美食博覽攻略  5大必買位你要知

美食博覽攻略 5大必買位你要知


美食博覽今日(8月13日)至下週一(8月17日)喺灣仔會展舉行,總共有23個國家地區、逾百個參展商擺攤位,一聽就知現場雲集各地美食啦~~ 場內1蚊攤位最受歡迎,其中一個係任搶鮑魚,有片你睇,通宵排頭位王先生喺1分鐘,不費吹灰之力就搶到百幾隻,結果獲得總值6,000元鮑魚。


通宵排頭位王先生,1分鐘內搶到總值6,000元鮑魚。

為食嘅小編當然會為各位讀者,搜羅又特別又抵買嘅美食啦,以下五個係必買位﹗

1. 1KG皇帝蟹腳

北海道嘅蟹出名好食,今次美食博覽都有得買啦!~隻隻皇帝蟹喺日本野生捕獲,經製作後急凍運嚟香港,大約1公斤嘅蟹腳都只係400元,賣晒就無啦!

攤位名稱:共洋海鮮有限公司(Uniocean (HK) Company Limited)
攤位編號:3B-A07

北海道皇帝蟹腳,大約1公斤賣400元。

2. 初戀嘅味道

究竟初戀嘅味道係點?呢度有得試!唔好諗錯隔離~小編講緊一款叫「初戀問我」嘅葡萄酒咋,呢種酒帶有荔枝、秋梨、蜜糖嘅味道,入口香甜,真係幾sweet架!呢個攤位仲提供其他意大利葡萄酒訂購,買得多有6折優惠,兼有機會拎到Apple Watch一隻呀!

攤位名稱:意酒會洋行(Wine Passions)
攤位編號:3E-B09


「初戀問我」葡萄酒,帶有荔枝、秋梨、蜜糖嘅味道。

3. 西班牙「叉燒」

叉燒包小編成日食,不過美食博覽嘅「叉燒」卻係與眾不同,皆因用西班牙黑毛豬製成,聲稱無加防腐劑、色素、鬆肉劑,100%天然!除咗叉燒,呢度仲有泰式香草黑毛豬豬頰肉、即切36個月橡果黑毛豬前腿等等,一份只需幾十蚊,YUMMY!

攤位名稱:Diverxu Limited
攤位編號:3D-C32


西班牙黑毛豬叉燒,聲稱100%天然,一份只需幾十蚊。

4. 安德尊激讚黑鮑魚

可能各位讀者都食過鮑魚,不過黑翡翠鮑魚又試過未?雖然黑翡翠鮑魚表面黑漆漆,不過肉質鮮甜,煲湯更加無得頂!呢個攤位仲放咗個大水缸,客人即買即速凍,真係做到最新鮮~每日仲有限定遊戲,估中鮑魚重量免費有一隻,唔怪得做代言人嘅安德尊都讚好!

攤位名稱:大棧有限公司
攤位編號:1B-C10

攤位每日有限定遊戲,估中鮑魚重量,免費有一隻黑翡翠鮑魚。

5. 出前一丁薯片食過未?

深受香港人歡迎嘅出前一丁,今年推出兩款推廣優惠,其中只要畀120蚊可以拉走架手拉車,裡面有十幾款即食麵,仲有出前一丁出品嘅薯片,香港好少見架!另一個係70蚊嘅福袋,會有9款產品,兼且送連帽毛巾一件,食麵食到出晒汗,啱晒!

攤位名稱:日清食品有限公司
攤位編號:1E-B02


出前一丁推出手拉車,裡面有香港少見出前一丁薯片。

美食博覽仲有好多美食優惠,包括德國「三月啤酒」、意大利10年陳釀巴沙米可醋、馬來西亞貓山王榴槤雪糕等等~

除此之外,場內仲有家電家品、茶展、中醫藥等等展覽,晚上6點後入場可以優惠價10元,7點後仲可到展覽廳3F嘅「晚市着數特區」,快啲趁週末去行一轉啦!