我搭的士 只為了見重要的人

我搭的士 只為了見重要的人

接咗支由郵輪碼頭附近去太古城嘅網約訂單,拿拿聲冚住旗,無視沿途絕望嘅工友,直衝上車地點。點知就到目的地時,打俾乘客已經無人聽電話,再打多次直飛遺言信箱之後,決定放棄,去碼頭附近嘅洗手間解放兼洗面冷靜一下。

文:白告(我的你的紅的

洗完面就出返黎做生意,去到轉角,一個工友跑住出黎截車,九成都係去九龍灣地鐵站,既然命運安排相遇上,就俾佢上車啦。

一上車一陣汗臭撲鼻而來,下意識皺一皺眉,不斷提醒返自己呢陣係辛勤嘅味道,呢陣味係建造每一個偉大建築物嘅必然味道。

語氣粗豪但不失禮貌:「師傅唔該,去大圍新翠。」竟然唔係去附近地鐵站,睇黎我有需要修改下自己嘅數據。

「師傅,拍硬檔趕時間,儘快下。」一開車,工友已經講,我亦都誠實咁答佢:「老老實實,六點幾呢個時間點都塞車,我儘快啦。」

「無問題就返你,你同我儘快就得喇。」工友亦都好明白,可能成日被強人所難嘅人,先唔會強人所難。呢個時間多數趕嘅都係約食飯,就算真係遲,嚴重性都無返工遲到咁嚴重嘅,如果佢去某啲大塞車嘅目的地,我可能會建議佢轉地鐵,但去大圍都無咩方法比的士更快,如工友所言,盡力啦。

「約咗人幾點食飯呀?」我問工友。「你又知我約咗人食飯?無約實幾點呀,遲就實遲,儘快去囉。」

「多數都係約咗朋友先會咁又趕又唔係幾趕啫。」我懶有智慧咁講,結果估錯了。

「唔係呀,我約咗個女食生日蛋糕,都好趕㗎,食完蛋糕就到佢返工喇。」工友嗰種焦急嘅心情,自然而然咁又流露出黎,我亦都盡力踩油門幫幫手。

「阿女返夜班呀?咁你地咪好少見?」「佢做空姐㗎,梗係少見面啦,所以今日佢生日我一定要趕返去見佢㗎,如果唔係點會搭的士丫,咁貴。」

等我仲諗住游說佢叫阿女搭的士返工,睇黎成功機會不大。「咁你唔攞一日假?」

就我所知,地盤真係最易放假嘅工作黎,同揸的士差唔多,等我仲諗住問得好合理,點知離晒地,好彩工友嘅答案將我拉返落地:

「攞假?得,咁咪無錢囉,返少一日就一日,你估日日有工返咩,有得返我就返㗎喇。」

同工友傾返,先知地盤嘅收入係唔錯,但係一旦無工開上黎,隨時放長假,呢個工友自從試過成年無工開之後,就有工必開。

「喂,我就到喇,開飯啦。」工友打電話講完,就讚我手車快:「師傅你都幾後生喎,手車又快,唔該你下。」

竟然唔係想要折?難得難得。「正常啫,你幸運呀,今日唔算塞車,我仲以為你想要折添。」

「點會,我哋呢啲血汗錢黎,大家搵食都辛苦。」找完錢之後就分道揚鑣,我補多句:「喂,咁生日快樂呀,阿女定你生日快樂?」

「我同佢同一日生日㗎,多謝多謝,貴都抵呀,BYE。」

我默默袋返好張五百蚊紙,即日現金出糧真係幾好。

百幾蚊的士錢貴唔貴真係見仁見智,好似工友咁嘅情況,一係放一日假賺少一日錢但係對個女耐啲,一係好似咁照返工但飛的返屋企,賺少百幾見耐少少,都算係折衷嘅做法,無論代價係多定少,喺香港連享受天倫之樂,都要代價,唉。

相關文章:

今年有機會升職嗎? 15條問題小測試

我搭的士 只為了見重要的人

人生第一次戴上面具 就是上班的時候

我搭的士 只為了見重要的人