的士司機職場事 捐血血液無分貴賤

的士司機職場事 捐血血液無分貴賤

捐血血液無分貴賤,且看的士司機今次又遇著怎麼樣的乘客。

即落即上嘅方式,從來都係備受歡迎。今次喺沙田蔚景園落完客,調頭臨出路口前,就有一個年輕男子——睇落年紀同我自己差唔多,姑且定論為年輕人——上車去頌安邨。從佢上車嘅位置、目的地,同輕鬆嘅神情,都表明佢係放咗工,所以我嘅開場白都係近乎千篇一律嘅問候:「放工拿?好早喎。」

文: 白告 (我的你的紅的)

攞咗半日假去捐血

略帶疲倦嘅聲音回答:「哦,攞咗半日假去捐血,搞掂咪早啲返屋企囉。」

將捐血同假期放埋一齊,可能係香港嘅獨特生態,仲要相當稀有,唔可以放過了解嘅機會:「嘩,咁你都幾有心,你啲血好少見㗎?」據我所知,有啲罕見血型嘅人,仲有專人打電話溫馨提示又夠鐘捐血喇。

「普通血型啫,咁啱要清假,平時又夜放又唔得閒去,咪去下囉。」男乘客嘅答案,透露出佢真係善心人士,令我由衷咁稱讚佢:「你真係好有心,要我咁凍時去捐血,真係唔容易。」點知,佢嘅回應令人出乎意料之外。

一直講嘢有氣無力嘅男乘客,忽然語帶興奮咁講:「我梗係有心啦,有心到紅十字唔俾我捐,我都要捐。」唔俾捐又捐仲要捐到?即係唔係血糖、血色素唔夠啦。「唔俾你捐?點會唔俾捐?」我心中雖然有答案,不過都係等乘客自己講好啲。

「我鍾意男人嘅,咁咪無得捐囉。」男乘客講出預期嘅答案。「鍾意就唔捐得?」「唔係,佢話男人有同男人搞就唔捐得。」「咁都理解嘅,紅十字好似有宗教背景嘛。」其實我都唔知係唔係,感覺上大部分慈善機構都有背景。

「佢真係開宗明義攞宗教理由黎REJECT我哋都算,佢哋話男人同男人搞有性病機會高啲,唔俾我哋捐就好反感囉。」唔知係咪心理作用,知道乘客係男同性戀者之後,硬係覺得佢講嘢啲尾音好女性化。

「咁男人同男人搞,有性病風險好似真係高啲。」又係我唔知實情嘅猜測。「邊個話,你知唔知一年有性病嘅異性戀比率有幾高⋯⋯」一連串嘅數字,我完全記唔住,總括黎講就係異性戀有性病嘅比率比同性戀高,相信佢經常同人辯論呢個話題,先至可以講得咁流暢。

「唔理高定低啦,紅十字會將啲血輸俾人之前,應該有CHECK過有無問題掛。」我講。記得以前讀書第一次捐血,同同學吹過水講捐血目的,除咗走堂同驗血型之外,仲可以CHECK下有無愛滋。「梗係有啦,如果佢話無,仲有邊個夠膽輸血。」男乘客大膽推斷。

「如果咁講,咁我理得性病風險高低丫,有性行為就有風險㗎啦,唔通我唔係處就唔應該捐血?」我反問返男乘客。

「你講得無錯,所以我咪特登照捐,理得佢。如果我唔捐得,你都唔應該捐。」兜兜轉轉,又返返去原始話題。

「點都好,你有捐,最後有人受血,都係幫咗人丫。」我見就到目的地,預備結束話題,男乘客嘅腎上腺素好似都回落返:「唉,我都係想幫人啫,又無病,點解唔幫得?」

又氣無力嘅反問句,喺乘客落車後繼續迴盪喺我心中。血庫要排除性病可能係理所當然,但係用捐血者自願填寫嘅問卷明顯唔係有效嘅排除方法,照邏輯推斷,紅十字會驗血應該都唔係除機抽黎驗。比較性濫交嘅異性戀定安全搞嘢嘅同性戀者血液安全度並無意義,因為要輸血俾人,包血應該係百分百安全,理得你鍾意男定女。

延伸閱讀:

勉勵20歲30歲年青人 7句說話終生受用

至冧情人節禮物 13個平價過情人節的方法