人生在世 總會遇到幾位「極品」同事 | 職場連載小說 | 有心無默

人生在世 總會遇到幾位「極品」同事 | 職場連載小說 | 有心無默

【人生在世 總會遇到幾位「極品」同事】喺香港打工從來唔易,為咗份人工可以「勉強」追到通脹,好多人都會選擇不斷轉工。我做設計呢行都唔係例外,由於成日有新臉孔,做耐咗自然會見到好多「極品」同事。
撰文:有心無默  | 圖片:網上圖片

人生在世,總會遇到幾位「極品」同事

試過有同事(A君),見工時候拎出嚟嘅portfolio(作品集)裡面差唔多九成嘅設計都唔係屬於佢嘅。因為當時冇認真檢查,加上佢面試表現幾好就請咗返嚟,最後當然係中大伏……

有次大project上司叫幾位同事交啲Idea出嚟一齊傾下,最尾決定採用咗A君嘅設計,搞咗成兩個月差唔多去到尾聲,先有同事喺網上面發現有個接近一模一樣嘅設計。

雖然踢爆咗A君,但成個project當然需要由頭做過、又要同個客道歉、最後仲要查返A君之前掂過嘅項目,睇下有冇類似嘅情況……留低嘅手尾真係好長。

「極品」同事
見工時拎人哋嘅設計當係自己嘅portfolio(作品集),呢個情況喺職場上唔算新鮮事。

極度自我中心的fresh grad

又記得有另一位同事(B君),明明fresh grad冇耐,但面試時卻講到志向好大,話想五年內成為得獎設計師,幫公司搵大錢。由於份人極度自我中心,所以同同事關係非常一般。記得有次臨放工嘅時候,佢突然行去某個上司(C姐)旁邊,希望同佢傾兩句。

「我有份報告要七點前做畀個客,可唔可以等到七點後先傾?」C姐當時咁講。

「唔得喎。」當時B君真係咁講:「公司話明六點就收工,我一陣約咗人唔遲得。」

C姐出名係和善,加上可能已經聞到陣味。所以當時並冇同B君爭論太多,同佢行入其中一間房度傾。

「極品」同事
無論是fresh grad、或是職場「老屎忽」,極度自我中心嘅同事都係超麻煩嘅。

嫌礙發展遞辭職信

(之後嘅對話,都係事後由C姐口中聽返嚟)

「我覺得公司對我嘅待遇唔係幾好。」一閂埋門,B君即刻講。

「點解咁講呢?你只係喺度做咗半年,已經掂過唔少project,仲有機會落手設計……」

「得個走廊仔根本唔算咩設計,而且D君(另一位同事)做出嚟嘅嘢真係好垃圾。如果公司只係憑經驗去決定邊個話事,我覺得你哋真係大材小用囉。」

「咁你想公司點對你呢?」

「我希望下個設計可以由我全權負責,我有信心一定可以做得好過其他人。」

「唔……等老闆旅行返嚟之後我會同佢認真傾下。」

「希望你哋真係會考慮,唔好等將來後悔。」

咁大口氣,如果唔係C姐而係其他上司嘅話,應該早就當場同佢吵大鑊。呢次「傾兩句」後,C姐本來的確係諗住等老闆返嚟先處理。

點知幾日後就收到B君嘅辭職信。理由都係話公司唔重視佢,阻礙到佢發展等等……

「極品」同事
若果覺得公司唔重視自己,阻礙到個人發展,的確應該一早辭職。

匿名電郵講壞話

但件事未完,冇耐之後老闆就收到某個客嘅訊息,內容係話有人寄電郵講公司嘅壞話,問內部係咪發生咗咩事……

睇返啲文法,大家都估兇手就係B君,大概佢係暗中記低晒公司客人嘅電郵,等離職之後先落手。由於係匿名電郵,所以要處理返真係一件好麻煩嘅事。

極品同事,唔知你哋又有冇遇到過呢?

下次,講一單更加犀利嘅。

「極品」同事
匿名電郵講公司壞話嘅例子,喺職場上的確屢見不鮮。

作者簡介:有心無默。網絡作家,以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。

體驗1分鐘貸款批核 隨時提款話咁易

延伸閱讀:

好地地打工 唔好挖個窿俾自己踩 | 職場連載小說 | 職場陷阱 | 有心無默

人生在世 總會遇到幾位「極品」同事 | 職場連載小說 | 有心無默