護士們多謝你!壓力爆煲 護協報章刊聲明

護士們多謝你!壓力爆煲 護協報章刊聲明

文:浩德

臨近新年,加上正值冬季流感高峰期,衛生防護中心公布再增3宗兒童流感個案,當中更有死亡個案,無論公立或是私家醫院都爆滿病人。求診者固然辛苦,同樣受壓力的還有一班「密密做」的醫護人員!

「護協」批評政府「加床不加人」

香港護士協會昨日(25/01/2018)就在報章刊登全版聲明,指政府一直利用護士專業奉獻的精神,藉此於公立醫院「加床不加人」,完全罔顧護士工作壓力,因人手短缺亦等同剝削病人獲得專業護理服務及照顧的權利,「護協」表示極度無奈、失望及不滿。

「護協」表示,現時流感高峰期間,公立醫院病床佔用率高達128%,有85%病房沒有增加額外人手,護士人手嚴重不足的情況更顯嚴重,大大加重了前線護士的工作量,令他們疲於奔命。

其實醫護人員都係人,同大家一樣都係打份工。你唔一定要原諒,但有時可以加一分體諒。不妨花少少時間睇下以下呢個白衣天使嘅自白:

一 流失率有增無減

我哋睇返啲數字,公立醫院護士2015-2016年度流失率創三年新高見5.2%,其中港島東醫院聯網嘅流失率仲高達6.5%,高處未算高,威爾斯嘅內科護士流失率仲達到9.3%添。

做呢行嘅大家都明,有番幾年年資、份人現實少少都唔會想喺度捱騾仔啦係咪?但係走咗咁多人,又唔係即刻請返咁多人,甚至側側膊cut人,我哋嘅工時同工作壓力都直線上升,而補假仍然無時間放。如果醫護嘅工作壓力係一隻股票,呢隻股實令無數人發達上車。

二 年資淺醫護比例增

上面講到流失率高,入嚟替工嘅只有fresh grad,年資淺自然無咁幫得手,呢個我哋個個都經歷過,當然唔會怪新丁,但變相請咗人都唔會幫輕到我哋好多,嗰種辛苦同崩潰真係非筆墨所能形容。

仲要我哋班比較年資深嘅,要做自己嘅海量工作之餘,又要湊住班細,又要幫手帶住成team人,唔係個個multi-tasking都仲係可以做到樣樣perfect,更何況近年嘅病人同家屬都mean咗好多。

三 護士「出身地」多元化

醫護人員係相當講求合作性嘅工作,但近年多咗好多唔同嘅護士學校,大家在學時嘅模式都可能有些微分別。對於醫護人員嚟講,差少少就係差少少,嗰少少都需要我哋之間花多一啲時間去培養大家之間嘅默契,而我哋成日都忙到甩晒轆,同事流失率又高,每個醫護成日都要part唔同人,又要重新適應,無人可以否認呢種制度令到出錯嘅風險增加。

四 出小錯都會被無限放大嚟講

唔係每一單醫療事故都100%可以避免,但每一單涉嫌係醫療事故嘅事件都會被放大好多倍討論,引致近年病人同家屬乜都嗌特敏福嘅現象。

有啲主流意見一邊承認醫護人手嚴重唔夠,一邊又怪責醫護無責任心無道德,只輕描淡寫帶過醫管局嘅管治責任先係問題根源,我想問吓講呢番話嘅人到底係咩居心去抹黑醫護嘅專業形象?我哋個個都過五關斬六將先就位,如果真係咁無責任心又無道德就一早走咗去搵藥廠工啦,你咁講一講,你知唔知對我哋醫護人員有幾大嘅心理傷害?我哋嘅士氣會有幾低落?

其實大家可唔可以,喺有醫療事故時,唔好淨係質疑我哋嘅專業,對準少少cut budget嗰班、同埋我哋管理層整出嚟嘅呢一套制度?我哋受靶受到好攰,唔好做管理層嘅祭品之餘,仲要做埋社會嘅箭靶。