奉旨放蛇吃喝玩樂  全職神秘顧客月入12,000起

奉旨放蛇吃喝玩樂 全職神秘顧客月入12,000起

日忙夜忙都係想有餐安樂茶飯,可以得閒行吓街、買吓嘢、食啲好嘢又唔洗驚負擔唔起咁姐。但係小編想貪心啲,想搵份工作內容主要係吃喝玩樂但又可以同時收人工嘅!講緊嘅就係一般人眼中嘅「神秘顧客」嘞!

一般而言,神秘顧客係自由接工作,返工時間隨人決定。如果係餐廳工作,仲可以賺到一餐免費膳食,而零售店嘅話,就通常會被要求喺工作完成後退回貨品,喺極少數嘅情況下神秘顧客係可以獲得工作中買嘅商品。實地觀察過後,神秘顧客就要返去完成一份報告評分,以換取酬勞。

今年初時就有一個自稱曾經做過兩年神秘顧客嘅網民喺討論區出帖文講呢行嘅生態,佢話呢一行係多勞多得,正常嚟講每單工作酬勞由20至250元,甚至1,000元不等,佢最高峰時試過月入13,000,比全職嘅神秘人月薪仲要高,更有喺佢帖文留言嘅其他網民話試過月入20,000!成績相當驚人。


本刊接觸一名資深從業員表示,全職神秘顧客月薪一般由12,000起,工作三年後有望升為負責策劃神秘顧客內容嘅營運經理,月薪可以翻倍至25,000不等!

咁到底點入行呢?以往嘅神秘顧客多數都係靠人介紹先有工開,但依家其實簡單上網搜尋吓,就可以搵到大量專做神秘顧客工作嘅公司,入行無難度!

不過唔好咁天真以為神秘顧客真係行吓街食吓嘢之後畀幾句評語就收錢,一般公司都對神秘顧客嘅記憶力同觀察力要求相當高,當處理到奢侈品零售業時,公司仲有可能要求神秘顧客訓練演技,務求佢哋舉手投足都要同真實顧客無異,等店員無法覺察。

好似上述網民話齋,每做完一單工作就要寫報告,基於工作守則同保密原則,又唔可以係店鋪內兜口兜面記錄細節,所以相當考你記性。

而且神秘顧客工作上有時都面對唔少挑戰,簡單啲嘅例如點樣喺對方唔察覺嘅情況下偷望人哋名牌、工作時遇到朋友咁。網民又話,有時有啲工作要求做店內某一個特定員工嘅評核,但如嗰個員工當時唔喺店面,其他店員埋嚟你身邊嘅話,就要諗計去處理呢個突兀嘅情況。再者,有時明知道會影響對方嘅晉升機會或去留嘅話,你能唔能夠畀到客觀嘅評價出嚟,都相當具挑戰性。

伸延閱讀:
【30歲酒吧員六年晉升管理層】

http://www.edigest.hk/Vip/detail?id=6103
【23歲女變身豬肉分割員 創業夢始於肉枱上】
http://www.edigest.hk/Vip/detail?id=5981
【手遊當旺 寫App人工2年加六成】
http://www.edigest.hk/Vip/detail?id=5968