【曲線要講明】邊個先係山寨貨?  國產貨版權勝訴案逐個數

【曲線要講明】邊個先係山寨貨? 國產貨版權勝訴案逐個數

中國作為科技大國,任何複製技術都難佢唔到,所有類型的產品都可以用自己的方法轉化成大陸獨有的產品。根據一個中國的原則,絕對唔容許其他外國勢力抄襲國產佳品囉。

New Barlun唔係山寨

所有嘢去到中國都有新發展,新演繹,最近一單版權案又教大家呢個中國式新道理。

美國運動品牌「New Balance」被中國運動用品公司廷飛龍體育的「New Barlun」指控,稱「N字商標」侵犯其版權,要求賠償9,800萬元人民幣(摺合約1.2億港元)。

結果在4月中廣州市中級人民法院作出判決,判定侵權成立,New Balance需要繳付賠償。據指,案件成為廣州中院,歷來侵權判罰最高的案件。

(來源︰網路圖片)

根據上圖顯示,左邊係「New Balance」,右邊係「New Barlun」。好明顯,就係「New Balance」坐時光機去到新中國抄「New Barlun」喇。不論個樣、個「N」、個牌,根本就係失散多年的兄弟。所以話,罰「New Balance」賠錢已經好大量。如果「New Barlun」再方仗少少,告到你美國總公司執都得呀!

ICON分靈體
咁開心唔好畀佢停,繼「New Barlun」之後,廷飛龍體育再下一成,日前為旗下新品牌「Uncle Martian」(安可瑪汀)舉行發佈會。


(來源﹕網路圖片)

一出場,大家都有種似曾相識的感覺,因為同近年爆紅的美國運動品牌Under Armour(安德瑪)幾乎一模一樣。右邊係國產「Uncle Martian」,左邊係Under Armour。字體,似!圖案,似!隻色,似!好心佢差塊葉就抄埋佢喇,係咪唔想要飯盒呀!雖然「Uncle Martian」暫時未指控或被指控侵犯版權,但相信呢單官司未來極有可能出現。

給我一個IPHONE袋

IPHONE係蘋果公司產品?錯。今年4月30日,北京巿高級人民法院終審認定美國蘋果公司在「IPHONE」商標異議複審行政糾紛一案中敗訴。

新通天地科(北京)有限公司獲得「IPHONE」第18類商標權歸屬,即仿皮、牛皮、錢包、小皮夾、皮製繩索等商品。

雖然蘋果公司話,「IPHONE」商標在第9類移動電話機商品上已經取得極高的知名度,應被認定為馳名商標。但中國的法律就是世界的真理,判決已經生效,即係話「IPHONE」呢幾隻字唔再係蘋果公司獨有。


(來源﹕網路圖片)

好好珍惜你手上的IPHONE手機,因為不久的將來,IPHONE再唔係指手機,而可以係IPHONE袋、IPHONE銀包、IPHONE手繩。第時女神BB叫你送IPHONE畀佢,記得問清楚係手機定係袋。不過紙紮界的朋友就睇住喇,一陣你整咗個IPHONE銀包-紙紮版,又被人告侵權就唔好喇。你叫個郵差送封律師信去邊好呀。

Call Me Michael喬丹

要數中國「維護版權」的先鋒,點可以唔提喬丹體育。話說早幾年,喬丹體育準備上市,點知「籃球之神」Michael Jordan突然提出起訴,話喬丹侵權,令喬丹上市大計被逼擱置。


(來源﹕網路圖片)

正所謂「君子報仇,為時已晚」,喬丹一個轉身就向Jordan提出訴訟。要求Michael Jordan停止侵害喬丹體育名譽權的行為,澄清事實,賠禮道歉,恢復喬丹體育名譽。最重要最重要最重要係,賠償經濟損失800萬美元(6,211萬港元)。

喬丹體育話,中文「喬丹」不等同Jordan,純為翻譯名稱;加上Jordan並非中國公民,也沒在內地長期居住,實在是關佢咩事。件案由2012年搞到依家都未判,最近仲又重新審理Michael Jordan提出的新控訴,大家可以食住花生等睇戲。

以上呢幾個故事都係教訓我們,內地在「維護版權」上真係不遺餘力。所以,所有主動,或被主動進入內地市場的品牌們,除咗祝福你們,小編都冇嘢可以做。

你可能有興趣的文章:
【香港另類搵食「工」略 劏豬、餵雞、水手、通渠有前途?】
http://www.edigest.hk/Vip/detail?id=2666
【新三板奇葩 要幾騎呢有幾騎呢】
http://www.edigest.hk/Vip/detail?id=2136
【破壞再建設 中國年花4,600億拆樓】
http://www.edigest.hk/Vip/detail?id=1922

相關文章