呢個係咩思想   細時唔讀書 大個做運輸

呢個係咩思想 細時唔讀書 大個做運輸

我有個親戚,佢經常以一種古怪嘅方法去教小朋友。

佢行街時會指住貨車司機講:「有冇聽過「細時唔讀書,大個做運輸」啊?你要俾心機讀書啊!全日揸車好慘㗎!」

又見過佢會一邊捂住小朋友個鼻,一邊指住掃垃圾嘅叔叔嬸嬸話:「嗱!記住俾心機讀書,如果唔係將來倒垃圾喇!」

呢種教育方式,我知道好多香港父母都用緊,包括我細個時,父母都係咁樣教我,就係指責其他人,去證明自己。

就算只係一間小小辦公室,已經有跡可尋。上司會扮晒不經意地話你知佢啲威水史。賺幾多錢,去邊度旅行,住幾星級酒店…

就好似以前讀書,拎高分嘅同學總係周圍問其他人考幾多分一樣。驚死人唔知佢住「堅離地」城…

職業無分貴賤,可以教小朋友將來要做一個好人,唔好做壞事。

現實少少,都可以直接話俾小朋友聽,呢個世界非常現實,你而家讀書學到嘅知識,將來有機會實際用到嘅只得10%。

但最諷刺嘅係,你嘅薪金同職位,有90%係取決於各種唔同嘅證書。求學不是求分數係啱嘅,因為求學是求張證書。

仲有一千種講法可以教導小朋友努力讀書,而唔係偏低某種職業,用嚟警戒小朋友。

試問呢個社會無咗清潔工人,條街會係咩樣?如果有機會,可以感受吓某啲國家例如美國、羅馬、巴黎等等…嘅地鐵,好多都有陣尿騷味,被畫滿塗鴉,滿地垃圾…

如果覺得做運輸工人剩係得蠻力又粗魯,不如諗吓住緊嘅屋,每日買嘅產品、晚餐嘅食材、一打開門就收到嘅淘寶…係由邊個運送過嚟?

無一種工作係低等,但人格就有高低之分。無論你賺到幾多錢,係集團老闆定係大明星,能夠尊重任何人,先係最重要。

我唔係一名父母,可能你覺得我無資格講以上嘅說話。但我作為仔女,好明白仔女嘅感受。或者大家可以試試另一種教育方式。少啲講「唔好/唔准咁咁咁」,多啲用「不如嘗試吓咁咁咁」。

作者為80後網絡作家,憑【我是技安,我出席了大雄的葬禮】網絡創作爆紅。
facebook專頁:https://www.facebook.com/BlueGodZi/