一夜賺800萬 後生地產代理的啟發

一夜賺800萬 後生地產代理的啟發

年青朋友:「我都想做地產代理。」
筆者:「冇聽你講過嘅?想做邊區?」

年青朋友:「豪宅區,最貴嘅豪宅區。」
筆者:「你從冇接觸過,會唔會由細價樓做起,學吓嘢先呢?」
年青朋友:「唔好嘥時間啦,細價樓搵得幾多?」
筆者:「做得好,開單多,都搵唔少架。」
年青朋友:「每單得嗰幾萬蚊佣,左拆右拆隨時先得一、兩萬。」
筆者:「做多幾單,咁先會熟手,先會學到嘢架嘛!」
年青朋友:「咪嘥時間啦,你冇睇報紙嗰單新聞咩,新加坡有個新入行嘅小妹妹,賣咗個豪宅俾馬雲,一晚就賺咗800萬啦!就算一年做一單,都好過你做細價樓做100單啦!」

上星期網上瘋傳,一個剛剛入行的地產代理傳奇。

新加坡一位入行不足半年,年僅26歲的地產女經紀,以3億港元天價售出豪宅,獲得約862萬元的佣金,恨死好多年青人!

講到呢度,相信有些心術不正的網友,會話呢位女經紀係靠出賣色相。唔使懷疑啦!看看她的專訪就知道,應該唔係偶像派。至於係咪有啲有錢世叔伯照住,介紹好多有錢人俾佢識,就不得而知。

個個都爭住賺有錢人錢

女經紀的事跡,獲得公司高度表揚,正常不過。近日更登上新加坡《海峽時報》,名利雙收,成為年青人的榜樣。

身邊很多從事地產代理的朋友都有這個夢想,他們看不起地膽小舖,由取得代理牌照當日開始,就立志要到豪宅區。他們有強烈的信念,做一單大買賣,賺的錢多過做100單細價樓,就算每年做一單都無所謂,學唔學到嘢更加無需要考慮。

你而家嚟搵錢定學嘢呀?況且在豪宅區出入,西裝筆挺,人都靚仔啲、靚女啲,認識的都是有錢人,手指罅漏少少出嚟,已經夠你買樓買車。

其實唔單止地產代理,各行各業都是一樣,都要為有錢人服務。做餐廳的,希望做米芝蓮,就算得幾個客,每人做幾千元生意,總好過賣幾百個幾十元的快餐。做零售的,希望做土豪生意,一隻錶賣幾十萬元,總好過招呼街坊賣百貨。

近年又有很多銀行,逐漸關閉一般分行服務,改為甚麼尊貴理財中心,唔得閒招呼街坊叔伯。就連超級市場都重新包裝,細個淨係識惠康、百佳,知道買平嘢就要去超市,而家City Super、Taste等百花齊放,已經唔係講平。

金錢掛帥 難以改變

兒時社會經濟條件差,很多商戶都會以薄利多銷作為經營方針。到了今時今日,已經很少商戶再行呢套,諗起都覺得幾悲哀。

不過,悲哀還悲哀,改變不了世界。這個世界就是以金錢掛帥,幾十年默默耕耘為街坊服務的代理無人提,一夜賺800萬元佣金的就成為偶像。努力工作尋找理想的無人讚,啱啱讀完書就話要全職炒股,眨吓眼就話賺幾百萬元的受眾人仰慕,真唔真?另作別話。

今時今日香港還多了一個成功標準,就是有「冇樓」。日前有機構做了一個調查,說很多年青人「對置業感到絕望」,買不到樓會令他們感到「徬徨無助」,很多專家學者勸說年青人睇開啲,人生唔止錢、樓云云。講就當然英勇,但係社會唔會因為你講幾句就改變價值觀,行出門口仍然要接受指指點點,冇辦法,香港就係咁,所以必須要有資產、有財富、有物業。

作者為1%投資培訓的地產課程總監,著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等,其博客《第一桶金》總瀏覽量逾300萬人次,曾接受多間傳媒專訪及出任電台地產節目嘉賓主持,並擔任TVB節目「有樓萬事足」顧問。2000年科網股爆破,曾欠下近一年薪金卡數。經債務重組後,2004年股樓雙線出擊,短短四年由滿身卡數打工仔,變出六層樓。其後與投資兵團大舉出擊投資物業,並進軍商鋪、工廈市場,以穩健投資策略,成功變出雙位數物業。

facebook專頁:www.facebook.com/anthony.wealth