拖糧拖數 超時工作無補水 6大最易被搵笨行業 你有冇份?|職場制勝

拖糧拖數 超時工作無補水 6大最易被搵笨行業 你有冇份?|職場制勝

職場制勝】社交網站、討論區等不時都看到化妝師、攝影師等自由工作者出文,指被客人拒絕繳付尾數及超時工作費用,引起網民討論。其實最易被搵笨行業,又點只化妝師,好似早年有單Hit爆的「港媽向攝影師搲Sponsor」事件,請一個Freelance攝影師到一個Party,幫45個家庭影相,酬勞就係幫佢like同share作品。嘩!真係多謝晒!
撰文:Smart ED編輯部  | 圖片:unsplash

「好易啫!幫幫手啦!」

問心講,香港唔少人鍾意貪小便宜,呢啲人本身唔係冇錢,但下下都要攞著數。

自問面皮唔夠厚,真係好難做出呢啲要求。

其實有幾個行業,成日都畀人搵著數,一知你做呢啲職業,就扮哂老友話:「幫幫手啦,唔係唔畀面掛?」

推又推唔到,做又得雞碎咁多錢、甚至冇錢收,所以最好方法就係避開唔好做呢啲職業。

究竟邊啲行業最易被搵老襯呢?求其都數到以下6個:

職場制勝 聰明人 蠢人 領導 阿里巴巴集團 馬雲 成功哲學
圖片:unsplash

6大最易被搵笨行業

攝影師

呢個行業真係十分高危,單睇樓上的例子都知啦。

更多時候係,好多人結婚,都係拍下膊頭,叫朋友幫手影緍妙相。

最後係咁易封番一百幾十蚊利是作報酬,但就搞足你成日,呢啲老友真係要認清楚啦。

行業, 工作, 職場制勝, 化妝師, 攝影師, 司機
圖片:unsplash

老老實實,攝影師唔係淨係按個快門就搞掂;先唔講技術,攝影器材全部私伙,又鬼死咁重,出去外影孭住係身,好多時都搞到腰骨痛。

仲有執相嘅時間同心力呢?攝影師絕對唔係個輕鬆嘅行業。

影VIDEO的攝影師,仲要講求SENSE,剪片要的時間更多,收你個幾千蚊真係唔係白收。

行業, 工作, 職場制勝, 化妝師, 攝影師, 司機
圖片:unsplash

I.T人

作為I.T人,最怕比親戚知你識電腦,大至砌機、寫Program,小至買電腦、安裝寬頻等等。

因為當佢部電腦一有少少問題,就會即刻搵你幫佢修理。

無論係上唔到網、中咗毒、Run得慢定係條線鬆左,全部都關你事。

行業, 工作, 職場制勝, 化妝師, 攝影師, 司機
圖片:unsplash

你唔好以為唔聽佢哋電話就得,因為佢哋轉個頭就會whatsapp send張圖俾你,話你知有乜問題。

已讀不回?哈,藍剔後10分鐘你就會收到你阿媽電話,問你做乜唔應阿姨媽,再加多句「親戚一場放工得閒咪去幫下手囉,我會留飯比你架喇!」

收工冇嘢做就要幫你整機?仲要整完一句唔該都冇,加多句:「你整得咁慢,咁唔Pro架!」

除左爆粗之外,實在比唔到其他任何反應……

行業, 工作, 職場制勝, 化妝師, 攝影師, 司機
圖片:unsplash

人哋外面整機佬上門檢查發現冇乜問題都收你幾舊啦,更何況I.T人唔係整機佬。

你識寫網頁就仲大鑊,得閒就會有朋友懶Friend咁,問你可唔可以幫佢哋手平平哋整個公司網頁。

簡單整當然冇問題,不過做落就多多意見,又話張圖唔夠靚,仲話要加購物車等等特別Function。

最後計完,朋友價八折左都要幾萬元,但最後有人夠膽講,佢「畢直」其實預兩、三千元,當堂O咀。

行業, 工作, 職場制勝, 化妝師, 攝影師, 司機
圖片:unsplash

化妝師

化妝師同攝影師一樣咁高危,而且一樣係親戚結婚最易出事。

首先話呢啲喜事,一世人一次叫你「收順啲」,跟手多多要求。

要你半夜三更到達新娘屋企唔在講,仲要一日換五、六個妝,唔難嘅妝都唔叫你化。

但化妝品又唔自己出,話自己個啲唔啱化新娘妝,最後仲要加多句畀個機會你練習下咋。真係正式使人唔使本呀!

行業, 工作, 職場制勝, 化妝師, 攝影師, 司機
圖片:unsplash

空姐

大家講起空姐,可能只會諗起佢哋可以周圍飛周圍玩好開心,但其實有苦自己知。

若歐元、日圓、澳紙等外幣果期下跌,突然就好多三姑六婆、唔熟的朋友會打電話,叫你幫個手買名牌袋、化妝品、生果、蜜糖、乜乜物物,應有盡有。

空姐喺飛機企咗成十幾個鐘,已經攰到爆,想返酒店休息下都唔得,仲要幫人做埋代購走水貨。

行業, 工作, 職場制勝, 化妝師, 攝影師, 司機
圖片:unsplash

回程時仲要一抽二抽,搬啲唔係屬於自己嘅嘢返屋企,如果太攰截的士,真係連的士錢都蝕埋呀。

最慘仲係返到屋企要逐個打電話,三催四請問佢哋幾時要返啲物品,有時仲要送貨上門畀佢哋,最後只係換來一句唔該。

淘寶用順豐速遞由深圳黎香港都要加幾廿蚊啦,依家老遠由歐洲、日本、澳洲運嘢返來,但就連餐飯仔都冇,都咪話唔陰公。

行業, 工作, 職場制勝, 化妝師, 攝影師, 司機
圖片:unsplash

司機(的士/小巴/貨VAN)

如果你做司機,最怕啲住附近嘅親戚。平日返工放工會Whatsapp問你開工未,會唔會有時間「順路」兜一兜佢返工放工。

而「順路」嘅範圍又好闊,只要唔過海就係順路。

有時Shopping買嘢買多左,又會問你有冇時間車佢返屋企。當然啦,到埗之後,又要你幫手擔擔抬抬,搬啲嘢返屋企。

行業, 工作, 職場制勝, 化妝師, 攝影師, 司機
圖片:unsplash

聽過最過分嘅係叫個揸小巴嘅親戚,車成家人去沙灘BBQ,而一家人係包埋狗仔!

其實香港做司機真係好慘,養架車連油錢、停車場都好貴,尤其是貨VAN司機。

睇GO GO VAN的收費,由官塘入元朗都係150蚊左右,扣埋油錢真係唔賺得幾多,仲要得閒兜埋你啲親戚朋友,搵返來的錢隨時白做。

行業, 工作, 職場制勝, 化妝師, 攝影師, 司機
圖片:unsplash

Sales

Sales同空姐都有同樣的煩惱,有個朋友係某C字頭賣袋嘅名牌店做Sales,佢就試過呻每年一到清倉減價,啲三姑六婆就會叫佢買袋,用盡佢個員工quota。

仲要唔會去鋪頭拎,係都要揀啲佢哋自己方便嘅時間叫你做埋阿四拎俾佢。

最嬲嘅喺佢哋啲袋唔係全部自用,有幾個係幫朋友買,真係一打膠唔使找。

行業, 工作, 職場制勝, 化妝師, 攝影師, 司機
圖片:unsplash