【診所職場事|寶豬趣聞】想用阿媽張醫療卡嘅先生|珍寶豬

【診所職場事|寶豬趣聞】想用阿媽張醫療卡嘅先生|珍寶豬

有日一位先生嚟到診所。
佢放低張醫療卡:「登記呀」

我望望醫療卡後屬於我哋診所嘅貼紙仔,輸入覆診卡號碼,望望資料……女人嚟㗎喎,仲要係一個年紀比較大嘅。

撰文:珍寶豬funnyclinic)|圖片:電視截圖

「上面冇相嘅你又知唔係我嘅?」

我問先生:「你係幫人掛號?佢大概幾時到呀?」
佢:「唔係呀,我睇喎」
我:「你拎錯醫療卡俾我?呢張醫療卡應該唔係你嘅」
佢:「係我呀,用得呀」
我:「咁麻煩你俾身分證我對一對資料呀」
佢:「對咩資料呀?我有醫療卡啦喎」
我:「我哋用醫療卡係需要對埋身分證嘅」
佢:「上次我細妹都用過又話唔駛嘅?」
哦!上次你細妹用?咁呢張醫療卡如無意外應該係你阿媽嘅?

我:「張醫療卡唔係你嘅話,係唔可以用,淨係可以俾本人用」
我放返張醫療卡上枱面,佢拎起張卡嚟睇問我:「上面冇相嘅你又知唔係我嘅?」
呢個咁高智慧嘅問題,我真係好難答到你呀,你豬啫,唔好當全世界嘅人同你一樣咁豬好冇呀?你個大腦全新唔用嘅就捐出去啦~
我:「我哋登記嗰時係有資料…」
佢望望四周:「即係你哋登記嗰時會影埋相呀?」
我可唔可以講粗口呀?
我:「我哋冇影相嘅,張卡唔係你嘅就唔可以用嘅,你咁樣分分鐘係犯法」
佢:「犯法?佢係我阿媽嚟喎!佢俾我用嘅!」
我:「佢俾你用都唔代表可以用,咁樣呃保險公司…」

我都未講完,佢就搶住講:「你可唔可以將我阿媽個資料改成我嘅資料呀?咁咪得囉?係咪呀?」
係你死人頭呀!你阿媽生到你咁醒嘅?
我:「冇得改呀,醫療卡嘅嘢唔係我話事呀嘛,你要嘅咪自己買保險整張」
佢掉低句「有錢買就唔駛用我阿媽張卡啦,我個妹上次夠用到囉,你又俾佢用?白痴」就離開咗診所……
你又講得幾有道理,我會好好記錄低再同醫療卡公司講返呢個情況。

延伸閱讀:【診所職場事|寶豬趣聞】想要四日病假嘅先生|珍寶豬

延伸閱讀:【診所職場事|寶豬趣聞】一定要醫生聽電話嘅小姐|珍寶豬

【診所職場事|寶豬趣聞】想用阿媽張醫療卡嘅先生|珍寶豬
圖片:電視截圖