19歲大學生兼職月入4,000元 月供盈富 還是多儲錢再投資 ｜龔成信箱
【盈富】今日龔成信箱，不少讀者想為未來作打算，應如何實行投資計劃，亦提及熱門的股票以及投資心態等問題。
撰文：龔成 ｜圖片：新傳媒資料庫
1．月供盈富
我係一名19歲的大學生，現做兼職月入大約＄4000。
你建議我由現在開始月供你常說的盈富基金嗎？因為資金不多，月供股票手續費亦較昂貴。
還是趁這四年大學生活儲蓄現金日後再作投資？還是有更好的建議？謝謝。
龔成老師：
如果你可以每月投入$2000，我會建議你月供股票，你可以找手續費較低的銀行，聽網友講南洋商業銀行手續費不高，你可睇睇，比較下先。
盈富（2800）是最好的選擇，你長期月供就可以。
我希望你開始投資，除了累積財富外，仲會得到經驗。這4年，你要強化你的投資知識，這刻你的本金不多，賺蝕數有限，但到日後工作，本金明顯增加，如果當時已有一定的投資知識，你之後能創造的投資回報，將會相當大。所以，不斷睇書、上堂，吸知識。（對照龔成信箱：Q5275）
2．派息
想請教。通常派息，係除淨日前入就可以派，咁啲人會唔會特登係啲派息股除淨日前入貨然後放？
龔成老師：
一般都唔會除淨前特登放的。
有些散戶貪息，會在除淨日前買，又或有些人會在除淨後立刻賣。但這無是無意思的。
因為除淨後股價就會調整，反映這筆股息，所以除淨前或後買，根本是一樣的，只是左手錢與右手錢的分別。（對照龔成信箱：Q5269）
3．優質股
老師你好, 我睇緊你本50隻優質股, 我想問點解唔見關於保險個類嘅? 因為我手頭有友邦(1299)同中人壽(2628), 呢兩隻算唔算優質或收息呢? 謝謝老師.
龔成老師：
書中都有寫保誠（2378）的。其實，平安（2318）、中人壽（2628）、友邦（1299）都是優質股，只是不想同一類別，一次過寫太多在書中，上面4隻都有投資價值，但要注意，現時估值已到合理區較上部，甚至有少少貴，買入不是不可，但要分注。
至於點解選保誠，這是因為佢當時受英國脫歐因素影響，股價大跌到$120，是幾隻保險股中最有值博率的，所以當時選這股。（對照龔成信箱：Q5270）
4．月供模式
成哥你好，我買齊你啲書，亦都睇晒！學到好多野！
我現在月供緊長建，港鐵，中電，煤氣，呢個組合有冇問題？每隻2000.
但我其實係大市21000點時供緊上面四隻，仲有領展，比亞迪，長實，Hsbc,金沙，友邦，我28000時見太高停左。
其實如果日後大市回落，我又供返，十隻會否太多？而我每月可儲大?25000，現在高位所以只供四隻8000,到回落供十隻每隻2000,ok嘛？定集中供四五隻好啲？
而如果上面十隻真的要你選四隻做一個組合，你建議邊5隻？
我經常看到你推介人月供，我已了解月供好處，但你有無見過失敗例子？
例如供完十年，收息後都有大虧蝕？因為我身邊冇朋友月供，想參考下失敗例子，萬分感謝
龔成老師：
其實，你唔需要變來變去，之前的月供模式是較好的，你一直月供就得。大市升到不平的水平，你的確可以減少月供，但不用減得太多。
如果大市回落，你當然可供多啲，但現時都可以以一邊儲貨，一邊儲現金作策略，因為無人知大市會唔會跌，如果不跌反升，你會損失機會成本。
以現時的市況，你可以每月供$13000，隻中選其中的6隻，現時供緊的4隻，加上盈富（2800）、比亞迪（1211）。當然，這只是建議，是方向，我希望你能獨立思考。
月供股票以儲股票為大前提，過往我建議人月供，如果是新手，我會叫佢供盈富（2800），所以未見過有失敗個案，其實，絕大部分優質股，長期都會上升的，所以，根本是贏多輸少。不過，都有可能失敗的。
如果你供了一些質素下跌的股票，你只要買得愈多，財富愈貶值，例如思捷環球（0330）、利豐（0494）。所以，我地不要太集中，要有一定的分散，所以要加入盈富。同時，要懂得分析大環境，當這股的質素真的變差時，就是止蝕，不要盲目進行。（對照龔成信箱：Q5271）
5．銀行/金行賺錢原理
你好，我見銀行/金行賣金行地方, 買入/賣出價相差幾十蚊, 其實金行/賣金嘅銀行佢點賺我哋錢㗎？以下係用上商為例子,賣出買入差價只係150蚊,扣取成本佢只係賺到我哋 150 蚊,其實佢哋係點賺錢?
背後應該有個原理,我無知想問下,究竟佢哋賺錢個原理係?????同埋點解銀行或者金行會優先 / 出高啲價 買返自己賣出去俾客人嘅金嘅?
龔成老師：
只要數量夠大，就可以賺到錢。佢地一般都會有3個賺錢方法。
第一，手續費及其他雜費，不要忙記，好多時都會有其他不知名的費用，有d戶口就費乜都唔做，都會收費。
第二，差價，這是最常見的，銀行提供的投資服務，無論是金，還是外匯，又或是其他產品（如果該項目是市場標準化，有固定單位，交易量大，差價就可較少）。
第三，息差，有些投資項目，銀行可以做孖展，借錢就要比息，這是銀行的收益。（對照龔成信箱：Q5272）
6．東方大學城控股（8067）
龔老師你好，買左你兩本書睇過下，但始終股票呢方面都係初哥，未太識分析
想問下你，8067東方城大學，我兩個幾入，之前升左，個而家又好似無咩上落，想問下應該繼續持有定走好？
龔成老師：
買股票就是買企業，買入後，慢慢等企業成長，你不用太著重股價，反而要留意企業的質素與長遠前景。
東方大學城控股（8067）由萊佛士教育集團（於新交所上市）分拆上市，其主要於亞太地區經營多所院校。
佢主要係中國從事出租教育設施，包括教學樓及宿舍，並向經營各種配套設施的租戶出租樓宇及物業。佢主要客戶為大學、學院、學校及教育培訓中心。
過往的生意平穩，盈利有少少增長，但未見有好大的驚喜，股本回報率低，賺錢能力不強，相信佢從事的業務，在教育界並非好賺錢的一部分。
現時市盈率都算合理，你持有可以，但唔好太大注，同時不要對股價有太大的期望。（對照龔成信箱：Q5273）
7．騰訊未來走勢
你好, 龔兄, 我對股票零認識, 想上你啲堂 你啲堂又成日FULL
我想問700騰訊未來1-5年嘅走勢如何, 如果長線可以嗎？ 未買的
龔成老師：
股票課程詳情及報名：55457212
騰訊（0700）的發展仍然正面，但這股的估值已經好高，就算之他企業價值以不低的狀態增長，股價也不會爆升，只會平穩上升，因為股價已透支了企業的升幅。
所以，騰訊之後幾年的股價，不要有太大的期望，如果你找投資科技股，與其投資這刻的騰訊，不如找下一隻騰訊，值博率會更高。（對照龔成信箱：Q5274）
8．長建（1038）
龔成老師你好！長江基建同電能實業均為優質股，但為何電能實業能夠近兩年均派十幾元的股息呢？但長江基建則沒有呢！
龔成老師：
背後與整個長和系的戰略有關。
電能（0006）的定位，只是一隻公共事業的收息股，目的是產生穩定、持續的現金流，這企業會平穩發展，但不要對股價有太大的期望。收息可以，但你不能只分析特別股息，因下年未必有。
電能不斷派息，佢的母公司長建（1038）就會不斷收到大額的現金。電能定位是現金流產生工具，而長建的定位，則是發展。
整個派息過程，目的都是不斷將資金投向長建，而長建仍然會再投資，不斷發展，因此要保留資金，不會派息。因此，這股未必是理想的收息股，但長遠發展正面，股價長遠會保持增長。（對照龔成信箱：Q5276）
9．正利控股（3728）
成兄，點睇3728正利？
龔成老師：
正利控股（3728）主要係香港從事底層結構建築工程服務（包括拆除及臨時圍牆、場地平整及地基工程）、上蓋建築工程（包括開發及再開發教堂、教育、住宅及商業樓宇）。
佢主要客戶包括領展資產管理有限公司、教堂、房地產開發商、教育機構及法定機構。
企業處於平穩增長狀態，但規模細，企業無太大的獨特性，都會對這企業扣分。整體來說，只能用不過不失去形容。
但有一點我擔心的，這企業早幾年的股價炒得好勁，之後大跌，雖然現價處合理價，但如果當時是有人刻意炒這股，反映當中有對小股東不利的行為。佢市值細，股價可以較人為。所以，如果投資這股不宜太大注。（對照龔成信箱：Q5277）
10．匯賢（87001）
你好 龔成。小弟追睇你的facebook 一段日子，學了不少理財智慧！
現在小弟本想拿數十萬每月派息基金。
發現 股息87001派息情況也不錯，有8% 左右。而且不用管理費。請問這時好選擇嗎。感激教導!
龔成老師：
你不應只集中在單一股票上，應該建立一個平衡的投資組合，這樣可以有效分散風險，同時有不錯的增值及股息，長線持有這組合就可以。
匯賢（87001）這隻房託較為特別。
匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。
加外有新增投資，於2015年才收購的重慶大都會東方廣場。
但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。
從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。
這股有投資價值的，現時估值合理。（對照龔成信箱：Q5278）
延伸閱讀：
港珠澳大橋快通車 濠賭股最受惠 首選呢隻
