我們的「大時代」呢?

我們的「大時代」呢?

朋友:「青衣發現沙士喎!」
筆者:「仲諗住去珀麗灣游水添,咁唔去青衣搭Shuttle啦!」

朋友:「我唔係講呢啲!」
筆者:「咁係想講咩呢?」
朋友:「不如去盈翠半島嗰邊睇樓囉,可能青衣樓會大跌!」
筆者:「咪癲啦!」
朋友:「咩唧?!當年淘大花園都跌到60萬啦!」
筆者:「你估當年60萬賣咗層樓嘅業主,後悔咗幾耐呢?」
朋友:「咁又係,俾我係業主,就算真係有沙士,都唔會賤賣!」
筆者:「俾我係業主,寧願死响間屋入面,都唔會賤賣!」
朋友:「幾時先有機會大跌?」
筆者:「咁多政策扭曲市場,有生之年都未必見到!」
朋友:「咁我幾時先有機會大翻身?」
筆者:「政府做咁多嘢,都係驚泡沫爆破,驚散戶輸到破產啫!」

朋友:「其實輸有乜咁可怕?最可怕係冇機會贏!」
筆者:「呢句好有智慧!飲茶…」

筆者寫稿之時,正是「大時代」播放大結局的時候。一邊煲劇,一邊寫稿,看着劉青雲與秋官的生死鬥,非常感慨!投資市場,本來就應該這樣,大起大落!

朋友問:「甚麼時候會出現大跌市?」
師傅教落:「要你亡,必先要你瘋狂!」

如果一個市場沒有瘋狂,又怎會出現大跌呢?樓市亦曾經歷大時代,今天在Facebook上,有朋友分享2003年的報導,當時鰂魚涌南豐新邨只賣80萬元,沙田第一城賣60萬元,當年把握機會上車的朋友,很多都已經有幾層樓收租,發晒達!筆者身邊有幾位前輩,就係靠當年的大時代,成為億萬富翁,這就是時勢做英雄!

政策令樓市乾升

然而,政府卻很照顧我們,擔心散戶過度亢奮,將來泡沫爆破承受不了,不斷出招,唔俾買,又唔俾賣,最後令到市場供應枯竭,樓價不斷乾升。又擔心銀行壞賬太多,衝擊金融體系,不斷設置關卡,阻撓小市民借按揭,令資金瘋狂湧入細價樓市場,年青人借唔到錢,上車無門!

以往,該升的時候會升,該跌的時候就跌,例如2007年股市暢旺,樓價同步搶升,2008金融海嘯,樓價急跌三成,有大起大跌,有人贏,有人輸,就有機會。

自從政府出招,極力遏止泡沫出現,市場就只有升,沒有跌!有好幾次外圍出現震盪,例如歐債危機、日本地震、佔中爆發等,如果是以前,樓價早就下跌兩、三成!

是的,大起大落的市場,部分太進取的投資者會輸大錢,甚至輸身家,然而,部分看準機會的年青人可以一舖翻身,就像劉青雲與秋官一樣,財富大轉移。

輸不可怕 沒有機會贏才可怕

可惜,政府實在太寵我們了,怕我們受傷害,不斷出招。很多年青人非常無奈,買又買唔到,借又借唔到,最慘仲係,想等都等唔到!咁多政策護航,無供應,借貸又少,隨時等到退休都等唔到大跌,可以點做?

各位可能很奇怪,筆者持有不少物業,為甚麼不想樓價闖高?朋友說得對,其實輸不可怕,沒有機會贏才最可怕。

政府的政策,令泡沫爆破的機會大大減少,市場更趨穩定。但這是好事嗎?在穩定的市場,富有的,繼續富有,最近甚至很多父母幫子女買樓,出現跨代富有;貧窮的,繼續貧窮。

相反減少干預,讓市場有起有跌,有瘋狂、有爆破,年青人才有翻身機會。

我們的大時代呢?我們的大奇蹟日呢?