未做到呢7件事  點學人上車做業主

未做到呢7件事 點學人上車做業主

朋友:「睇你Blog話現在係時候可以上車喎。」
筆者:「梗係啦,跌咗咁多唔買,唔通等升返先買咩?」

朋友:「我都想上車呀?買咩好呀?」
筆者:「舊年就睇市區單幢,今年好多屋苑都殺咗落嚟。」
朋友:「唔怕繼續再跌咩?」
筆者:「首先我唔覺會跌得多,其次買樓總要有點冒險精神。」
朋友:「我冇乜經驗,要留意啲咩?」
筆者:「講三日三夜都講唔晒,不過你可以先考慮幾件事。」

文:1%Anthony

你係咪真係有自住需要?

如果真係有自住需要,以現時市況來說,供樓點都好過租樓,以市區一個300萬元上車盤為例,租樓住約10,000元,如果買,借盡90%,供盡30年,按息2.15%計算,每月供款連雜費約11,000元,當中有逾5,500元本金,實際要付出的成本不到5,500元。

況且現時樓價跌了很多,過幾年隨時賺埋升值。如果沒有自住需要,純為投資,目前也是好機會,不過買樓就要識得從投資角度去揀。

你有冇能力供樓?

好多所謂專家都嚇鬼,嚟緊加息週期,而家供得掂唔代表將來供得掂云云,如果跟正規矩,做足壓力測試,供樓應該都冇乜問題。況且睇美國個款,都唔會加得好多,未來三年都應該會低息,都唔知驚乜鬼。

最慘好多新樓盤提供的二按或包按,首三年就2.15厘,之後就用P即5.25厘,甚至更多,供款隨時多成倍,真係供到甩肺!如果買嚟收租就當然會輕鬆好多,因為租客幫你供。

你筆首期除咗買樓,有冇其他投資?

係咪一定要買樓?梗係唔係。如果你是炒股專家,筆者不反對你攞筆錢去炒股。但你真係專家先好,股票市場,尤其是目前個市咁難玩,十個散戶都唔知有冇一個贏,係咪有把握?

如果你是生意奇才,筆者不反對你攞筆錢去創業,但真係得先好。商業世界,一將功成萬骨枯,筆者大大話話做過十幾盤生意,都係輸多贏少。

你筆首期除咗買樓,有冇更想達成的目標?

做人唔一定要投資,更加唔一定要買樓,每個人都有自己的選擇,例如你想用呢筆錢去結婚,又或者去還遊世界,增廣見聞,青春無悔。

只要有好的計劃,Let’s Go!呢個世界冇所謂啱定錯,不過做決定之前,一定要明白得與失,得到一啲嘢,亦都會失去一啲嘢。俗語所謂,食得鹹魚抵得渴,到時你返到玩實捱世界的時候,身邊的朋友可能已經有幾層樓揸手,甚至財務自由,唔好埋怨就得。

經濟可能會轉差,你會唔會冇嘢做?

又聽見好多專家講,現時樓價係平好多,不過經濟都差咗好多,你份工穩唔穩陣先?萬一失業咁點先?收入會唔會受經濟拖累先?例如靠自由行的前線銷售同事,佣金少了很多。

雖然話經濟會差,但係都唔會差得好緊要,香港經濟基礎穩健,正所謂東家唔打打西家,最多人工平少少,你對自己的工作能力有冇信心?

你係咪可以承受升跌的壓力?

點解你咁驚輸?市場升升跌跌是平常事,尤其是現在額外印花稅(SSD)要鎖三年,三年裏總會有升的時候,亦會有跌的時候。

如果你揸住層樓,面對類似現時的情況,報紙雜誌專揀劈價、劈租新聞出來講,身邊的朋友都話樓價會跌到人仰馬翻,你可以承受壓力嗎?

你對樓有冇認識?識唔識得去買平嘢?

好多樂觀的業主說,我自住嘛,升跌關我咩事?其實買樓自住都可以賺錢,可以套現買多間,好多好多方法。

筆者的投資組合有十多個單位,住宅工商舖都有,其實都係靠最初兩間西環樓賺返嚟,如果買錯咗就冇機會,你有冇相關知識去買到筍盤?

作者為1%投資培訓的地產課程總監,著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等,其博客《第一桶金》總瀏覽量逾300萬人次,曾接受多間傳媒專訪及出任電台地產節目嘉賓主持,並擔任TVB節目「有樓萬事足」顧問。2000年科網股爆破,曾欠下近一年薪金卡數。經債務重組後,2004年股樓雙線出擊,短短四年由滿身卡數打工仔,變出六層樓。其後與投資兵團大舉出擊投資物業,並進軍商鋪、工廈市場,以穩健投資策略,成功變出雙位數物業。

facebook專頁:www.facebook.com/anthony.wealth

關鍵詞
經一專欄