租客鋤租  六大絕招

租客鋤租 六大絕招

最近唔單止樓價跌,連租金都劈得狠。最近就話九龍灣得寶花園兩房單位,月租低見7,900元,住市區樓竟然唔洗8,000元。唔怕遠的話,天水圍嘉湖山莊月租仲低見7,500元。正在租樓住的準上車客,大可以繼續租住先,慢慢等樓價跌到自己合適的心水價位。

既然依家風水輪流轉,樓市重新由用家主導,租客自然要把握機會鋤租。不過鋤租都有唔少技巧,正所謂講錢傷感情,一個唔好彩同業主鬧翻左,隨時要搬屋,新入伙啲運輸費、傢俬、雜費都唔少架,呢六個絕招可以幫你同業主討價還價!

第一招:用數據拋業主

既然要講價,自然要做定功課,搵定最近樓價跌幾多,租金跌幾多等資料,最好搵埋附近租盤做緊的價,與及其他區域劈租實例。

例如根據差餉物業估價署(差估署)最新數據顯示,1月私人住宅租金指數報168.8點,回落至近一年低位,租金四個月共跌近5%。鋤租時最少都要減5%啦,如果你搵新界樓兩房單位開你7,500元,你隨口就講出幾個劈租個案,話天水圍三房都係咁既價錢喎。有咁多個案,睇怕業主都唔好意思再企硬。

第二招:靠嚇 數衰經濟前景

如果歷史數據拋唔到業主,就要靠嚇,從經濟及租金前景著手,話畀佢知全球經濟都唔多掂,香港經濟亦走緊下坡,GDP增長一季低過一季,就連財政司司長曾俊華都話未來經濟難捱,失業率有機會上升,將香港前景有幾咁暗淡講到幾咁暗淡。

另一方面,就從新盤海量供應著手,話黎緊陸續有新盤入伙,咁多租盤湧現,而且呢啲租盤又貼近市價,租客識揀都揀新樓住,到時佢層樓就好難租出,業主一諗到層樓有機會丟空蝕租,都好大機會肯平租俾你。

第三招:喪SELL自己優點

上述兩招係理性分析,如果業主都係企硬唔減,就要開始SELL自己係好租客,不斷強調自己從來唔拖租,間屋又企企理理,溫柔對待原屋傢俬,冇養貓冇養狗,有穩定職業,唔會得閒無事打搞佢等等,總之要畀佢知道「你是最好的」。

其實好多業主都好怕麻煩租客,只要你準時交租,以往冇乜添過麻煩,好多業主都樂意減少少畀你,費事冒招來麻煩租客的風險。

第四招:力數舊屋問題

SELL自己屬軟功,軟的唔得,就要開始用硬,就係力數層樓有乜問題。不過數還數,都唔好踩咁盡,太盡激嬲業主,鋤租不成仲要被趕走,真係喊到無謂。所以數時要同時講優點但又講缺點,例如:

「呢間屋雖然近地鐵,但人多車多空氣差;隔離鄰居成晚嘈住搞到無搞好訓,雪櫃洗衣機用左一陣就壞、水喉漏水……(下刪100字)不過你唔想麻煩業主,所以最後都自己搞掂啲麻煩事。」

業主知道自己間屋有缺點,大都會知難而退,減價畀你。

第五招:扮可憐博同情

如果個業主覺得自己間屋好PERFECT,仲係唔肯減,就要開始動之以情。話畀佢聽,今年市道唔好,人工冇加過,但柴米油鹽又貴左,車費永遠有加無減機制,屋企仲有老婆仔女要養,書簿費唔少,講到自己負擔有幾大,(拎定紙巾做道具)業主唔減會被人話不近人情,呢招絕呀。

第六招:以退為進

一哭二鬧都唔得,咁就唯有三上吊,話租唔起佢個單位,決定退租。好多業主因為唔想丟空單位蝕租,而且再搵過租客,又要再畀一個月佣,加上依家租金又真係跌緊,業主未必可以再以相同租金出租,所以好多業主真係會屈服係呢一招。

之不過,出到呢招的話,又要有心理準備業主真係會唔同你續租,所以呢招未到最後,都唔可以亂出。