老豆唔識英文  點都要阿仔讀國際學校

老豆唔識英文 點都要阿仔讀國際學校

今日去茶記食Lunch時,發生咗一件好反映到香港現況,但其實諗深一層好悲哀嘅事。

 

話說,當我等緊我份火腿蛋通粉時,路邊有架貨Van停低,負責揸車嘅係老豆,後座係菲律賓姐姐同一個著小學校服嘅小朋友。

文:藍橘子

 

三個人入到茶記,坐喺我旁邊。老豆好認真咁睇餐牌,個仔專注玩緊iPad。老豆研究咗一輪,佢唔係直接問個仔想問乜,而係拎個手機出嚟,對住電話講:

 

「你、想、食、飯、or、食、麵?」

 

然後佢將個電話擺喺個仔面前,撳一下制,電話播返英文出嚟。

 

但個仔無反應,繼續玩iPad。老豆又播多次,今次向住菲律賓姐姐播。佢點一點頭,就不斷用英文問個小朋友想食乜。

 

小朋友話想食意粉,老豆就叫咗一個湯意粉同埋焗意粉。兩樣嘢食嚟齊晒再畀小朋友揀,睇佢鍾意食乜。

 

最後,小朋友揀咗焗意粉。原來個老豆唔識講英文,但小朋友又只係識講英文…老豆費事煩就兩款叫晒。

 

小朋友開心食緊嘅途中,老豆同個仔講:「今日學彈琴開唔開心啊?返屋企彈畀老豆聽好無?」

 

但個小朋友完全無反應,老豆唯有再用同樣方法,用手機翻譯畀菲律賓姐姐,再由佢問個小朋友。

 

唔知咩原因,小朋友只會同菲律賓姐姐溝通,而唔同老豆講嘢。但又好難怪個小朋友,唔通每次溝通都要靠手機傳話?

 

「今日學彈琴開唔開心啊?返屋企彈畀老豆聽好無?」呢句咁關愛嘅父子對話,只能化成毫無感情嘅「piano、happy?」

 

睇到呢度,可能有人會話個老豆抵死,明知自己唔識英文,硬要送個仔入國際學校讀書,搞到同個仔零交流。

 

其實…有邊個老豆唔想望子成龍?我相信佢要供養個仔都好辛苦,唔識英文並唔係佢嘅錯。

 

點解香港個社會,只要讀唔成書就死路一條? 市民想應付最基本「衣、食、住、行」就需要大學學歷月入三萬。

 

老闆永遠睇學歷而唔係睇能力,老師覺得讀唔成書嘅就係廢柴,政府對音樂、創意、運動發展完全唔重視……

 

各種原因逼使之下,就形成呢對父子嘅家庭出嚟。

 

呢種畸形觀念唔單止老闆、老師、腦殘高官先係咁諗,其實好多網民都一樣係咁諗。

 

我寫小說,做創作…都被恥笑好多次「哈哈!你都讀唔成書,學咩人出書?」

 

如果連大家嘅觀念都唔改變,呢個社會又點能夠改變呢?

藍橘子為80後網絡作家,憑【我是技安,我出席了大雄的葬禮】網絡創作爆紅。

facebook專頁:https://www.facebook.com/BlueGodZi/

相關文章:

為何香港人會咁燥? 因為大家都是刺猬

老豆唔識英文  點都要阿仔讀國際學校

完成工作唔代表準時收工 因為老闆覺得咁樣唔勤力

老豆唔識英文  點都要阿仔讀國際學校