空姐面試攻略!唔係你想像中咁簡單Part2

空姐面試攻略!唔係你想像中咁簡單Part2

Jennifer空姐面試攻略 Part 2

上回Jennifer講到想做空姐就需要從send CV開始做好準備,phone interview同埋first interview要注意啲乜。今次會睇吓first interview之後會遇到嘅英文筆試同第一輪面試整個完整流程同注意事項,一齊睇吓Jennifer點講啦!

英文筆試:

通過咗first interview嗰208cm測試後就需要考一個英文筆試。

  • 筆試分為英文reading同英文listening兩個部分,英文reading係選擇題,大約需時兩個鐘。
  • 面試前一晚一定要早瞓,養足精神! 千祈唔好捱夜,因為需要極高集中力去考英文筆試。
  • 英文listening雖然難度唔高,但好長,加上英文listening嘅對話語速好慢,其實只要有聽就會岩。
  • 考完筆試之後大約等15-30分鐘左右,就要出返去會場,同埋有人嗌名,被嗌名嘅就要行出去,留返低嘅代表成功入到下一關。

第一輪面試:

*成功入選嘅應徵者會由工作人員帶去做Group Interview,Group Interview係主打! 過程中言行舉止要好謹慎,因為一旁嘅工作人員會一直監視。

*全程要保持優雅,唔好大聲笑同大聲喧嘩,切忌講粗口、態度差、鄙視眼神、黑面等。

*之後會入一間大房做Group Interview,大約有20-30人左右,而Group Interview都分為兩個部分,分別係小組討論同集體討論。

 

  • 小組討論

 

  • 考官會俾個主題你,幾個人一齊討論之後再報告,但考官主要唔係睇你內容有幾精彩,或者見解有幾獨到。
  • 考官主要想睇你嘅儀態、禮貌、品格、團隊精神。
  • 切忌搶嘢講、一個人講晒、一句嘢都唔講。
  • 考官只為踢走唔適合同唔需要嘅應徵者,而唔係為咗揀第一名,所以唔需要突出自己,只需做好自己同埋留機會俾其他人發言。

 

  • 集體討論

 

*完咗小組討論後就會做集體討論,即係20-30人圍繞住同一個題目進行討論。

  • 因時間緊迫,一方面唔可以搶嘢講,一方面又要睇準機會,把握黃金機會去爭取發言,講兩三句就夠,同埋絕對要簡潔。
  • 如果喺討論過程中有人同你同一時間出聲的話,當然一定要識讓俾人講先啦! 當大家互讓而又持續咗一段時間,咁你就要講自己嘅睇法。不過,當自己講到差唔多完結時,就要有禮貌地指向同你搶嘢講嘅應徵者,同佢講: 咁你又覺得點啊? 咁樣可以令考官對你留下好印象,因為你有考慮到同你搶嘢講嘅人感受,識俾返機會其他人發言,自然令考官覺得你okay啦!
  • 考官主要睇你嘅談吐、品格、個性去判斷你到底適唔適合做空姐或空少,而唔係演講比賽邊個講得最好。

完咗group interview之後就要返屋企等消息,快則一至兩日就會收到電話,慢則幾個禮拜。收到電話通知後就可以入Final Interview,而Final Interview多數係一對一嘅面試,又或者係有兩個考官。喺等消息呢段時間並唔係只有等待,而係需要準備到時Final Interview嘅題目,同練多幾次自己嘅談吐方式,唔順就講到順為止。

究竟好重要嘅Final Interview又要注意啲咩呢? 如果想知就記得留意Part 3喇!

重溫Part1 :send CV + First Interview