消息…好即是壞,壞即是好?!

消息…好即是壞,壞即是好?!

吃飯的時候,朋友的電話響起,朋友沒有接聽。
筆者: 「做咩唔聽電話呀?老婆唔俾你出嚟食飯咩?」

朋友: 「唔係…係代理嚟架!」
筆者: 「係咪勁Sell你入飛抽新盤呢?」
朋友: 「唔係…係勁Sell我賣樓。」
筆者: 「你放咗兩個月嗰個盤?有人買嗱?」
朋友: 「有…不過個價唔靚,俾到340萬咋。」
筆者: 「咁咪好囉,之前你話330萬都賣架。」
朋友: 「呢個單位舊年賣到400萬架。」
筆者: 「哦~~你想反價,玩失蹤!」
朋友: 「就算賣唔到400萬,都賣番370、380萬丫。」
筆者: 「希望你成事啦!」
朋友: 「真係多謝你,唔係你喝住,年頭賣咗啦320萬啦!」
筆者: 「當時氣氛咁差,確實唔係賣樓時機。」

朋友: 「嗰陣個個都話繼續跌,得你話見底,叫我捱到暑假。」
筆者: 「唔係淨係講你知架,經濟一週專欄猴年大預測都有講。」
朋友: 「好在問咗你先,一來一回爭成50、60萬。」
筆者: 「最慘係年頭賣樓要受氣,而家個勢返晒嚟。」
朋友: 「話時話,其實你點估到架呢?」
筆者: 「唔係估架,係計出嚟…」

最近好多之前想賣樓的朋友,紛紛封盤、反價,相反好多之前想買樓的朋友,都唔相信樓市已經轉勢,仍然搬出大堆數據,例如加息、經濟下行、供應增加等等,推斷樓市只是小陽春。年初的時候全城唱淡,現在卻紛紛轉軚,有專家說誓估唔到英國脫歐,甚至有專家指,年底樓價將會破去年高位。除了新盤收票反應熱烈,中原指數亦交足功課,經過上週輕微調整,本週升幅相當凌厲,4項主要數據包括整體指數、大型單位指數、中小型單位指數、大屋苑指數按周升幅均超過2%,至於4項分區指數,港島升逾6%,九龍升逾3%,新界東及新界西則輕微上升,動力比預期強勁,筆者有幸言中,最主要基於幾個理由。

首先,升市總有頂,跌市總有底,跌唔緊要,跌幾多先?

當時筆者看底位大約在120點左右,大約是2013年底的價,筆者與戰友們每年都有買賣,對行情有親身體會,當年同樣是調整市,無論負擔水平、租金回報等都不錯,買樓是有吸引力的投資,於是當年我們買了很多。今年調整,我們相信如果跌到這個水平,亦會有不少投資者認為已經夠吸引,加上其他投資市場風起雲湧,散戶買乜輸乜,相信會趁機會入市。

其次,相比週邊其他主要城市,香港物業仍然最值得投資。

無論是去年高位,還是今年低位,仍然有很多想買樓的朋友,覺得香港的樓價很貴,應該要跌、跌、跌!無比較冇得講,有比較就見真章!去年樓市調整以來,筆者與分析團隊了解過很多城市,發掘投資機會,比較過歐美、東南亞、日本、澳門、台灣、大陸等地方之後,香港物業的的價錢雖然最貴,但計算過借貸成本、租金回報等各方面因素,性價比仍然是最挺高的。就好似上星期筆者寫新盤「啟德一號」的投資價值不高,冇比較唔覺,有比較就會知道區內有其他更好選擇,多睇樓就會比較。

所以當時筆者呼籲想買樓的朋友要把握機會,鋤價入市,很多同學都執到筍盤。至於想賣樓的朋友,筆者建議多捱幾個月。仍未買樓的今天應該有策略?很多人問:「好多負面因素喎,唔怕之後再跌咩?」大個啦…唔好咁易信人先得架!要唱淡的時候,好消息都可以當壞消息,要唱好的時候,壞消息都可以當好消息。例如,經濟下行,可以演繹為世界各國會繼續印銀紙、刺激經濟;加息,可以演繹為步伐緩慢,仍然很低等。

又有很多人問:「樓價反彈咗好多喎,去返去年高位,點算?」其實你睇番指數就知,不是所有物業都重返去年高位的,主要是部份熱炒大屋苑,其他物業與去年高位仍有一定距離,例如市區的小屋苑、單幢樓,就仍然有一成左右的折讓,是不錯的上車選擇。