轉工7個大忌 唔想墮入搵工輪迴要識諗|張慧敏Son姐

轉工7個大忌 唔想墮入搵工輪迴要識諗|張慧敏Son姐

人望高處,良禽擇木而棲,東家唔打打西家,是最平常最正常不過的事。不過,轉工轉到馬不停蹄好似走馬燈的,越轉越出色的大家可曾見過?

撰文:張慧敏(Son姐)|圖片:unsplash

打工仔注意 搵工七不得!

我縱橫江湖職場幾十年,不停左轉右轉轉出個好未來的,我就從未見過。

今時今日,想搵份筍工,先要搞清楚,自己想要的筍工,究竟是一份甚麼樣的工。想搵工幾時都得,但行動之前,最重要的是先做足準備,才能避免重蹈覆轍,不斷墮入搵工跳槽的輪迴。2020年即將開始,送大家『搵工七不得』錦囊:

『拖不得』

其實份工食不適合自己,繼續做落去會不會有前途,公司、老闆、上司、同事,是否自己的那杯茶,心中一定有數。勢色不對,應該早作安排為自己搵出路,而不是柏圖一下子的安穩,忍無可忍重新再忍,把自己的鬥志甚至磨滅到一乾二淨,再冇價值,被辭職之時,才迫於無奈去搵工。

『急不得』

做人做事做決定幾時都見EQ最重要。要走要留不是問題,但節奏時間應該掌握在自己手中,幾時走點樣走對自己最有利,自己話事。而不是因為意氣之爭發老脾,口舌之爭逞匹夫之勇,求其是但搵份工盡快走,魯莽的行動,倉猝的決定,結果只能是錯的。

『多不得』

有殺錯無放過漁翁撒網式地搵工,求其是但搵到的,我說是份好工你信不信?認真地做的事才會得到認真的對待,由開始搵工寫求職信到面試,需要時間心機準備功夫不能馬虎。想搵好工,重點在於鎖定目標,貴精不貴多。

『講不得』

搵工跳槽是行動,無需要日日掛在嘴邊,四周圍講慌死冇人知。如果你是一個有價值有能力的人,做得唔開心,份工冇前途,講多無謂,疊埋心水搵工走人,駛乜講?如果根本沒有勇氣走,日日返工話搵工,結果講到俾人炒魷都未走,真討厭!

延伸閱讀:寫辭職信最緊要係乜?學識凡事留一線 日後好相見

『比不得』

人比人比死人,工作其實亦一樣!大公司小公司,各有特色,每間公司的福利人工機制都不一樣,所以不必四周圍問怎麼薪酬水平,人工加幅幾多才算好,只要符合自己的需要需求,自己認為理想就女好。

延伸閱讀:加人工唔夠就憤而辭職 點止戇居咁簡單?劈炮前要諗清楚呢3件事

『捨不得』

決定搵工走,搵到就要走,天下無不散之筵席,亦冇一世的同事,但是有一世的朋友。做人做事,最忌三心兩意。

『死不得』

搵工,和搵男女朋友一樣,未試過,未拍過拖,又怎知是否適合自己能否相處得來? 所以見到心儀的,不管是好工還是好對象,心動不如行動最實際!揀錯愛錯有什麼大不了?只要不死心,跌倒起翻身,又一條好漢!

打工仔 注意 搵工 大忌
圖片:unsplash

編按:作者張慧敏(Son姐),橫跨五世代,馳騁幾十年。天堂未曾上,人間不斷闖,地獄忙折返。魔鬼教練,不是浪得虛名,在公企業顧問獵頭人,在私是辣媽CEO。一雙慧眼,閱人無數;一張寸嘴,不平則鳴;一支辣筆,有的放矢。有問有答,言必由衷。