起薪$13,000冇大躍進 加人工生活亦如是

起薪$13,000冇大躍進 加人工生活亦如是

文:Purple弟弟
筆者同好多後生仔一樣,一畢業又唔係專科出身,亦都唔係討論區嗰啲傑青,第一份工就30k起跳,當年第一份工只係得$13,000,我諗都可以叫做比上不足比下有餘咁。

當時人工分配情況大致如下:
強積金-$650
車費+飯錢-$3,000
家用-$5,000
拍拖-$1,000

每月大約都儲到三千蚊左右,不過生活方面就有啲行屍走肉!返工放工瞓覺,六日拍拖又諗唔到有乜做,樣樣都係錢,就算行山,都需要食飯搭車買支水都最少用百幾蚊。有時都好對唔住女朋友,活動嚟嚟去去都係嗰幾樣,我都覺得好悶。

起初我認為呢種行屍走肉嘅生活只因我冇錢,後來我加咗人工,我發現我錯了。事實係因為我冇好多錢!一年後我由$13,000加人工到$16,000,多咗呢三千蚊到底為我生活上帶嚟咩大改變?係完全冇,不過錢冇人嫌多,而我依然係行屍走肉。

你可能會問,多咗三千點會無改變,可以買到機票旅行啦最少!

係,但本身我月儲三千,要去旅行都做到,問題係假期同旅伴方唔方便;

儲錢儲多咗,投資都賺多啲!

係,但投資要滾大個本先見到顯注成效,雖然股票可能每年多千幾甚至幾千帳面上盈利,但距離置業,依然係遙不可及。

咁最後,你可能會話食好啲得啦掛!

係,我唔係冇試過,但真係要花好多心思去搵,如果唔係食貴嘢有時仲差過食平嘢!香港地貴租,高級餐級個「高級」,好多時係指個地段同裝修,食物質素有時差到嚇你一跳,比到貴一貴食垃圾仲傷心過我平嘢但味道一般。

最後呢三千蚊只係令我多咗儲蓄同投資,偶爾買吓心頭好獎勵自己之外,其實都依然係一個行屍走肉。話唔定,想真正改善生活質素係要賺超多錢或者改變自己心態,前者我做唔到,我惟有改變心態去學識知足常樂,再唔係搬出「比下有餘」呢個無敵概念,令自己開心啲啦……