日日搭港鐵包你身體健康 19個轉車站13項比賽有得揀

日日搭港鐵包你身體健康 19個轉車站13項比賽有得揀

唔少香港人日日返工放工都搭港鐵,成日都要迫上車、轉車、追車,如果將呢啲情景化成比賽,各位打工仔差唔多日日都要被迫參加,稍為體力不足都難以完成。

你又知唔知每個港鐵轉車站,都可以代表一項比賽?究竟大家每日參加咗幾多項?

文:Nic Chan
相:資料圖片、港鐵

20042017_02_9

短途賽:太子站、旺角站、油塘站

每次列車到站一開閘,差唔多個個都跑跑跑,目的只有一個--上到車。不過當大家起步一刻,其實已經「輸在起跑線」,因為另一月台已經有上一班車嘅乘客等緊。想搭車?等下一班啦!

中距離賽:北角站、荔景站

挑戰完短途賽,大家可以挑戰轉車距離較長嘅中距離賽。列車開閘同樣都會跑,雖然可以「贏在起跑線」,不過去到終點結果都一樣。想搭車等多幾班啦!

長途賽:香港站、尖東站

如果嫌短途賽、中距離賽未夠刺激,大家可以參加長途賽。中環站至香港站、尖沙咀站及尖東站嘅轉車距離,足足有400米,已經等於標準運動場一圈嘅長度!日日來回幾次,包保大家健康身體好。

越野鐵人賽:美孚站

由西鐵線轉荃灣線(或者掉轉行),一定要經過彎彎曲曲通道、上上落落先到,至於點解會叫「越野」?因為美孚站通道可以見到公園,綠油油一片,即刻心矌神怡!

爭凳仔賽:調景嶺站

20042017_02_7

調景嶺站唔單止係轉車站,更加係觀塘線總站,開嚟嘅車架架都係吉車,自然多位坐,不過要同月台上幾十人去爭囉!如果爭淨個「批鬥座」,都唔知坐唔坐好。

沙甸魚上車賽:金鐘站

有幾條線轉車嘅金鐘站,人多擠迫,想上車真係要好似沙甸魚咁,逼埋一嚿!

斜坡競技賽:大圍站

20042017_02_6

講到由馬鞍山線轉去東鐵線,相信沙田友都會知,日日經過小斜台轉車,應該訓練到平衡力。

跑樓梯賽:南昌站、鰂魚涌站、何文田站

20042017_02_5

呢3個站出名多樓梯,其中鰂魚涌站月台上大堂閒閒地百幾級,如果何文田站由山上出入口行到去月台,足足要行500幾級樓梯。日日係咁行,一定瘦身成功!

行李喼閃避賽:九龍塘站

作為北上必經轉車站之一,九龍塘站日日都有唔少自由行,大大小小行李喼自然好多,轉車唔想被撞,要識閃避啦。仲睇電話?睇住前面呀!

水貨接力賽:上水站

辛勞嘅水貨客,每日來來回回中港兩地,只係為咗賺一百幾十蚊,所以我地應該讓出空位,俾佢地有足夠空間擺位呀!

限時欖球賽:紅磡站

20042017_02_3

有網民話,紅磡站係「衝撞式欖球」,次次未落車,已經有一大班人衝上車,撞開人去爭位,好似玩緊欖球比賽咁。計小編話,紅磡站轉車唔單止要衝撞,仲要睇下邊個月台有車搭,再係限定時間內上車,似足臨完場前最後衝刺!上到架車就贏,上唔到惟有走去另一月台等車。

無限輪迴實:將軍澳站

20042017_02_4

康城站坐車去寶琳站,一定要係將軍澳站轉車,見對面有車嚟又有人入,梗係第一時間衝入去啦,點知原來架車又係去康城架!呢個係無限輪迴嘅宿命……來回康城又折返將軍澳,猶如來回地獄又折返人間咁慘情。

地底定向賽:中環站

中環站可以轉荃灣線、港島線、東涌線、機場快線,大家都根據指示板行去特定嘅月台,好似玩緊定向比賽咁,最大分別係--呢個定向係地底進行。

比賽項目足足有13項,如果日日要經過調景嶺站、九龍塘站、大圍站轉車,你已經參加咗「爭凳仔賽行李喼閃避斜坡競技賽」,真係啱晒平時小做運動嘅香港人!

小編認為,如果遇到港鐵故障,仲可以參加鬥快搵車搭比賽,完全為動腦益智之選!

20042017_02_8