由實習護理做起 90後少女儲經驗做護士

由實習護理做起 90後少女儲經驗做護士

健康護理行業不僅要有專業知識,也要具備良好的溝通技巧,面對不同突發情況要應付自如。剛投身健康護理行業的Katrina表示,只要有熱誠便會有動力應付大大小小的挑戰。

現時一邊修讀職業訓練局的醫務中心營運高級文憑課程;一邊任職實習護理員的Katrina指,本身對護理行業感興趣,希望可以讀書的同時累積經驗,未來成為護士。

理論和實踐同步進行

「學校有提供一個叫『Earn & Learn』計劃,一星期只有一日上課,其他日子作為醫務所正式員工上班,可以理論和實踐同步進行,亦可以看看自己是否真正適合護理行業。」她說。

作為一個實習護理員,Katrina的工作是要為醫務所打點各種大小事務,她會到不同部門學習超聲波、跑步心電圖、身體檢查等。讀中學時,她已接觸相關資訊,對護士工作充滿憧憬。

對護士工作很好奇

「以前只有生病了才在醫院見到護士,一般人接觸護士的機會並不多,更別說了解護士工作。

「雖然我爸爸是護士,我對相關工作亦有一定了解,但對具體工作和環境仍然所知甚少,所以很好奇。」她說。

Katrina很享受現時的工作,笑言實習的最大挑戰,是返工時的車程,因自己住在上水,而醫務所在金鐘。

搞清求診者需要

「好彩有同事跟我住得一樣遠,我們可一起返工及放工。醫務所也有年紀相若的同事,所以很快便能適應工作,而且我很享受現在的工作。」

新手應多方面嘗試 工作中亦會發生不少趣事,Katrina曾收到病人的查詢電話,對方希望預約會診,但當問及要預約哪一科時,對方竟回答:「是旦啦」,令她哭笑不得,這事件正正體現出護理員的重要性。

「不是每一個求診的病人都清楚醫療分科,甚至不知道自己身體的問題出在哪裏,很多時只知道大概。

「我們的其中一個責任,是要搞清楚求診者的需要,再安排到合適的部門就診,有時間更要用英語跟求診者溝通。」她解釋。

邊讀書邊工作

由於Katrina的爸爸也是一名護士,當知悉女兒有意投身護理行業,即「舉腳贊成」。

「當時知道VTC有個邊讀書邊工作的計劃,而且人工可以完全補貼學費,我向他問意見時,他反問我為何不作一試,家人對我都很支持。」Katrina說。

展望未來發展,Katrina希望邊工作邊吸取經驗,完成課程後繼續進修,成為一名護士。

她認為自己入行不久,尚有很多事情需要學習。她寄語有志入行的年輕人,須有耐性和良好的溝通技巧。

人口老化護理需求增

香港專業教育學院(IVE)應用科學高級講師劉婉清表示,香港的人口持續老化,對護理行業的需求只會有增無減,由於是專業科目,因此有相對較高的入行門檻。

「入行一定要修讀認可的課程,完成高級文憑或學位課程後, 再按自己的意願決定要否報讀護士學校。

一般來說,修讀護理行業的學生是不愁沒有出路,因為市場一直缺人。」 劉婉清補充,學生在修讀課程同時到醫務所實習,令他們可將學校所學的跟實際運作結合,除可了解醫務所的工作環境外,更重要的是為未來入職「打底」,因實習計劃是以正式員工的標準去制定。

護士起薪點$28,000至$30,000

「另一樣同學們要考慮的是,在實習過程中,了解自己是否對護理行業有興趣,如果有的話,便應該繼續進修;亦曾經有同學發現自已興趣不大,便轉移到其他醫療相關的方面發展,例如救護員。」

至於待遇方面,劉婉清表示,對比其他行業,護士的起薪點較高,月薪介乎$28,000至$30,000。

Katrina一腔熱誠想入醫護行業,令人欣賞。不過,其實做醫護人員實在不容易,以下一位護士的心聲,箇中辛酸自己才知道。

體諒白衣天使4個辛酸

適逢流感高峰期,公立醫院求診人數爆晒煲之餘,亦到咗媒體大爆醫療事故事件嘅季節。

市民成日俾人將換錯心、開錯腦、斷錯症、醫錯人嘅資訊硬生生塞入個腦度,作為醫護人員,想你哋停一停、聽吓我哋氣弱浮絲嘅解釋。

你唔一定要原諒,但我懇求你哋加一分體諒。

一 流失率有增無減

我哋睇返啲數字,公立醫院護士2015-2016年度流失率創三年新高見5.2%,其中港島東醫院聯網嘅流失率仲高達6.5%,高處未算高,威爾斯嘅內科護士流失率仲達到9.3%添。

做呢行嘅大家都明,有番幾年年資、份人現實少少都唔會想喺度捱騾仔啦係咪?但係走咗咁多人,又唔係即刻請返咁多人,甚至側側膊cut人,我哋嘅工時同工作壓力都直線上升,而補假仍然無時間放。如果醫護嘅工作壓力係一隻股票,呢隻股實令無數人發達上車。

二 年資淺醫護比例增

上面講到流失率高,入嚟替工嘅只有fresh grad,年資淺自然無咁幫得手,呢個我哋個個都經歷過,當然唔會怪新丁,但變相請咗人都唔會幫輕到我哋好多,嗰種辛苦同崩潰真係非筆墨所能形容。

仲要我哋班比較年資深嘅,要做自己嘅海量工作之餘,又要湊住班細,又要幫手帶住成team人,唔係個個multi-tasking都仲係可以做到樣樣perfect,更何況近年嘅病人同家屬都mean咗好多。

三 護士「出身地」多元化

醫護人員係相當講求合作性嘅工作,但近年多咗好多唔同嘅護士學校,大家在學時嘅模式都可能有些微分別。對於醫護人員嚟講,差少少就係差少少,嗰少少都需要我哋之間花多一啲時間去培養大家之間嘅默契,而我哋成日都忙到甩晒轆,同事流失率又高,每個醫護成日都要part唔同人,又要重新適應,無人可以否認呢種制度令到出錯嘅風險增加。

四 出小錯都會被無限放大嚟講

唔係每一單醫療事故都100%可以避免,但每一單涉嫌係醫療事故嘅事件都會被放大好多倍討論,引致近年病人同家屬乜都嗌特敏福嘅現象。

有啲主流意見一邊承認醫護人手嚴重唔夠,一邊又怪責醫護無責任心無道德,只輕描淡寫帶過醫管局嘅管治責任先係問題根源,我想問吓講呢番話嘅人到底係咩居心去抹黑醫護嘅專業形象?

唔想做社會箭靶

我哋個個都過五關斬六將先就位,如果真係咁無責任心又無道德就一早走咗去搵藥廠工啦,你咁講一講,你知唔知對我哋醫護人員有幾大嘅心理傷害?我哋嘅士氣會有幾低落?

其實大家可唔可以,喺有醫療事故時,唔好淨係質疑我哋嘅專業,對準少少cut budget嗰班、同埋我哋管理層整出嚟嘅呢一套制度?我哋受靶受到好攰,唔好做管理層嘅祭品之餘,仲要做埋社會嘅箭靶。