診所職場事【寶豬趣聞】有用的話|珍寶豬

診所職場事【寶豬趣聞】有用的話|珍寶豬

【診所職場事】電話響起~
我:「你好,乜乜診所」

佢:「喂?今日開呀?」
我:「今日有開呀,今晚七點前嚟都有醫生睇啊」

撰文:珍寶豬

佢:「我噚日諗住嚟睇㗎,點知嚟到唔見你開,我怕你哋執咗呀,所以咪打嚟問咗先囉」
我都冇問你點解打電話嚟,你做咩喺度自HIGH先說呀?
我:「哦~係呀?噚日星期日我哋一向都唔開㗎,你今日可以嚟呀,我哋開到七點」
佢:「嘩,你知唔知呀,噚日你哋冇開搞到我成籮蟹倒瀉晒呀!」
我:「哦?你有咩唔舒服嘅嚟睇醫生同醫生講啊~」
佢:「你好趕時間咩?」
…你好想我留低咩?每六秒六毫。
我:「喺電話度冇醫生同你診症㗎~你同我講都冇用㗎,嚟同醫生講呀~得醫生先幫到你~」

佢:「咁我講埋俾你聽唔得㗎咩?」
你明唔明呀?講俾我聽真係冇用㗎。

我:「我唔係醫生呀嘛,你講俾我聽做咩呢~你一次過同醫生講就得㗎啦」
佢:「我鍾意重覆講完又講唔得咩?」
…你份人咁賴皮嘅。
我:「講俾我知冇用嘅話,留返同醫生講啦~你問我幾點截症我就答到你嘅,其他我真係幫唔到你㗎~」
佢:「好多嘢好多人都知講嚟冇用㗎,咪又係講!」
做咩突然咁呀~好驚啊,有心事嗎?
我:「….係~但係你身體唔舒服嘅應該係同醫生講㗎嘛,醫生係幫到你嘅人嘛~」
佢:「冇用嘅嘢你就唔好講啦,你都冇用嘅聽咩電話呀!」

嘟。

醫生,我哋個電話SET成只播應診時間錄音好冇?

延伸閱讀:

診所職場事【寶豬趣聞】相由心生

診所職場事【寶豬趣聞】靠唔住嘅樣

診所 醫生 登記 睇樣