犯咗呢個職場大忌 後果可以好嚴重 | 職場連載小說 | 職場陷阱 | 有心無默

犯咗呢個職場大忌 後果可以好嚴重 | 職場連載小說 | 職場陷阱 | 有心無默

【職場大忌】「唔好搞同事」之所以成為我朋友圈子入面最常提到嘅「格言」,原因當然唔止一個。上次嘅個案可以喺到重溫返:(上回連結

撰文:有心無默 | 圖片來源:網絡圖片

【職場大忌】唔好同上司「爭食」

話說D妹喺某間大公司到做,由於職員多,競爭大,又分咗唔少黨派,所以辦公室政治可以話係冇辦法避免。但當中總會有人係入世未深,佢嘅同事E男就係其中一個,入職冇耐就同一位女同事F小姐行得好埋,兩個人成日放工都會一齊食飯睇戲。事實上佢哋又真係幾夾,本來真係有機會係一段良緣,無奈佢哋嘅上司G先生偏偏係一個變態。

點變態法? G先生係一位佔有欲非常強嘅人。雖然已經結咗婚,但佢仍然好似一位全職玩家咁,尤其鍾意喺公司裡面「搵食」。呢個情況其實好多同事都知道,無奈佢幫公司搵到唔少大錢,深得老闆賞識,所以大部分人都係隻眼開隻眼閉。

「聽講佢老婆都係知道嘅,但啲人話佢哋都係差唔多嘅人,都係好鍾意喺外面『玩』。結婚純粹係攞個證明,最緊要自己過得開心,唔好有咩手尾跟就得。」D妹解釋。

職場大忌
由於職員多,競爭大,又分咗唔少黨派,所以辦公室政治可以話係冇辦法避免。

而G先生近期嘅新目標,正正就係F小姐。本來見F小姐唔似其他女仔咁容易得手,佢仲覺得好有挑戰性。點知半路突然殺出一個程咬金E男,G先生當然係好唔忿氣。

其實以佢嘅地位大可以隨便搵個理由炒咗E男,但東家唔打就打西家,咁做分分鐘有利咗E男同F小姐嘅發展,所以佢並冇咁做到。一開始仲對E男幾好,成日帶佢出去見啲大客……但原來咁做,只係想整定個大坑俾E男踩。

「最後E男得罪咗個大客。件事都真係幾大鑊,可以係話臭咗朵,做唔做得返呢行都成問題。」

但件事仲未完。因為,就算離開咗公司,冇得再喺嗰行立足,E男同F小姐依然仲有聯絡。直至去到有日,E男開始收到一啲騷擾訊息,內容大致上都係要求佢哋分開、罵E男係廢物、唔會畀到幸福人等等……

「E男冇報到警。因為佢本身都係幾怕麻煩,加上短訊內容冇恐嚇成份,又全部都係太空卡,肯定好難查。」

就算知道兇手好大機會係G先生,E男都係想多一事不如少一事。

估唔到,最先忍耐唔住嘅人竟然係F小姐。聽講係佢喺公司開始受到唔太好嘅對待,覺得可能又係G先生暗中安排,為咗可以保住份工,所以最後選擇同E男斷絕來往。

職場大忌
「唔好搞同事」之所以成為我朋友圈子入面最常提到嘅「格言」,原因當然唔止一個。

【職場大忌】有啲人真係唔可以隨便冇咗份工

「唔係嘛,真係有人可以咁惡咩?」嗰陣聽完,朋友A君忍唔住問。

「職場就係可以咁黑暗。而且,有啲人真係唔可以隨便冇咗份工……」D妹回答。

事件發展到最後,F小姐始終冇成為到G先生嘅「集郵對象」。但G先生亦都冇再耍手段搞佢。唔知係搵到新對象,抑或留個可能性等將來再次展開攻勢。至於E男,就間唔中都會收到騷擾短訊。慢慢就習以為常,亦都搵到份新工重新開始。

成日話唔好輕易得罪女上司,但其實男上司得罪起上嚟,都真係可以好得人驚。

所以講到尾都係呢句……千祈唔好搞同事啦。

作者簡介:

有心無默。網絡作家,以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。