【診所職場事|寶豬趣聞】無聊的女士|珍寶豬

【診所職場事|寶豬趣聞】無聊的女士|珍寶豬

電話響起~
我:「你好,乜乜診所」

對方係一位女士,佢大聲嗌:「你啲藥跌晒啦!」
我自然反應下即刻轉身望望藥房方向,冇呀,啲藥好安穩呀。
我:「我啲藥?冇跌呀」

撰文:珍寶豬funnyclinic)|圖片:電視截圖

女士打嚟投訴啲藥跌咗出嚟

佢:「跌晒啦,你點做嘢?個袋開到嘅?你裝藥啲袋開到喎!」…藥袋開唔到封死咗個口嘅話,你點拎嚟食呀?定係你平時食藥係有自己一套獨特嘅方法呀?隔袋舐吓就得啦嘛?定用念力食藥呀?
我:「我哋啲藥袋好似保鮮袋咁,每次開都要壓返好個袋口封返佢…你如果跌咗幾粒嘅話,你嚟診所啦,我俾返你呀。」
佢:「我執返嚟食啦!」

你又幾惜食喎。
我:「下次跌咗落地就唔好執返嚟食啦,數量唔多嘅我哋都可以俾返你~咁我有啲咩可以幫到小姐你呀?」
佢:「冇喎!你有啲咩可以幫到我啫?我有咩要你幫我呀?」
咁我可以收線未呀?我診所電話唔係嚟俾你撩交嗌,發洩熱線每六秒六毫呀~
我:「咁即係冇其他問題啦嘛?如果冇嘅,我收線啦」
佢:「喂喂喂?我未講完呀!」
我:「嗯?仲有咩事呢小姐?」
佢:「你啲藥袋點解咁易開到吓?咁易開到好危險嘛!」
你喜歡嘅咪自己加把鎖落啲袋度囉~我話之你封到佢變石棺呀。
我:「啲藥係俾人食嘛,啲袋梗係要俾人開到啦,個ZIP位拉一拉壓一壓就會封實啦」