命仔緊要   10大職業病你中幾多?

命仔緊要 10大職業病你中幾多?

每個行業都有不同辛苦之處,不過,其實除咗辛苦之餘,返工返得多又休息不足,分分鐘會患上職業病。以下就綜合了5個行業常見的職業病。如果你身邊都有從事這幾個行業的朋友,不妨提下佢地要注意健康呀!

1/ 醫務人員

頸椎病及腰椎疾病
外科醫生經常要做手術,一個手術就可能要做數個小時。咁即係話要連續幾個鐘保持低頭彎腰姿勢,所以好容易出現肌肉疲勞,嚴重啲就可能頸椎腰椎嘅疾病。所以話雖然醫生成日叫病人做一個鐘就要休息,不過醫生就成日都做幾個鐘甚至10幾個鐘手術先至可以休息。久而久之,就形成頸椎埋腰椎疾病嘅疾病。

精神壓力大
醫護人員掌握病人嘅生死都咪話唔緊張,有唔少醫生護士都會面對失眠嘅問題。有醫生做完手術返到屋企都仲係好緊張,開始回想自己手術有冇做錯,記錄有冇寫錯。面對病人同家屬嘅時候又要笑面迎人,驚俾人投訴,間接令到醫護人員精神壓力好大。

2/ 售貨員
腳趾外翻
售貨員長期都要企住招呼客人,好多時都要企足全日冇休息時間,最多可能都係食晏嘅時候先有機會休息。如果唔使着高踭鞋還好,但係如果要長期着住高踭鞋棋喺度的話,就非常損害腳嘅健康。腳趾外翻嚴重起嚟仲會痛到瞓唔到覺,要做物理治療。

足底筋膜炎
足底筋膜炎都係因為長時間企喺到而引起的病症,另一個成因就係搬重物。售貨員除咗要售貨,好多時都要入倉搬搬抬抬。有時貨物太重,搬得多就會造成勞損!有病人指,痛起上嚟會好似俾好幾十枝針刺你腳底。

3/ 廚師
網球肘
廚師每日都要攞好重嘅喎同埋鍋,而炒菜嘅時候都需要用到好多手腕嘅力。加上每日重複嘅拋鑊姿勢,直接令到伸腕肌過度使用,導致網球肘。病癥包括手腕向上嘅時候會唔順手,同埋向下彎嘅時候都,會感到疼痛。

胃病
唔講你唔知,你以為廚師日日望住啲食物,隨時都可以食。但係,其實大部份廚師嘅胃都係唔係幾好。廚師每日最忙嘅時段就係平日大家食飯嘅時間,所以一係佢哋就要提早食或者遲啲食,所以永遠都成日食冇定時亦都冇定量。長期都係咁,就會引起慢性胃炎、便秘,嚴重的話仲會患上萎縮性胃炎。

4/ 司機
骨骼肌肉疾病
職業司機每日都坐住開車,長時間維持同一個坐姿,想轉下姿勢都唔得呀,慢慢就會令背部軟組織會疲勞酸痛。而每日重覆同樣的動作,令問題惡化。雖然職業性骨骼肌肉疾病唔會致命,但係好容易復發,又影響心情,都真係幾難受。

前列腺炎
司機是前列腺炎的高危一族,因為長時間冇得行下放鬆下,好容易影響血液循環,造成前列腺炎症。再加上飲水少,冇咩機會去廁所,對尿路造成直接刺激,加加埋埋就引起尿頻、尿急、尿痛等其他膀胱炎症狀。

5/ 教師
引發聲帶、咽喉問題
老師日講嘢講,如果啲同學仔唔乖仲要嗌破喉嚨先可以叫佢哋安靜。老師講書多時間又長但係飲水嘅機會就好少,對喉嚨同聲帶都造成嚴重嘅負擔。長期係咁就會引發聲帶息肉、慢性咽炎等疾病。

下肢靜脈曲張
老師要長時間企全教書,日日咁企法,令靜脈有壓力,導致下肢靜脈曲張。開始嘅時候都係有青筋暴現嘅情況,冇咩太大感覺只係望落去唔係幾靚,不過長期落去就會引起好多併發症,甚至引起肺動脈栓塞。所以下次見老師教教下書坐咗喺度,都唔好怪佢啦!

相關文章