上班族 4個血淚

上班族 4個血淚

《小圈子》

辦公室常常出現小圈子,那麼分行裡面常見嗎?

在分行,Sales的世界比較少出現影響工作的小圈子。因為每個Sales會獨立跑數,跑唔跑到數,其他Sales好少影響到我(搶數另計),一句到尾,與Teamwork無關。

咁分行入面,邊啲同事嘅工作係講求Teamwork? 無錯,就係Operation嗰邊。

凡是需要有Teamwork的地方,就有小圈子的出現。就好似我個Teller朋友Ernest,佢雖然已經做咗一排,但一直做得唔開心,因為佢係最新加入,被其他Tellersss排斥,甚至將好多下欄工作全塞給她。

原因?

舊人恰新人。

這是一個很奇怪而在分行常見的現象。我透過同Ernest傾談,嘗試用理性角度去研究,點解舊人咁討厭新人?而新人其實內心有甚麼回應?

舊人對新人的常見指控:

1)新人手腳慢、成日做錯嘢

新人做嘢慢、做錯嘢,是因為剛上手,需要時間去適應,點可以同做咗十九幾年嘅你相提並論呢?如果佢做得快過你,代表醒過你,咁你先驚!而且,難道當年的你,未試過做錯嗎?不用說當年,就是直到現在也會做錯吧!明明曾經自己也是新人,為何不多一點點諒解?

2)新人教極唔識

俗語話「教識徒弟無師傅」,有不少人深信此理,好多時舊人只在新人面前講解一次,甚或講啲唔講啲,然後就到處投訴新人愚鈍,教極都唔識,以突顯自己的存在價值。其實,在外人眼裡(尤其是心水清的老闆),只會認為是你無能力調教新人,試問連簡單地傳達自己工作任務也做不好,怎去考慮升職讓你管人?

3)新人竟然高人工/Grade過自己

我明白,呢樣是非常不忿氣的!不過無計,每個人際遇不同,而且魚唔過塘唔肥。你甘願留在Comfort Zone年年埋怨老闆無升你職、人工加幅不似預期,其實就無資格埋怨跳槽入來的新人比你高人工/Grade。咩話?你忠誠度好高?咁請同老闆反映,而唔係將怒火發洩在新人身上和刁難他們。

4)新人乞人憎

原來討厭一個人,是可以很不理性,這種不理性的程度是,連佢對你微笑,你也會覺得笑容猥瑣。Ernest向我哭訴,話其他同事唔鍾意佢,係因為佢有手汗。「乞人憎」是一種抽象概念,總之,就算你坐喺度,咩都無做,但你嘅存在,已經會令佢唔舒服。大家心知肚明,呢個只是「莫須有」罪名。

舊人趕走了新人,其實忙碌的是自己,工作量也大增,就算會另行聘請新人,真空期也夠忙了吧?怎麼計也不划算!

點解舊人仍樂此不疲做這種蠢事?也許,人心,真的是難以理喻。

不過換個角度看,新人不必因此感到難過不忿,因為要藉著恰新人才獲得成功感的人,往往是自卑又能力低的一群,是你的出現讓他們感到嫉妒,感到有危機。他們已經無膽量和能力離開,恰你,是他們唯一力所能及的事。

最可悲的人,其實是他們。

#人善人欺天不欺

P.S. 昨晚和我傾訴的Teller妹妹,不要再為此傷心,好好收拾心情,重新出發~很老土也要講句,塞翁失馬 焉知非福!Cheer Up!

文章授權:90後銀行小妹甩轆記