住慣新界就唔想住市區  好鍾意粉嶺四大好處

住慣新界就唔想住市區 好鍾意粉嶺四大好處

不經不覺我都住喺粉嶺有六年啦,每次同人提起住哪一區,一講「粉嶺」,每一次啲人都係嘩嘩聲,「返學使唔使兩個鐘?」、「係唔係有牛有草原?‌」平時返學,搭車都要一個鐘頭九個字,雖然遠係遠咗啲,但係我自己就好鍾意住粉嶺啦。

文:Nataile

住慣新界就唔想住市區 好鍾意粉嶺四大好處

第一,空氣清新啲。粉嶺周圍都好多樹,港鐵站附近就有蝴蝶山,本身馬路同車都唔算多,空氣真係幾好架。有時喺粉嶺出去旺角,都覺得有好大分別,粉嶺真係無嗰種好多車好焗促嘅感覺。

第二,可以成日到郊外活動。粉嶺好就好在同大自然好近,要行山要摘士多啤梨要踩單車要野餐都一應俱全。喺粉嶺站出發,可以搭小巴去流水響水塘野餐睇風景,或者去鹿頸行山影相。平時返學返工咁辛苦,放假最好就係近近地去郊外活動,放鬆自己。

第三,無大型商場但有好多小店。我平時唔鍾意去啲大型商場,粉嶺係無咩服裝連鎖店,但各式各樣的小店有特色得來唔公式化。喺港鐵站搭5分鐘小巴,就可以去充滿歷史氣息的聯和墟,不同大街小巷,好多粉嶺街坊鍾意係個度覓食,群記牛腩米、四眼仔腸粉,仲有潮洲打冷諗起都流口水。

第四,北上夠曬方便,半個鐘都唔使。最近好多人鍾意北上搵野食按摩消費,唔係講笑,粉嶺北上仲近過出旺角,粉嶺去羅湖只需要兩個站,平日唔多人,輕鬆廿分鐘上到去。一大班人朋友北上,有啲住港島有啲九龍,但一定唔夠你住粉嶺既咁快番到屋企。

住慣新界就住唔番九龍港島,平時係市區番學番工,放假可以係一個生活節奏慢啲近大自然既地方住,真係幾舒服,但當然就要犧牲平時比人多既搭車時間啦。

延伸閱讀:

為何香港人會咁燥? 因為大家都是刺猬

完成工作唔代表準時收工 因為老闆覺得咁樣唔勤力