港鐵附例千奇百趣       講粗口罰款高達$5,000

港鐵附例千奇百趣 講粗口罰款高達$5,000

好多外國遊客嚟到香港都會,大讚我哋嘅交通網絡好方便,不過之前就有一篇關於一個外國blogger眼中香港嘅網誌爆紅,其中一點係覺得港鐵範圍不准飲食呢條規則好奇怪。唏!其實大部分港人都習慣呢條規則架喇,不過原來港鐵附例上仲有好多你估唔到嘅罰則,等小編同大家細數一吓!

撰文:JOEY

9. 不當進入或離開列車(罰款$2,000)

(1) 任何人不得在列車車門開始關閉後進入或離開列車,亦不得企圖在列車車門開始關閉後進入或離開列車。
(2) 任何人不得干擾鐵路處所內的任何門或閘,包括任何列車車門及月台幕門。」

「聽到嘟嘟聲,停低你至精」,可能大家都知「嘟嘟嘟」時(車門就關嘅時候)衝門係犯法,不過就唔係好多人知原來嘟緊嗰陣其實連落車都係犯法!如果你聽到嘟嘟聲仲飛人保特上身咁照上落車,係一樣有機會被港鐵職員票控你違反港鐵附例。

22. 不得將腳放在座位上(罰款$2,000)

任何人不得將腳放在鐵路處所內任何部分的任何座位上。

「縮腳!巴士唔晾得腳!呢度都係!」原來唔止巴士,港鐵都一樣唔晾得腳!畀人捉到可以同衝門一樣被罰款。相信有少許嘅成年人都唔會咁做,但帶住小朋友嘅成年人就要留意吓,唔好由得啲小朋友踩上張櫈度喇!

28C. 經由不恰當途徑進出以及排隊(罰款$2,000)

(3) 港鐵公司為規管鐵路處所內或其附近所提供的服務或設施的使用,可要求乘客在鐵路處所內排隊。
(4) 希望使用第(3)款所描述的該等服務或設施的人,須在港鐵公司的職員或人員發出通知或要求下,在依據第 (3)款形成的其中一條列隊後排隊,並以有秩序和有規則的方式向前移動,及服從負責規管排隊的港鐵公司的職員或人員所發出的合理指引。

如果大家去過主題樂園,應該都見慣有人唔排隊,而嗰度啲工作人員無哂符嘅情景。唔講唔知,原來法例係有下放權力畀港鐵職員去票控唔排隊嘅乘客,方便佢哋維持秩序,違規者可以被罰$2,000,只係會乖乖排隊嘅我哋一直都唔知。

28G. 衣着不恰當(罰款$5,000)

任何人如其衣着或衣物可能會弄污或損毀鐵路處所之內或之上任何其他人的衣着或衣物或個人財物,則除非獲得人員行使其絕對酌情決定權給予准許,否則不得進入或企圖進入列車或鐵路處所。

驟眼睇以為港鐵係有訂明乘客嘅Dress Code,嚇得一向頹Look嘅小編以為自己成日犯法。原來唔係唔同場合著唔同衫嗰種,而係講緊著嘅衫唔可以具攻擊性或者整污糟啲地方,但係罰款$5,000好似又太誇張喎。

28H. 粗言穢語(罰款$5,000)

港鐵唔畀講粗口就一直流傳咗好多年,但事實上有無人真係因為講粗口而被票控就不得而知。在此提醒閣下,小心禍從口出,被罰洋洋$5,000血汗金。

28F. 神智不清(罰款$5,000)

任何人如因飲用或服用或濫用酒精、藥物或藥品而致神智不清,或處於人員按其絕對酌情決定權認為不合適的狀況,該人即不得進入或留在或企圖進入或留在鐵路處所。

原來神智不清係唔可以進入港鐵範圍,令小編好疑惑,咁飲咗酒唔揸得車、巴士又唔經屋企附近、而又無錢搭的士,點算好呢?小編無食藥、亦無飲酒,不過日日朝早返工都神智不清,老細唔該等等我神智清晰啲,先搭港鐵返工… 費事被罰錢…



唔講都唔知,港鐵咁多規矩都喺附例上列得清清楚楚!但又好似無咩見到執行過,原來大部分乘客都咁純品、有禮貌、唔講粗口,又時刻頭腦清醒,真係好叻叻呀!

延伸閱讀:
【港鐵4大筍工 時薪高達$70】
http://www.edigest.hk/Vip/detail?id=4278
【觀塘延綫通車前睇睇 4 大Q&A】
http://www.edigest.hk/Vip/detail?id=4259

相關文章