4類騎呢同事 你有冇遇過

4類騎呢同事 你有冇遇過

當我轉咗好多份工之後,仲發現到一樣野,就係每一個辦公室都擁有一群相約行為怪異嘅同事…情況就彷如象棋都一定有兩隻炮兩隻車。

人生必然經歷過不斷轉唔同工種,不斷轉公司。但若干年後,你覺得塵世間已無嘢值得留戀,於是你放棄尋尋覓覓,留喺一間公司奴役終老…

因為你覺悟到,無論轉幾多份工,你始終都唔會鍾意返工。

喺你腦海入面,共同為目標奮鬥,上下一心去解決問題,努力付出係有回報嘅公司,只係一個現實唔存在嘅烏托邦…

而每一間公司,除咗有個老闆之外,對落總係有一班「好同事」維持辦公室地獄生態。

一) 『你老母係咩時辰生你出黎?』

老實講!真係有同事問過我呢個問題…呢類同事對你嘅年齡、住址、家事、私事,甚至乎星座都極濃厚興趣,由你入職開始,就好似查家宅咁「住邊頭啊?幾歲?搭咩車返工?有冇女朋友?」簡直煩過你老母。

然而,你永遠無法猜度佢知黎做乜,因為佢可能連自己都唔知問黎有乜用,但佢就總係不停打聽你嘅私人生活,然後作出評價,或者留返食飯Dead air時扔出黎作為話題。

二) 『一齊聽接駁鈴聲』

工作上同其他公司溝通就少不免,尤其係大公司,撳幾十個制,等一輪都未駁到真人聽電話。而有一種同事,就好似要話畀全世界人聽。

佢打緊電話咁,開到speaker好似HiFi咁,佢自己就行到老遠部影印機print野,難為坐佢隔離嘅同事就一直被噪音騷擾,普通鈴聲都算數,最煩嘅就係對方電話有接駁鈴聲。

三)『影印機洗牌法』

我明白撳完個Print制嗰種心急嘅心情,亦明白見到影印機出極都唔係自己野嗰種無奈。

但有啲野唔屬於你就唔屬於你,點急都無用。當你順序咁print一大疊開會用嘅文件出黎,當然係想順返次序拎埋位。

但呢位性急同事就幫你幾張幾張抽出黎,又唔排返次序,到最後你就好似玩襟棉胎輸咗咁,將一疊亂晒次序嘅文件疊齊返埋位重新排好次序。

而最令人氣憤嘅係,佢仲用一副怪責嘅口吻同你講:「下次Print咁多張出聲嘛…」

四)『洗碗定煲粥啊請問?』

每當飯後時間,Pentry一定堆滿同事,有人要斟水,有人要洗飯盒,有人等埋魂魄返齊肉身先繼續工作。

總有一部分同事,好鍾意喺Pentry傾計,一傾就無停口,最幣係佢一邊洗飯盒一路傾,或者企喺個斟水機面前傾。

喂大佬啊!你哋同公司,咁多話題咪放工傾飽佢囉!我想飲啖水啫!最慘係,當你行埋去講聲「唔該借借」嘅時候,佢哋就會驚死你偷聽佢講嘢咁,即時靜晒,等你行開咗先繼續傾,咁神秘入廁所傾啦不如。

公司係一個大家庭,但同事唔可以好似兄弟姊妹咁對待,唔可以隨便出聲,但呢種「少少事」每一刻都不斷累積,就會變成你壓力嘅最大來源。

關鍵詞
同事職場