指數: 低

其實如果大家利是錢多少少,又或者手頭鬆少少,可以買3,000元以上的股份,不妨考慮港燈,有5.79厘息率。目前中電控股(00002)一手入場費過30,000元,中華煤氣(00003)都要13,780元,港燈入場費真係好低。

睇返港燈上市以來,股價走勢都係呈升勢,未來股市動盪,公用股會成為避風港,股價隨時再向上,到時真係「有升有息」。