射波早收工 偷懶唔緊要 最重要對得住成班同事 | 職場入門 | 藍橘子

射波早收工 偷懶唔緊要 最重要對得住成班同事 | 職場入門 | 藍橘子

【職場入門】香港工作壓力,大到一個咩程度?簡單比喻,就係如果有一日,你唔好彩畀鬼上身,你每日只需要照常返工放工,隻鬼就會因為受唔住壓力離開你。

撰文:藍橘子 |圖片:網上圖片

職場入門 過得自己過得人

以一個咁大壓力嘅工作環境下生存,我好諒解打工仔會想射波、有假期後遺症等等心態。

以前有句說話,叫做「過得自己過得人」,但以現今社會好似唔太用得著。

試幻想當你星期一朝早鬧鐘響,你好似被鬼壓床咁完全起唔到身,當你考慮用醫生紙換取一日假期嘅時候。

嗰一刻,你完全過到自己心理關口,但係…你有冇諗過,留守喺公司作戰嘅同事們?

職場入門
射波早收工偷懶唔緊要,最重要對得住成班同事。

所有工作Set咗個限期

(以下個案與年齡無關,絕不存在咩「90後返工唔上心」,「70後最勤力」呢啲都市傳說)

曾經有位同事,佢好有交帶地半年前請定大假,話想同屋企人去旅行。但當佢接近放假前,就自動將自己嘅所有工作Set咗個限期。

意思係,明知道嗰段日期先Deadline嘅工作,佢一概不理會,留返等同事處理。(唔係執手尾咁簡單,但從頭到尾交晒畀同事)。

大家都知佢射波

結果短短一星期嘅假期,同事們幾乎做到死,心入面對佢嘅恨,買幾多手信都補救唔返。

另一個個案,有位同事每逢星期一就有急事或患病,大家心底裡都知佢射波,但又唔能夠講出口質疑別人。

於是最繁忙嘅星期一,永遠都少一個人做嘢。

不過講到底,公司老闆都好大責任。如果一間公司嘅人手,足以應付同事們有突發事情需要放假,就唔會有問題出現。

公司永遠唔會預鬆人手

踢足球都有後備球員,點解公司永遠唔會預鬆動少少人手?有心理學家研究顯示,工作嘅薪水同福利,並唔會長期維持工作士氣。

相反,員工努力付出有回報,知道自己做嘅嘢老闆睇得見,唔會一句「你跟我方法做得得啦!唔好咁多意見!」

而令員工嘅努力白費,工作帶來嘅成就感…更加令員工對公司有歸屬感。

其實如果工作環境好,壓力唔大,打工仔又點會成日射波請假?自然乜責任心都返晒嚟啦~

短trip遊台北叉叉電,即訂平、靚、正住宿出發!
http://p.nmg.com.hk/dstw47

去旅遊想搵住宿?識睇一定睇呢到!
http://p.nmg.com.hk/fhjqu2

延伸閱讀:

工作非人生的全部 別讓工作變成你的生活

身邊總有些嚷著要走 但一直無辭職的同事