昔日公屋,今日私樓?!

昔日公屋,今日私樓?!

想當年,公屋豆潤咁細,畀人覺得係窮人先住,總會比人睇低,所以人人都極力爭取「升級」到私樓。當你同朋友講「買到私樓」,兩個月後會搬出呢間公屋嘅時候,你朋友流露著心有不甘嘅神情,一方面替你開心,一方面黯然落淚,哀號「這些機會為何不是自己的」。

不過時移勢易,宜家嘅私樓反而愈來愈細,有啲仲細過一間公屋單位!而租公屋又平又正,除咗唔洗理維修費、管理費、差餉等等…周邊設施又齊全,家庭成員多咗,仲可以申請住大啲!

宜家同朋友講「買到私樓」,可能會笑你畀咁貴買咁細;反而同朋友講「租到公屋」,可能即刻會羨慕你,仲會猛讚你叻叻添!

究竟咁多年來,公屋變化有幾大呢?私樓又點樣愈縮愈細?等小編嚟個大搜查,睇下公屋面積+質素,點樣變得愈來愈似私屋,同時又回顧下私樓又點樣變得愈來愈似公屋啦~

1950 年代、1960 年代:徙置區一至六型

當年公屋乜都冇,冇獨立廁所、冇廚房。區內設施可能只有頂層嘅天台小學,方便住附近嘅小朋友返學。政府為咗用最少空間安置最多人,每一層單位都設計得密密麻麻,一條走廊有10多戶。

雖然每戶都擠埋一齊,不過勝在有人情味,左鄰右舍互相認識,阿媽每日買餸後都要同鄰居傾最少半個鐘先番到屋企,咁長嘅走廊,成為每個小朋友嘅玩樂天堂,佢地每日係咁跑,隨時訓練成為「香港保特」!

1970 年代:雙塔型、長型

到咗70年代,雙塔型係新一期公屋嘅設計,而華富邨華興樓及華昌樓,更是香港首批落成嘅雙塔式大廈。

華富邨唔單止擁有海景而成為「平民豪宅」,更因為傳聞有UFO到訪,名氣更一時無兩。不過由天井高層望落地下,又真係幾驚架!

至於長型大廈,本來稱係「第七型徙置大廈」,不過房委會成立之後,當時已無分「徙置區」或「政府廉租屋」,所以將其統稱「長型大廈」。


1980 年代:Y 型

Y型係房委會成立後,首款非長型設計嘅公屋大廈,不過樓宇設計靈活性較低,不能隨意修改樓宇層度及佔地面積大,所以呢類設計經常被用係新開拓土地、面積較大地盤,以及唔受高度限制地盤,所以Y型大廈大多數係新市鎮搵到。

Y型最大特色,係每個單位唔會望到所在大廈其他單位。而Y型大廈分為4款,分別是Y1型、Y2型、Y3型,以及Y4型,差唔多每翼有10多個單位,每層就有最多36個單位。

香港房屋委員會(房委會)係1998年推行租者置其屋計劃,租戶可以購買現居嘅單位,當中馬鞍山恆安邨、沙田顯徑邨及黃大仙竹園北邨等等,就係Y型嘅佼佼者!

1990 年代:和諧式

去到1990年代,和諧式會喻為當時期最有突破嘅設計,取其私人樓及居屋常用嘅十字型設計,令到公屋都擁有「私樓感」,認真係用「蔗渣價錢買到燒鵝味」。

2000 年代:康和型、新十字型

康和型、十字型設計,較多出現係居屋內,不過某部分新型公屋,都採用康和型或新十字型。十字型比起和諧式更高貴,皆因每層單位數目只有8至10個,相比和諧式16至20個單位,顯得更寬敞,自自然然,住嘅地方更加大啦!


私樓又如何呢?

1980年代:德福花園

早於1980年,德福花園已經採用接近公屋嘅新十字型設計,當年私樓設計,果然領先公屋多多聲!

1990年代:嘉湖山莊

嘉湖山莊可謂係90年代嘅代表作,鑽石型單位真是「驚為天人」,隱私度較高但實用性低,畀你會點揀??

2000年年代:奧海城柏景灣

如果當年買咗奧海城柏景灣嘅朋友,真係要恭喜你啦。奧海城唔似嘉湖山莊有個鑽石型嘅家,而且客廳長方型嘅設計好實用,加上有海景,難怪升值潛力咁大啦!!!

2010年後嘅新盤:

開始啲新盤變得愈來愈細,買咗好似呢啲單位,每日差唔多只會瞓覺先會係入面出沒,皆因實在太太太太細細,連招呼朋友都冇位……

講到世界級嘅細,即刻要講下利奧坊.曉岸、環海.東岸、尚築等等啦……

齋拎利奧坊.曉岸出嚟講,真係………見到都唔洗再講啦!!!!由圖則所見,利奧坊.曉岸嘅長度都幾長,不過呢個劏房盤嘅浴室袖珍到難以轉身,唔計廚房浴室嘅話,單位大小似到十足十當年的徙置區!

另一方面,唔好以為住得大就好好呀!!!!

睇下君柏呢個新盤,都可以用「世畀級」形容,主打四房大屋,不過單位走廊長度有如整個籃球場嘅長度,又一運動好例子!!!!咪住?!又練跑?!咁似50、60年代徙置區嘅走廊長度?君柏只係將條走廊放咗入屋咋喎!!其實…一個君柏單位會唔會只係打通幾間徙置區單位嘅豪宅咋??

睇咗咁多…畀你再揀多次,會畀幾百萬買私屋,定係每月幾千蚊租間公屋呀?