唔靠自由行  一田首兩月銷售額逆市升逾5%

唔靠自由行 一田首兩月銷售額逆市升逾5%


政府剛公布最新零售數據,今年1月零售表現按下跌6.5%,已經係連續11個月錄得下跌,可見香港零售業仍然處於寒冬,但主攻本地客嘅一田百貨再次成為「逆市奇葩」。

出哂名唔開會嘅CEO莊偉忠坦白講,今年銷售唔太理想,但又唔會睇得咁悲觀。佢透露一田今年首兩個月銷售額升5.4%,可以跑贏大市都係要多得班同事同香港人。佢仲話齋睇超市生意額按年都升5%,反映本地消費力仲好強!

雖然旅客人數減少,但一田都積極搞吓新意思去吸引本地客,其中聯同好拍檔熊本熊Kumamon合作,搞咗張首次於海外發行嘅熊本熊信用卡,莊偉忠仲話張卡推出短短兩日,已經送哂迎新禮品,就知幾受歡迎。

另外,一田亦獲日本熊本縣官方授權,首次係海外為Kumamon搞生日感謝祭。雖然生意係難做,但莊生都希望一田全年有4%銷售增長,仲預告定喺明年開多2間分店添!

莊生成日都金句一籮籮,訪問過程都有令小編難忘的金句,就係咁易CAP幾句畀大家回味下,想睇原汁原味的訪問,亦可以翻睇以上VIDEO。

「香港人係自己屋企,梗係當家作主,點解要懷疑自己身份?但無理由專登扭曲自己嘅習慣去迎合其中一類客人!我地唔會專登用簡體字!我地係用廣東話!」

「你畀我,我唔會反對!但你唔畀我,我亦不覺得你做錯!要Stand on our own feet!」

「人要接受有高有低,無人欠你,你嘅人生係自己,唔好諗住靠人。當你用依個態度面對人生,你會發現自己可以更堅強,抗跌能力會強咗。預祝大家,耷低頭努力向前行,唔好諗以前有幾好,挻起胸膛捱過2016年嘅困難!」

相關文章