【診所職場事|寶豬趣聞】咳到肺癆嘅先生想插隊睇醫生|珍寶豬

【診所職場事|寶豬趣聞】咳到肺癆嘅先生想插隊睇醫生|珍寶豬

有日一位先生嚟到診所。
佢咳得好厲害咁行埋嚟登記處:「咳咳咳咳咳咳,睇吓我」

我:「未睇過係咪?你俾身分證我登記先呀」
佢又唔戴口罩又唔掩口:「咳咳咳咳,好呀,等幾多個呀?」
我:「而家登記排第六個」

撰文:珍寶豬funnyclinic)|圖片:電視截圖

「咳成咁你都實一鑊熟,後果自負呀」

佢望望坐喺度嘅人再問我:「咳咳咳咳,我唔知係咪肺癆,你可唔可以…」
我未等佢講完已經好快手咁貼心地遞上一個口罩:「戴住佢呀」
佢唔領情:「我諗我要早啲睇,如果唔係你哋都一鑊熟」
你咁樣唔會令我驚㗎喎。
我:「戴返個口罩啦,有病戴口罩基本嘢嚟㗎」
佢望住個口罩:「咳住焗喺入面我咪仲辛苦,你俾我早啲睇完,大家咪冇事」
你都只不過係一個自私精啊,做咩又扮到咁關心大家?你精神分裂呀?

我:「個個都唔舒服個個都係咁等㗎啦,你係咪睇㗎?係就俾身分證我」
佢:「咳咳咳咳咳咳,真係肺癆喎」
我:「你係咪肺癆都要俾醫生睇吓先知嘅」
佢終於肯俾身分證我:「咳咳咳咳咳,咳成咁你都實一鑊熟啦,後果自負呀」
我係咪要驚呀?
我冇出聲。佢仲好似專登咁咳埋嚟,係咁「咳咳咳咳咳」。
我:「你真係唔戴口罩呀?」
佢:「冇得早啲睇,咳咳咳咳」
我:「哦,咁你坐低等啦,排第六呀」
佢坐低後頭兩三分鐘都好用力咁咳,好刻意咁咳……久唔久都有望吓我。
冇人理佢後,佢就冇再咳過。可能肺癆好返啦~

延伸閱讀:【診所職場事|寶豬趣聞】好好珍惜自己每一隻牙嘅小姐|珍寶豬