怒刪7000萬粉絲IG帳戶  Justin Bieber隨時唔見幾千萬

怒刪7000萬粉絲IG帳戶 Justin Bieber隨時唔見幾千萬

加拿大小天王 Justin Bieber 同前度 Selena Gomez 喺社交平台 Instagram(下稱IG)上嘅罵戰似乎沒完沒了,JB上週二仲把心一橫,刪除自己有近7,770萬粉絲嘅 IG 帳戶。計一計,嘩即係差唔多10個香港嘅人口!

撰文:JOEY

事緣就係 JB無啦啦係咁 post佢同新女友 Sofia Richie嘅相,令到一眾粉絲好心碎又好不滿,結果 JB發火話佢啲粉絲應該戥佢高興,再而引發舊女友Selena Gomez同佢嘅鬧戰… 總之,之後 JB就刪咗自己個 IG帳戶。娛樂性就夠哂豐富嘞喇,但你哋又知唔知,JB咁樣刪一刪,可能已經刪走咗過千萬。

心水清嘅你應該知道名人嘅 IG其實唔係用嚟同你互動咁簡單,更大嘅用處係保持自己嘅曝光率同埋令佢哋有更多唔同媒體上嘅「錢途」,但到底 IG可以為班名人,甚至係寂寂無名嘅你,帶來幾大「錢途」?


圖片來源:英國《每日郵報》

根據英國《每日郵報》喺 2015年尾做嘅統計,發現原來你只要喺 IG擁有超過 1,000個粉絲,Instagrammers就可以開始吸納廣告客戶喺佢哋嘅 IG帳戶落植入式廣告,每個 post可以要價由40英鎊(即港幣約409元)起,而且會因應 Instagrammers落唔落「 sp」定係「ad」做hashtags而調整收費。

如果一個 Instagrammers嘅 IG粉絲人數超過 17,000,假設佢穩定地每星期出兩個商業 IG posts,佢一年喺 IG嘅年收入已經等於英國國民年收入嘅平均水平。如果個 Instagrammers 有超過 100,000個粉絲,仲可以叫價1,500至2,000鎊(即港幣約15,330至20,440元)不等,齋靠出 IG posts年收入已經過百萬!

不過人哋 JB話哂都係小天王,當然就唔同 Instagrammers嘅計法,要小天王出一個商業 IG post分分鐘比最紅嘅 Instagrammers仲要翻數倍不等,咁到底 JB今鋪扭一扭計到底燒咗幾多錢?


圖片來源:Statista

根據 Statista網站所做的2016年1月 IG 粉絲人數統計,JB 嘅 IG 帳戶喺全球最多粉絲人數榜上排名第7位,同佢差唔多啲有排名第8位嘅美國名媛 Kylie Jenner,約有6,504萬名粉絲。不過喺 JB刪 IG之前,而後者嘅粉絲人數已經更新至約 7,230萬名,所以我哋不妨參考吓 Jenner喺 IG嘅收入嚟估計 JB損失咗幾多。

年初時就有美國媒體報道過,要粉絲人數少過 JB差唔多 500萬嘅 Jenner出一個商業 IG post,價格由 100,000美元至 300,000美元(即港幣約78萬至233萬元)不等,如果取個中位數,即係要 200,000美元(即港幣約155萬元)。再假設,JB平均一個禮拜會出兩個商業 IG posts,即係話 JB刪咗 IG嘅呢幾日起碼已經有400,000萬(即港幣約310萬元)見財化水,仲未計可能引致嘅違約損失。

睇埋 JB 2016年頭嘅淨值(Net worth)係 2億美元(即港幣約15.5億元),預期年尾時仲會達到 2.5億美元(即港幣約1.94億元)水平,平均年收入由5,000至7,000萬美元(即港幣約3.88億至5.43億元)不等。如果 JB呢鋪任性要玩到年尾,按以上假設一星期兩商業 IG posts嚟計,佢刪咗個 IG就等於睇住 680萬美元(即港幣約5272萬元)流走咗,呢筆錢夠喺西半山買個建築面積 2,635呎嘅豪宅單位…

男友為咗佢犠牲咁多,各位女士你哋又羨唔羨慕 Richie呢?