別人的成功非僥倖 只有努力過的人才明白 | 藍橘子

別人的成功非僥倖 只有努力過的人才明白 | 藍橘子

【別人的成功非僥倖】人愈大,愈唔會發起做一件事 !

因為你知道,就算俾你排除萬難、石破天驚咁開到個頭,結果都會同紫霞一樣,估到個開頭,但係估唔到個結尾,俾牛魔王兜心口插一野。

文:藍橘子

青春無悔盡力做好

由滿腔熱誠到失落無奈,這感覺大概你都遭遇過。

每件事開始,都係始於一個由香港人退化成戇居仔,突然身懷熱血,喺一個難得既聚會,無端端九唔搭八咁講句「不如我地乜乜乜囉!」

乜乜乜範圍可以好廣闊,想做運動既,或者會搞隊波、約下行下山、游下水;

玩樂型既可能會搞個旅行、學下新技能;

事業型就通常會提議搞start up、開間online store或者寫個app;

創意人士想整個page、拍下片、夾隊band亦都少不免,

總之無論你想做乜都好,一定係一啲你一直好想做,又無時間做,同工作又無乜關既野。

然後當戇居仔一聲令下,果班生活喺社會壓抑,工作勞累、生命無奈同命運輪迴底下既奴隸,就會突然好似見到流星咁,第一時間覆句「好喎!」「行得啦!」「GoGoGo!」,然後大家會以迅雷不及掩耳既速度即晚開翻個group,不斷瘋狂開心分享自己諗左幾十年既idea,你沖個涼已經有一千六百八十四個unread message,猶如當年初戀織果條頸巾咁熱心,最重要,係無限幻想成功左之後點樣飛黃騰達、出人頭地、萬人景仰、集資上市….

下一步,你地開始準備工作,買裝備、整波衫、計劃行程、搵資料、book場地,然後人數得返一半。

或者你會諗,「唔緊要既!仲有一半人麻!我地可以用行動感染返佢地!」

但到真正行動,人數再跌一半..

但因為人少少,大家參與度都奇高,縱然辛苦,但就有種「好熱血呀!學生時期既感覺返哂黎!」

即使要犧牲珍貴既星期六日,然後星期一返攰到想死,你都會同自己講,為夢想,幾辛苦都值得。

無奈生命總係充滿無奈,出左黎兩三次,一切青春既感動開始減退,驚覺對工作無用,對賺錢無幫助,不斷的消耗伴隨住人性悄悄回來,每次拍下留念的相片中,人頭愈黎愈大,人數卻和香港自主權一樣,愈來愈少。

個個都無時間,個個都夾唔到。

「呢個星期邊個得呀?」

「yo!又係時間XXX啦!」

可憐無論戇居仔如何投懷送抱,whatsapp始終無人覆,個group慢慢無再郁。

就好似《少林足球》既五師兄,不同的是戇居仔終於發現其他唔得閒既人喺FB、IG post既日本野stories、星期六船P相,佢都漸漸變返一個聰明既香港人。

然後大家在Whatsapp無論search contact既時候,偶爾見到那個曾經有五百四十六個unread message的group,如今已經一沉不起,而你亦選擇視而不見。

最後試過一次、兩次、三次,當你再次想開始搞一件事既時候,你會同自己講,都係諗下今晚食乜啦。

《少林足球》始終係戲劇,當大部份人係五師兄既時候,都會選擇離開。

當你以為別人的成功是僥幸,只有努力過的人才明白,那些能夠堅持下來的團隊,背後付出的努力,比表面你我所看到,或者能夠幻想到的,可能多一萬倍。

相關文章:

為何香港人會咁燥? 因為大家都是刺猬

完成工作唔代表準時收工 因為老闆覺得咁樣唔勤力