診所職場事 寶豬趣聞 魚 下回|珍寶豬

診所職場事 寶豬趣聞 魚 下回|珍寶豬

上回講到阿姨以為條魚未死晒,所以佢老公喉嚨UN住UN住。
我:「唔好吓啦,嚟睇個醫生好快咋嘛,睇咗冇事咪大家安心囉~係咪先」

佢:「唔好啦,好尷尬㗎,你有冇咩可以幫到我老公呀,佢俾條魚折磨死啦」

撰文:珍寶豬

睇喉嚨有咩好尷尬呀?又唔係睇個屎忽窿…
我:「喉嚨咋喎?你都識講佢好辛苦啦,咁仲等咩呀?」
佢:「可能等等吓條魚死晒呢?佢就會冇事呢?」
我都就快死晒㗎啦,你等吓啦。我俾你激死呀!

我:「太太呀,條魚喺你劏嗰時都應該死直晒㗎啦…你仲要蒸過,佢歸晒西㗎啦」
佢:「我知,你唔好當我白痴先得㗎,咁凡事總有例外㗎嘛」
而家係你當我白痴…
我:「咁你頭先嗌晒咁衝入嚟?」
佢:「呀係喎!我頭先好驚㗎,入到嚟診所成個人好似冇咁驚啦,又係喎」

我無言…

佢:「一係我叫埋我老公落嚟呀」
我好感動呀,佢終於肯嚟睇醫生啦!
我:「好呀,佢嚟到再登記睇醫生啦」
佢揮手:「唔係呀,我哋唔係睇醫生呀」
我:「吓?」佢:「我嗌佢落嚟診所坐吓得唔得呀?」
我:「唔睇醫生嘅,點解要咁做呀?」

佢:「可能佢都係太驚所以先咁啫,我入到嚟都冇咁驚,佢都可能得呀!廢事喺屋企對住條魚骨啦,唔老黎呀」
佢再問:「咁我可唔可以坐呀?我老公可唔可以呀?」
我:「你覺得舒服啲安心啲嘅就坐吓啦,有咩唔舒服就登記睇醫生啦喎,好冇?」
佢:「姑娘其實我見到你都覺得好安心㗎啦,咁我嗌我老公落嚟啦」

請我返屋企坐呀嘛,淨坐有人工收!正呀!

珍寶豬過往精彩文篇:

診所職場事 寶豬趣聞 魚 上回|珍寶豬

診所職場事 寶豬趣聞 珍寶豬

有日一位阿姨門口都未入到,就已經聽到佢把聲。
『唏唏唏唏唏唏唏唏!今舖大鑊啦!姑娘呀!!!』
佢一入到嚟就直衝嚟登記處,爭啲撞埋去我哋塊玻璃…

撰文:珍寶豬

佢:「姑娘呀,救命呀」
我:「請問咩事呀?」
佢:「你咁冷靜嘅?」
有事嗰個又唔係我,我騰雞什麼?
我:「姑娘係咁冷靜,請講,有咩事啊?」
佢:「我頭先蒸魚呀」
嗯,蒸完未?定食晒啦?唔預我仲好講我知你有魚食?

我:「繼續講呀~」
佢:「我諗住拎佢上嚟呀!點知佢好似翻生咁!」
嗯,我好想試吓擺埋你入去蒸,睇吓你會唔會翻生埋一份…

我:「咁跟住呢?」
佢:「冇呀,跟住佢咪跌咗喺地下囉,隻碟爛咗囉」
我:「咁你嚟做咩呀?你應該去對面日本城買過隻碟呀」

佢:「呀係!講返正題,我哋食完㗎啦,隻碟爛咗,我咪執返起條魚擺過另一隻碟度囉,我老公話喉嚨UN住UN住呀而家!會唔會係條魚有事呀?」
我:「你叫你先生嚟睇醫生呀,俾醫生睇吓~」
佢:「吓?乜要睇醫生㗎?」
我哋診所唔係睇醫生嘅,仲有咩好做呀?要唔要跳隻舞?
佢繼續講:「會唔會係條魚未完全熟所以先咁呀?」

我:「你蒸咗幾耐呀?你嗰條咩魚呀?」
佢:「桂花魚,都蒸咗廿分鐘㗎」
牛都死啦…

我:「如果你有開火嘅話,條魚如無意外死晒㗎啦,喉嚨有嘢UN住可能係有魚骨插住啊,最好都係俾醫生望望啦~」
佢:「吓…..」

下回續。

診所職場事 寶豬趣聞 小姐對嘢|珍寶豬

診所職場事 寶豬趣聞 珍寶豬

有日有位女士嚟到診所~
佢成個驚恐樣同我講:「姑娘,我有輪狀病毒呀!」
咁大鑊!咁你都仲可以咁好氣好力企喺度嘅?

撰文:珍寶豬

我:「你驗咗?喺邊驗呀?」
佢:「我睇到呀!唔駛驗!」
你望篤屎都知自己中咗咩咁勁?唔通你對眼…
我:「咁呀…一係我同你登記先,你入到醫生房再同醫生講啊」
佢:「你哋醫生男定女呀?」
我:「男醫生啊」
佢:「吓!咁我咪要俾對嘢佢睇囉?」

對~對咩呀?你個屎忽一對㗎?

我:「你指PATPAT?醫生未必需要睇你PATPAT嘅,會了解咗你情況先,有需要先再檢查」
佢:「咩PATPAT呀?我冇話我PATPAT有事喎…」
我:「你頭先唔係講俾對嘢醫生睇咩?」
佢指住自己胸部:「對嘢呀!姑娘!」
你對波瀨屎呀?唔係卦?

我:「頭先你講輪狀病毒呀嘛?我冇聽錯呀可?」
佢:「係呀」
我:「輪狀病毒係嘔屙喎…咁你心口…」
佢:「咩呀!我冇屙冇嘔呀!我係甩皮咋喎!」
…我哋係咪喺唔同嘅時空呀?哎!唔理呀!反正我係登記咋嘛!

我:「哦~咁呀~我同你登記先啦」

佢:「你哋冇女醫生喺度㗎?」
我:「冇呀,我哋得男醫生」
佢:「輪狀病毒佢識唔識睇㗎?女人嘢喎!」
我已經再忍唔到了:「小姐,你介唔介意寫你講嘅輪狀病毒喺紙上呀?」
佢寫完之後…
『鱗狀病毒』…

我:「你唔好介意呀,可能你錯咗少少嘢~如果你係呢個鱗嘅話,係咪講鱗狀細胞癌呀?但係呢個一定要驗㗎喎,你頭先話一睇就知?」
佢嘆一口氣:「我都唔知係咪我自己識太多嘢,所以覺得姑娘你有啲無知,我乳頭甩皮甩到一塊塊,唔係鱗狀咁係咩呀?你哋個醫生識唔識㗎?女人嘢喎」

小姐,乳頭呢…男人都有㗎~人人都有兩粒。

診所職場事 寶豬趣聞 慶祝清明|珍寶豬

診所職場事 寶豬趣聞 珍寶豬

電話響起~

我:「你好,乜乜診所」
佢:「呀!診所呀嘛?」
我:「係呀」
佢:「聽日紅日喎」
多謝你專登打嚟提我,BYE。

撰文:珍寶豬

我:「嗯,係呀」
佢:「紅日唔開呀?」
我:「係呀,紅日唔開呀」
佢:「咁我可唔可以拎嚟聽日後日假紙呀?」
我:「病假紙由醫生決定寫咩日子俾你嘅,你都要親自過嚟睇醫生啊」

佢:「就咁嘅,咁聽日個個都要拜山㗎啦,唔會呢頭拜完山,嗰頭就散水㗎嘛,一家人呀」
你想講你家族有幾溫馨嗎?播緊真情嗎?
我:「哦?咁點呢?」
佢:「所以就咁嘅,我哋BOOK咗場去BBQ慶祝㗎啦」
清明慶祝什麼啊?先人走咗,點解要BBQ慶祝呀?係咪BBQ嗰時順便燒埋衣呀?

我:「所以呢?關我哋診所咩事呢先生?」
佢:「BBQ唔會咁早放人㗎嘛!一玩就玩到好夜啦!第二日都返唔到工㗎啦!」
我:「唔好意思呀,你去玩你去燒嘢食嘅關我哋咩事呀?」
佢:「我要放假呀!聽日後日假紙就係咁簡單!係咪好簡單先?」

我:「哦~請問先生你有冇喺度睇過呀?」
佢:「有呀有呀有呀!我係乜乜乜呀!」
我:「哦,好呀,我已經MARK低先生你個名㗎啦。咁到時你嚟到診所睇醫生嘅話,我都會照返頭先你講嘅傳達返俾醫生知。到時醫生寫唔寫病假俾你,就由醫生決定啦~」

電話另一邊靜咗十幾秒,之後佢講:「八婆,你陰我!」

嘟。
係你自己情不自禁咁講我知咋…

診所職場事 寶豬趣聞 油脂粒|珍寶豬

診所職場事 寶豬趣聞 魚 下回|珍寶豬

一位小姐嚟到診所。
佢行埋嚟登記處問我:「係咪可以寫轉介信呀?」

撰文:珍寶豬

我:「見咗醫生先~醫生了解咗你情況之後就會寫去相關專科」
佢指住隻眼:「咁樣睇唔睇呀?」
隻眼睇落好正常啊,外觀色澤都冇問題,係有少少熱氣有啲眼屎,去執劑五花茶得啦~
我:「隻眼?隻眼有事?」
佢:「你望唔望到下面有粒嘢?」
我:「我望唔到呀,我同你登記先啦,你入到醫生房再同醫生講啦~」

佢繼續指住隻眼:「呢粒油脂粒喎」
我:「油脂粒轉介去專科?私家呀?」
佢:「唔係有政府眼科㗎咩?」

我:「油脂粒唔駛去政府㗎喎,而且呢啲唔係去眼科啦」
佢:「生喺隻眼度喎!」
你隻眼跌咗出嚟嗎?跌到去鼻樑附近呀?

我:「你呢個唔算係眼位啦,只係附近啲皮膚啫,就算你要睇,都唔駛去公立醫院嘅,有耐排呀」
佢:「排幾耐呀?」
我:「呢啲CASE分分鐘以年計…因為冇急切性嘅影響嘛,佢肯睇嘅話都已經好好。」
佢:「吓?我過幾個月影婚紗相喎!你可唔可以寫埋落封信度話我好急切呀?」
…你知唔知咩叫急切呀…你淨係諗到好心急咁切咗佢呀嘛?

我:「你自己去私家皮膚科做咗佢會快好多喎」
佢:「我有錢就唔駛嚟叫你寫啦,我係俾到幾十蚊你去寫封信㗎咋,如果你唔收錢我會好多謝你囉」

你個腦都好似好多油脂粒。
我:「我哋醫生診金係二百蚊,唔係幾十蚊啦」
佢:「哇,乜咁㗎?值唔值呀?」
你都覺得你嗰粒油脂粒唔值呢?

佢:「我walk in去政府得唔得㗎?」
我:「佢哋專科冇walk in㗎…」
佢:「急症囉!」
我:「急症都要俾一百八十蚊..」
佢:「咁又唔得咁又唔得,咁點先得呀!」
我:「P圖唔駛錢,自己用電話P咪得囉…何況你嗰粒嘢咁細粒,你影結婚相唔會張張大頭相卦,遠一遠都睇唔到啦」
佢悟出真理離開了,我又成功趕客了。

體驗1分鐘貸款批核 隨時提款話咁易

平遊東京不是夢!最平住宿喺晒呢到

去大阪想搵住宿?識睇一定睇呢到!

去首爾掃貨住邊好?入嚟幫你格價搵至抵住酒店!

短trip遊台北叉叉電,即訂平、靚、正住宿出發!

去旅遊想搵住宿?識睇一定睇呢到!

診所職場事 寶豬趣聞 正氣大叔 下回

診所職場事 寶豬趣聞 魚 下回|珍寶豬

診所職場事 寶豬趣聞 神秘顧客

診所職場事 寶豬趣聞 魚 下回|珍寶豬

關鍵詞
經一專欄