咩事?點解咁多學生自殺?

咩事?點解咁多學生自殺?

朋友:「又有學生自殺,今次係港大學生。」
筆者:「好多單啦喎,到底發生咩事?」

朋友:「最估唔到係,好多自殺既都係大學生。」
筆者:「照計大學生思想比較成熟,抗逆能力比較高。」
朋友:「或者香港生活壓力真係太大。」
筆者:「又或者教育太側重知識,缺乏心理教育。」
朋友:「例如呢?」
筆者:「負面思想太重,嘗試從正面角度睇。」
朋友:「香港有好嘢咩?邊有正面?」
筆者:「呢啲咪誤解囉,任何事都有正反兩面。」
朋友:「唔明,講嚟聽吓!」
筆者:「一件好事,從負面角度睇都會唔開心。」
朋友:「點會呀?例如呢?」
筆者:「有朋友派到公屋,但係佢埋怨唔夠人嗰間好。」
朋友:「係!衰比較,正如考第二,都會怨點解冇第一。」

筆者:「一件壞事,從正面角度睇都會開心。」
朋友:「真係得?例如呢?」
筆者:「有朋友話早年業主加租,令佢決心買樓,賺咗好多。」
朋友:「我身邊都有好多朋友因為唔想捱貴租而上車。」
筆者:「睇番轉頭,個個賺晒錢啦。」
朋友:「賺得好勁添。你呢啲理論有冇根據架?定係吹水?」
筆者:「當年考催眠治療師證書時學的,國際認可,哈哈!」

每個人都曾經脆弱過

做人做了幾十年,再加上社會傳媒渲染,相信大部分人都會試過有輕生的念頭,尤其是十多歲的時候。

筆者當年都試過坐在窗邊,胡思亂想,細節記不起,應該覺得自己被同學欺負,想起屋企還有兩個弟弟要照顧,很快就沒事。

出來工作後,曾經有一位朋友自殺傾向比較重,經常無緣無故哭,又會突然躲起來,幾日幾夜沒人找到他,單親家庭背景有一定影響,確實令人擔心。

香港教育制度太過側重於硬知識,太重視考試、攞分。諗番轉頭,由細到大學校幾乎沒有訓練過一個人的心智。

接連多宗學生自殺,政府官員、教育界人士怱怱走出來解畫,不過講來講去都係十幾廿年前的老士論調,乜鬼嘢加多啲駐校社工等等,有幾多學生唔開心會搵社工?咪玩啦。

其實好多時之所以輕生,都是因為覺得沒有目標,沒有希望。上一代不需要講太多,因為當時社會貧乏,基本生活都未搞掂。筆者生於七十年代,看見老爸老媽的一代,個個為頭家搏晒老命賺錢,有清晰的目標—脫貧!脫貧!脫貧!

現今社會富裕多了,反而沒有一個明確目標,讀書為乜?工作為乜?形成空虛感。

為自己定下目標

筆者學催眠治療的時候親身試過,分享兩點簡單、實用的法則。第一,凡事都有正負兩面,前面已經提過,有機會再詳談。第二,將目標切碎,一個遠大目標,由無數個小目標形成。

很多人說,年青人要有遠大理想。理論正確,現實世界並不易行,目標太遠大,會覺得遙不可及,講兩講就冇咗回事,因為不知道該怎樣做。例如你目的地係觀塘,會先到旺角,然後去彩虹。

一個遠大目標,其實是由無數個小目標形成,有一個S.M.A.R.T.的培訓理論值得參考,目標要清晰實在、可量化、可達到,有機會再詳談。

筆者鼓勵年輕人計劃買樓,這是一個好的鍛鍊。如果你有自己的人生計劃,恭喜你,你未必需要買樓。但如果你暫時未想到有什麼目標,不妨想想,有寄託,有目標,做人都會正面些。相反如果覺得什麼都不行、做不到、沒希望,做人就會好負面。

(圖片說明:Anthony認為香港教育太重著硬教育,缺乏心智訓練。 法新社圖片)