想做網絡紅人吸金?要向這5類KOL埋手

想做網絡紅人吸金?要向這5類KOL埋手

依家網上越嚟越多人投身KOL(Key Opinion Leader)行列,拍吓片、影吓相、加啲caption就擺上網同所有人分享,如果分享嘅內容能夠引起大眾共鳴,就會引來一群追蹤者(Followers),賺到嘅唔止係人氣,分分鐘仲有好多財氣!

就好似早前本刊訪問著明的旅遊KOL項明生,亦曾對記者說:「家陣啲廣告自己湧埋黎。」大家就知有幾好搵。而之前好多無線主播,好似方健儀、伍家謙咁,離巢無線後都轉做KOL搵食。

撰文:JOEY
相片:網上圖片

如果你本身唔係名人,要突圍而出就真係要憑自己的才藝。但咁多興趣專長,好似旅行、攝影咁,人人都識,競爭大,要跑出就唔係咁易。係香港,以下係五大類最易跑出的KOL,如果 閣下有意投身,不妨向呢幾方面入手。

1. 美容化妝

最初喺網上湧現嘅就係一班開住自拍鏡頭拍片教人化妝嘅美女,佢哋通常會教吓唔同場合應該化咩妝容、邊隻產品好用、髮型同穿搭,甚至整容心得等等女性嘅熱門話題,有一群忠實粉絲後都會偶爾拍片講吓自己日常生活、經歷等。

現時不少護膚、化妝品廣告商都會主動送產品畀呢班人氣KOL用,甚至贊助佢哋拍片或者邀請佢哋成為廣告主角。BEAUTYQQ、Alicehaha甚至前人民力量主席袁彌明都係呢類KOL嘅佼佼者!


BEAUTYQQ(YouTube訂閱人數:301,057;Facebook讚好人數:42,756)

Alicehaha(YouTube訂閱人數:129,112;Facebook讚好人數:98,345)

袁彌明(YouTube訂閱人數:46,524;Facebook讚好人數:40,777)

2. 煮食

有人話識煮嘢食嘅女人最畀到男人一種家嘅感覺,相反識煮嘢食嘅男人對於女人嚟講加哂分之餘,仲相當受廣大網民歡迎。

煮家男人Bob’s your uncle同Dim Cook Guide兩位都係雄赳赳嘅男人,但煮起嘢食上嚟已經唔止係有板有眼,直頭有酒店出品嘅賣相。加上Bob叔一路煮嘢食、一路同你用MAN爆嘅聲線夾雜粗口咁,同你談談城中熱話,內容到肉又抵死,成功喺短短兩年在YouTube吸納到超過26萬嘅訂閱者。


煮家男人Bob’s your uncle(YouTube訂閱人數:264,809;Facebook讚好人數:60,556)

Dim Cook Guide(YouTube訂閱人數:221,819;Facebook讚好人數:46,641)

3. 音樂創作

社交媒體興起令到一小眾嘅音樂人終於有傳統媒體以外嘅渠道去發佈自己嘅音樂,坤哥都係靠YouTube同Facebook來保持自己喺巨聲後嘅知名度,總算都捱出頭來。

以下兩個網絡歌手組合亦都係藉此引起大眾注意,仲得到越嚟越多主辦機構搵佢哋表演添!


chochukmo 觸執毛(YouTube訂閱人數:10,578;Facebook讚好人數:28,521)

雞蛋蒸肉餅 GDJYB(YouTube訂閱人數:3,820;Facebook讚好人數:10,475)

4. 自編自導自演

以前想拍電影,一定要有天文數字嘅資金支持,否則拍完無宣傳嘅話,都好難有觀眾。但依家有咗社交媒體,只要你嘅idea好,就會一個傳一個將你嘅作品分享出去,影響力不比係戲院上映嘅大千萬大製作差架!

自編自導自演KOL之中,司徒夾帶便是成功由短片彈起,目前其Facebook已有逾18萬個Like。除此之外,以下兩個頻道就係當中嘅佼佼者,幾乎每部作品都係由幾個廿幾歲嘅年輕人自編自導自演,吸引到一眾粉絲同廣告商嘅青睞。如果你自問拍野了得,自己起個影院頻道又何妨。


BOMBA(YouTube訂閱人數:442,396;Facebook讚好人數:277,267)

FHProductionHK(YouTube訂閱人數:462,739;Facebook讚好人數:239,606)

5. 吹水

如果你無咩特別技能但又自問講嘢夠抵死到肉,亦可以拍條片同大家傾吓近日城中熱話,火雞姐就係憑住自己搞怪得嚟講嘢又夠啜核、靚女得嚟又放得低形象而跑出,連樂壇天后鄭秀文睇到都大讚,近日亦開始見到有廣告搵佢合作!不過如果你好似伯賴咁識講嘢又識畫嘢整動畫,吸納讚好嘅效率就當然更高啦!


丁可欣(火雞姐)(YouTube訂閱人數:91,110;Facebook讚好人數:51,092)


伯賴(YouTube訂閱人數:246,976;Facebook讚好人數:64,164)

唔好睇少呢班KOL好似淨係上網講玩講食吹吓水就吸到一班追踨者,佢哋背後付出嘅努力固然唔少,但一定數字嘅追踨者亦為佢哋帶來一定嘅吸金力。好似之前英國《每日郵報》就報導過,如果你有逾十萬追踨者嘅話,就可以吸引到一眾廣告商同你商合作,分分鐘年賺百萬!

圖片來源:英國《每日郵報》

不過以上嘅數字就係根據英國國內嘅情況統計出嚟,對於「藝術無價」嘅香港,可能有所差距。不過希望一眾KOL同有志成為KOL嘅你唔好灰心,即使依家個情況未如理想,但係以上數字正正代表呢個行業潛力無限呀!好似印度電影「作死不離三兄弟」嘅主角「藍丘」話齋,只有繼續為夢想奮鬥先可以去到成功嘅一日!

伸延閱讀:
【IG代購 日花兩小時 月入可過萬】
http://www.edigest.hk/Vip/detail?id=4223
【唔靠飲飲食食 女星愛扮靚生意】
http://www.edigest.hk/Vip/detail?id=4370