我哋呢班90後   打一世工都買唔到樓

我哋呢班90後 打一世工都買唔到樓

文:Purple弟弟

身為香港嘅年青人,對我嚟講獅子山精神只係一個概念詞!上一輩人嘅刻苦耐勞,呢一代變成OT冇補水,升職冇你份;上一輩嘅靠雙手養起頭家,呢一代變成做到死都無屬於自己嘅窩居,人生只得返工同放工嘅我,可能叫大霧山精神比較貼切,睇唔到希望前路茫茫,搵唔到出路!

祖國有中國特色社會主義,而我地則有香港特色奴性思維,佢哋通常有以下特質:九唔搭八,邏輯混亂、接受程度冇下限、唔肯自己用腦。以下會為大家一一拆解案例!

特質一:九唔搭八,邏輯混亂
呢類人係逃避當解決事情嘅表表者,你同佢講後生仔好難買樓,佢會同你講月入9千都可以儲4千!你聽完嬲到不得了,先用行雲流水嘅粗口問候佢全家,再破口大罵「一個月儲到大半份糧就唔難買樓啦咩?」佢就會一句「咁你移民囉!」情況就好似你係學校籃球隊嘅一員,一路殺到入決賽,上半場完結落後緊十分,你問教練如何是好,下半場應該如何變陣應對,教練不疾不徐咁答你「打第二隊咪唔洗輸囉!」

特質二:接受程度冇下限

所謂接受程度冇下限,簡單啲講即係乜都接受到,而呢類人嘅口頭禪往往都係「係咁㗎啦!」
「Peter仔我哋上星期食呢間餐廳好似係40蚊一個飯,依家要成45蚊!」
「係咁㗎啦,你咪又要食!」
「係就係,但你唔覺得…….」
Peter仔打斷你:「香港地係咁㗎啦!」
呢類特質嘅人我深深懷疑佢哋以前讀書果陣冇學到「合理」呢兩個字!你同佢講任何唔合理嘅事都可以用一句「係咁㗎啦!」四兩撥千斤,令人聽落個問題好似唔係問題,唔合理瞬間變成合理!呢種被人侵害自己利益仲幫人講好說話嘅生物,相信係世間少有。

特質三:唔肯自己用腦

呢一類情況好少出現喺後生仔身上,通常係上咗年紀嘅會比較多!佢地睇乜就信乜,完全唔會自己求證,更加唔會去學習新事物,所以會認為一切新事物都係垃圾,無錯,佢係認為在座咁多位都係垃圾。
相信大家以前都有收過啲SMS,當然依家WHATSAPP為主,係叫你係限時之內轉傳俾幾多個人,否則你就會點點點,呢類人會二話不說照做,當你問佢「你覺得係真㗎咩?」就會馬上觸發到佢地啟動大腦答你「點會係真!哈哈!」當你滿懷安慰,發覺原來佢都係一個正常人之際,佢下一句就即刻破功「但寧可信其有啊嘛,我又冇蝕底!」

其實我係創世神,創世神近排手頭好緊,可唔可以借住啲錢比我先。咩話?你話我一定唔係創世神?咁你點證明我唔係先,寧可信其有啊,俾咗錢我保你全家平安啊。

講完一大論,遇著呢啲人可以點?我點知啊,因為我都係呢啲人!係咁㗎啦,完。