返工都係為咗賺錢 想最快加人工嘅方法

返工都係為咗賺錢 想最快加人工嘅方法

每年三月,都係一年一度加薪嘅大好日子。

上司首先會評估員工一整年嘅工作表現,再配合公司業績,最後決定你到底加幾多人工。但老老實實吖,就算你做到曉飛,如果公司賺得錢少,唔通都會加你咩?

所以,當你被評估嘅時候,上司或老闆就一定會諗一大堆藉口,說服你無得加人工,或者加得雞碎咁多。

而今年上司就同我講咗以下呢番說話。

「嗱即係咁,我知你好勤力,做嘢亦都好搏命,但你知啦~今年公司生意真係好差好差。」

「但…呢幾個月做到隻狗咁,每晚都八、九點先走。」

「就係呢幾個月忙少少,先補返條數咋!!」

「咁我表現…」

「你表現係好嘅!又無做錯嘢!但係你無咩突出表現,老闆睇唔到呢,我已經幫你同老闆講盡好說話,最後先幫你爭取到加人工咋!」

「咁請問加幾多?」

「加二百蚊!」

「吓…哦…」

正當我黯然地離開上司房,佢突然叫住我。

「喂,你記住唔好同其他同事講啊…」

「講…講咩?」

「唔係個個員工有得加薪嫁,你算好彩啦!」

上司總係會加你少少人工之餘,仲想你心存感恩繼續為佢賣命。唔加人工俾你有好多藉口,加人工嘅原因只係因為唔想你走。如果你乖乖哋毫無怨做嘢呢?老闆只會當你係狗。

成日話員工先係公司最珍貴嘅資源,但呢句說話,就好似一堆奴隸自我安慰,同自己講「我係重要嘅!」一樣。

站喺老闆角度,開公司一心想賺錢,就只會珍惜啲錢點用。員工只係一班幫佢賺錢嘅工具,咁搞法工具驚唔驚一炮過走晒?

你知道的,只要老闆加某幾位同事人工,你嘅革命只會係玩命。因為站返喺員工角色,返工都係為咗賺錢…

事後我知道某位同事打算辭職,公司為咗留佢,加咗千幾蚊人工…

呢一刻,我先知道自己比其他人輸蝕嘅唔係工作表現,而係一封辭職信。

藍橘子為80後網絡作家,憑【我是技安,我出席了大雄的葬禮】網絡創作爆紅。

facebook專頁:https://www.facebook.com/BlueGodZi/