【診所職場事|寶豬趣聞】想搵醫委會嘅小姐|珍寶豬

【診所職場事|寶豬趣聞】想搵醫委會嘅小姐|珍寶豬

有日一位女士嚟到診所~
佢行到嚟登記處,放低咗一個白色背心膠袋喺枱面。

我:「係咪睇醫生?麻煩你俾身分證我登記呀」
佢:「我嚟換藥咋喎。」佢指指個膠袋。

撰文:珍寶豬funnyclinic)|圖片:電視截圖

「你醫生冇入醫委會呀?」

我:「都俾你身分證我check返你嘅紀錄先呀」
佢:「我都冇喺度睇過」
咁你換咩藥呀?
我:「你頭先又話換藥嘅?」
佢:「係呀」
我:「你冇喺度睇過呀嘛?你啲藥唔係我哋嘅,唔會換㗎喎」
佢:「咁㗎咩?有啲咁嘅規矩㗎咩?」
我:「唔係我哋醫生開嘅藥,醫生係唔會負責㗎」
佢:「入面嗰個唔係有份入醫委會㗎咩?」
我:「你係要去返開藥俾你嘅醫生度換藥,唔係是但搵一個醫生呀」

佢:「我有揀過㗎!咩是但咁難聽呀?」
醫生應該開心嗎?
我:「你去返開藥俾你嘅醫生度問啦~」
佢:「咩嘢醫委會唔係都一樣咩?唔係同一堆咩?」
我已經唔記得自己loop咗幾多次:「藥嘅係要搵返開藥俾你嘅醫生,如果你要睇醫生嘅,我就可以同你登記」
佢:「佢(開藥俾佢嘅醫生)唔係喺附近㗎,我就住附近嘅」
我:「都冇辦法呀,你喺嗰間診所睇就要去返嗰間問㗎啦,我哋幫唔到你換藥㗎」
佢:「因為你醫生冇入醫委會呀?」
我想打到你鼻屎都飛埋出嚟…
我未俾得切反應,佢又問:「定係你係中醫呀?」
…我真係好難想像你係點樣生存到咁耐。

我:「我哋西醫嚟嘅」
佢:「係咪冇入醫委會所以唔換得藥呀?」
佢拎起個膠袋,細細聲講:「原來真係有假醫生㗎…」
佢轉身離開了。
我懷疑你個腦係假…

延伸閱讀:【診所職場事|寶豬趣聞】一定要醫生聽電話嘅小姐|珍寶豬

延伸閱讀:【診所職場事|寶豬趣聞】小姐兩邊鼻哥窿尺寸唔同咗|珍寶豬

【診所職場事|寶豬趣聞】想搵醫委會嘅小姐|珍寶豬
圖片:電視截圖