【診所職場事|寶豬趣聞】佢有貨我冇貨|珍寶豬

【診所職場事|寶豬趣聞】佢有貨我冇貨|珍寶豬

有日一位女士嚟到診所。
佢行吓停吓欣賞吓咁樣慢慢行嚟登記處方向,見佢龜速移動中,我就低頭做文書嘢算,廢事欣賞佢步姿。

佢終於行到埋嚟,佢見我冇第一時間理佢就問我:「你見唔到我咩?」
我抬頭:「睇醫生係咪?未喺度睇過嘅麻煩俾身分證我登記啊」
佢:「你哋有冇嗰啲子宮針呀?」

撰文:珍寶豬funnyclinic)|圖片:電視截圖

人哋有針我哋冇

我:「呢個我哋而家冇貨呀,你要唔要留個電話,有貨嗰時我哋通知你呀」
佢:「吓?我睇新聞話有好多㗎喎」
你睇新聞係咪見到嗰批假疫苗呀?
我:「我哋而家就冇貨啦…」
佢:「咁你知唔知邊度有呀?」
我:「我唔清楚呀,你去其他診所望望啦」
佢:「之前明明周圍都有㗎,突然一陣就冇晒嘅」
我:「你去其他診所問吓呀」

佢:「你哋嗰啲會唔會假針嚟㗎」
我:「我哋係自己喺藥廠訂返嚟嘅,你去第二間診所問吓有冇貨啦」
佢轉身行前兩步,又擰轉頭同我講:「出面嗰啲會唔會係假針嚟㗎,香港應該冇假針㗎?」
我:「其他嘅我答你唔到呀,你最好去問清楚佢哋啦」
佢:「嘖,咩都唔知嘅請你返嚟淨係識得唔知唔知」
我冇出聲,唔想啋佢。
佢再問:「咁你有冇邊間診所有針呀?」
我:「我哋醫生得呢一間診所,冇其他舖頭㗎啦」
佢:「嘖嘖嘖,唔怪得冇針啦,人哋有針嗰啲大間好多㗎」
係呀,咁你去打嗰啲針啦~

診所職場事 寶豬趣聞 佢有貨我冇貨 珍寶豬
圖片:電視截圖

延伸閱讀:想要「過時」病假紙嘅先生|珍寶豬