龔成問答信箱(Q401-Q440)

龔成問答信箱(Q401-Q440)

Q401:成兄,我手頭上只有80萬可投資現金,同時 我層樓買入322萬比左100萬首期,賞欠210萬,現升值400萬,我想加按吐現,將資金買銀行股收息,到股價升double後賣出,再買拎一層收租,呢個方法會吾會有風險呢?

龔成老師:我相信無人會預計到股價會升多少,所以當一個人只諗回報,而唔諗風險的時候,就會危險。

你的方法諗得好,但現實上股市充滿變數,往往一些我們諗都無諗過會發生的事,就對我們造成最大風險。

加按提升了風險,但只要適當去做那仍可以(當然細節要再分析才有答案),而你不止有單一集中的風險,更有被市場牽引的問題,銀行股本身未必有大問題,但策略上有問題,有點風險,忽略了市場的不可預知性。

————————————————

Q402:龔兄,想問房地產信託基金會倒閉嗎?

龔成老師:這個機會極低,房託的原理是持有物業收租,就算樓市跌、就算收租少,所持有的物業仍在,只是價值減少,所以不用擔心。

而在香港上市的房託,其實都很穩健,最多是除牌。睿富(0625)是首宗在香港退市的reits,佢只是自願申請不在港上市,這不會影響資產質素,持有者亦都無損失,只是賣出時比較麻煩,所以你不用擔心倒閉的問題。

————————————————

Q403:成兄,你講過月供股票係唔錯的策略,但個個月個的價位都唔同,都唔肯定自己拉勻係咩價先好放,咁咪好煩?

龔成老師:唔同價位的目的,是減少一次性在高位買入的風險,所以有減低風險的作用。

而你賣出股票,不應被買入價牽引,賣出的考慮點是企業的質素與前景。一般人常以$4買就$5放,若$7買就$8,這種單純以價位或百分比去賣出的策略,是極度錯誤!

我知坊間好多都用這方法,但這方法從概念上已不正確,仔細想想。

————————————————

Q404:成哥,我知盈富這etf係唔錯的工具,盈富的管理人是道富,如果這這間公司倒閉,那etf係咪都會倒閉?

龔成老師:道富環球係盈富基金(2800)的經理人,佢負責運作方面,而另外仲有信託人,是美國道富銀行,其工作包括監察盈富基金之投資及運作。即是說,道富就算倒閉,都唔會影響盈富基金的資產,這可能會停止運作,但內裡資產不會被偷走,因盈富不是道富的資產,這是獨立出來的。

————————————————

Q405:HI..我想買2778值得長線投資嗎?

龔成老師:冠君產業信託(2778),持有花旗銀行廣場、朗豪坊,都係有質素的資產,本質上唔算差,但香港租金出現回落,會令往後收租減少,但我認為不會太多。

反而美國加息與否,令這房託的股價較波動,當市場認為美國較遲才加息時,其他收息工具,例如這房託的股價就會上升,若這時買入股價就會較高,而息率亦變得無咁吸引。

所以,較好的策略係分段入,因為美國加息時間表好難估,較以每隔幾個月入一次,有助分散風險,而這房託可以長渣收息的。另外,買入時注意息率,最好有5.5%-6%,如果5%都無,則反映股價開始高。

————————————————

Q406:舜宇光學的質素如何?

龔成老師:舜宇光學科技(2382)生產光學零件,包括玻璃及塑膠鏡片、平面鏡片、棱鏡及各種鏡頭,光電產品則包括手提電話相機模組及其他光學模組,光學儀器包括顯微鏡、測量儀器及其他分析儀器。

近年呢類市場的需求大增,佢的生意亦快速增長,見佢近年盈利不斷上升,股本回報率亦不斷增加。其實呢類仍有增長的動力。

不過,佢市盈率超過20倍,以佢來說已是偏高,最好都係等一等,雖然佢有技術,但唔係無法取代的,加上生意基數開始大,往後增長的比率也不會及之前,如果增長不合市場預期般高,股價就會有調整。

————————————————

Q407:我的強積金由上年年中到現在蝕了過萬元,發現揀任何基金都要蝕,除了香港債卷基金。請問一般打工仔如何做到強積金能夠低風險高回報,唔再想聽到一些基金佬講六十五歲才退休,蝕少少唔緊要,我諗所有打工仔都想做到高位時賣了高風險的基金再買入低風險的基金,到時機成熟才轉回高風險高回報的基金。(可惜強積金不能用價值投資法選擇低風險高回報的基金)

龔成老師:於強積金中,我一直都是100%恆指股票,沒有變過,雖然可以在恆指高位時全數轉做保本,到低位時又全數轉做恆指,但我無咁做,因為我知足高低位比想像中難得多,所以無咁做。

如果你是年輕人,其實有大把時間守,短期賺蝕無影響,因為價格跌的時候,你入貨其實又平了。這是長期策略,只需按年齡層只改變分配比例就可。

年輕時較高風險,到中年時將部分轉到低風險,以一半半的形式去運作,到接近退休時的10年,再進一步減少風險資產的比例,慢慢將整個組合變成絕大部分保本,以減少退休時,不幸大跌市的風險。

————————————————

Q408:想請教下,小朋友有10萬利是,想幫他們投資3年期,買盈富基金,匯豐,平安。

龔成老師:3年不算太長的投資期,我相信盈富基金(2800)是較好的選擇,風險度最低,又有增值的潛力。股市波動,如可以的話,分三注入。

————————————————

Q409:想請教,3322永嘉集團,之前出業績賺6倍。我1.42入左,可以作長線投資嗎?請指點。謝謝

龔成老師:永嘉集團(3322)業務係生產同銷售成衣產品,包括運動服、活動及戶外服裝,及有關配飾。生產分部以原設備生產安排為主,銷至歐美及中國,其生產基地主要位於中國大陸。

2015年度的業績不錯,盈利比2014年升6倍,至2億幾,但要注意,2014年業績較差,因在過往的年底,盈利一般都有1、2億的。

佢擁有adidas、Reebok呢d大客,生意唔洗太擔心,但賺錢能力就一般,因為呢d大公司會食到好盡,只會賺到合理的一份,唔會太多,見佢股東回報率多年只有約10%,只屬一般水平。

你買入時的市盈率約7倍,不算貴,呢類股一般都係6-10倍水平。長線投資價值屬一般般,往後不會有太大驚喜。

————————————————

Q410:你好,想問一下月供股票所造成的碎股是不是不能避免?應該問…即使不能避免,有沒有方法減低因碎股造成的交易費用?有沒有一般參考數字,若包括碎股買賣,通常比正常價差多少?

龔成老師:係呀,不能避免的,但如果係長線投資,例如供一兩年,然後渣5-10年,其實好多野都唔洗理。坊間有些銀行,做月供股的時候,講明碎股可以同市價沽出的。

其實唔洗太擔心碎股,就算是一般的碎股,一般只雖低4-8個價位就可出到(當然較小型及成交小的股票就遠d)。若正股與碎股一同出,就只收一筆手續費,其實個數相差好細。

————————————————

Q411:我現在28歲,早兩年上左3.6m車,做9成按,每月供10000,手頭現金100k到,收入大概20k,我想買股票增值財富,手頭上無股票,有什麼方法。我長目標想一擁三個物業。

龔成老師:首先要令每月可投資的數目達致$1萬,然後投資10%-15%回報的投資工具,很多優質股都有,由於你不懂選擇選擇優質股,故先從盈富基金(2800)著手。另外,由於你未必能掌握買賣時機,建議你以月供的形式開始。

然後在這時候,你要增加你的投資知識,學懂尋找回報高的優質股,同時學懂較佳的買賣時機,這能令你的回報提高。

不過,就算簡單地月供盈富,每月$1萬,一年也有$12萬,加上合理的增值,7-10年內,你能擁有$100萬-$150萬的流動資產。雖然不知這時的政府樓市政策,但你這筆資金,加上已供了第一層樓一段時間,要買第2層樓已不困難。

成功買入第2層樓後,這時會增加了現金流,每月可投資的數目會增加,在買入第3層樓前,再利用投資工具合理增值,要滾出第3層樓首期的時間,會比第2層樓快。當數年後擁有足夠資金,就可購入第3樓層,完成你一生人擁有3層樓的目標。

———————————————–

Q412:十方控股跌左好多,呢隻大上大落。現價可以買黎博返彈嗎?

龔成老師:十方控股(1831)生意一年比一年少,更加係年年蝕錢,完全沒有投資價值。呢類股不會長渣,只會短炒,但短炒非我強項,我亦對短炒有保留。

另外,這股非常多散戶炒賣,你要記住,散戶永遠永遠係輸的一方,所以,凡多散戶炒賣的股票,我都絕對唔會掂。

———————————————–

Q413:龔sir 點睇中國忠旺1333

龔成老師:中國忠旺(1333)生產鋁材產品,分為工業鋁型材產品和建築鋁型材,就算近年國際資源價格大上大落,對佢生意都無大影響,盈利都可以保持上升,算係咁。

不過,賺錢能力較一般,以及規模都唔細,往後會較平穩。

————————————————

Q414:成兄,我在高位入了貨,1928及762,分別係52.3及11.87中服,曾經跌至較低的價位,依家兩隻股都上返30蚊及10蚊,請問我應該放嗎?定靜待佢地上返買入價?

龔成老師:金沙(1928)幾年前係賭業興旺時炒得太勁,所以佢跌唔係佢差,而係之前炒得太勁。雖然我自己都有貨,但我唔認為佢會快速增長,澳門賭業開始好轉,但往後只會平穩增長,中長期上到$40不是問題,但如要返回你的價位,可能要再長時期。

至於聯通(0762),其實之前出左業績一般,短期再上有限,但如果你等得,其實可以等,我又唔覺得呢隻股無價值,不過增長有限,見好就收。

———————————————–

Q415:你好。請問你贊唔贊成投資衍生工具?因為我最近投資黃金 簡稱倫敦金,但我覺得我心態出現問題。經常想多賺點。又心慌會倒貼回去市場。想問如何可以擺正心態 雖然現階段仍未倒貼但仍賺不到多少錢。我覺得我心態有問題遲早本金會全部輸掉

龔成老師:我曾做過孖展經紀,而過往我亦接觸唔少炒倫敦金孖展的客。坦白講,以我經驗及所見來說,我唔贊成人投資衍生工具,亦唔贊成人炒孖展。

當然,玩呢d工具而賺錢的人,的確有,但我以數據來講,以長期計,絕大部分人都是輸多贏少的,你可問問有做過呢類經紀的朋友(但不要問你的經紀),做過經紀的人都明,所有客都係輸多贏少,所以經紀自己一定唔會炒。

孖展同衍生工具的潛在成本都好高,等如你放10蚊去賭場,先比人抽起2蚊佣一樣,長期計好難賺。加上孖展要擁有極冷靜的心態,對賺大錢及蝕大錢都是盲目的感覺,咁先駕逾到孖展波動時的壓力,而做到的人相信少於5%。

————————————————

Q416:龔成你好,我是你讀者,我想出—本關於戀愛的書,這能否找到出版社免費出版嗎?

龔成老師:出書要有幾個大元素:知名度、內容、經歷。如果你本身無知名度,咁你就要有餘下的兩樣,你的戀愛經歷是否好特別?可以吸引到唔識你的人都對你的經歷有興趣?又或者你的經歷都是她們想要的。

另外就是內容是否有實用性,佢地會覺得好有用,而佢一睇d重點就會比你吸引到,舉例說:剩女翻身攻略,外表普通的女仔識靚仔、靚有錢仔攻略,如何吸引男仔追你等等。

其實出版社出唔出,就係睇呢d,佢會諗你本書有無市場,所以寫市場需求的野是關鍵。

———————————————–

Q417:成哥你好,我2015年在高位買左樓,入左市,而家樓市跌左,覺得自己好傻,都幾唔開心,我應如何應對呢?

龔成老師:我覺得你唔洗自責,第一,自責無意思,只會影響我地的思維,第二,無人可以做所有決定都最好,就算有錢人都知,最低買最高放根本做唔到,但佢地就算高位無放,都唔會後悔,都唔會自責。

同埋我想講,呢d錯過機會,「如果當初…」的想法,我都收到唔少讀者同我講,所以做錯決定根本好平常,所以你唔好再停係過去的錯誤,而係諗將來。

如果你自住,其實唔洗理個市,而家美國加息慢,對於供樓來說是好事,因為買樓最緊要係供得起,而家你根本無問題,所以無野好擔心。就算樓市跌,你供得起就得,所以影響你的唔係個市跌,而係加息因素,個市跌對你無實際的影響。

———————————————-

Q418:成,自從睇左你的「80後百萬富翁」一書後,我大開眼界,先知原來睇書可以學到咁多野,你本續集我都睇左,你可唔可以再介紹多d類似的書比我呀?

龔成老師:係,睇書真係學到好多野,所以我自己都不斷睇,我諗我睇睇埋埋都有過千本,以下幾本值得推介,有d可能要到圖書館找:

《我十一歲,就很有錢》
《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》

———————————————–

Q419:想問你對3699 萬達商業係長遠投資方面,有咩評價, 因為此公司開始轉型, 又多地, 又見profit ratio, ROE 都唔錯, 又受媒體追棒… 但係個長期負債增高, Current ration 一般, 應否作長遠投資??

龔成老師:對萬達商業(3699)呢d轉型類別的公司,我通常都會觀望下先,同埋我轉少買呢類公司,我通常穩陣咁買安於本業,而本業又好賺錢的公司。

另外,對於負債較多的公司,我同樣有所保留,所以呢類公司我自己唔會買,就算受媒體追棒都係一樣。所以,你如果睇好,都唔建議大注。

———————————————–

Q420:老師,我請教你880現時值得買嗎?

龔成老師:你問我,我當然認為金沙(1928)好過澳博(0880)啦,但金沙的市盈率長期高過澳博,所以澳博唯一的好處就是唔貴。

雖然賺錢能力不及金沙,但開賭無得輸,問題係你在高位買定低位買,近年賭業不景,令佢都回左唔少,如果你有耐性,其實這股都有投資價值,買入後慢慢等。不過,我自己就寧願等位再加注隻金沙。

———————————————–

Q421:成哥, 我都是80後,我很不開心! 我事業永遠都上唔到岸! 可能我轉工轉得太多!或許我這個人心頭太多! 根本弄到自己不知走什麼方向才好! 我現在在琴行做行政! 是一間細少琴行仔做! 現在因琴行開支問題! 弄到自己要外出多打一份工,意思是做兩個工! 唉! 兩份工合加都是12000元左右! 早上做6:30-3:30茶樓侍應,4:30-6:30做琴行行政! 覺得自己很沒有用!

我本身是在hkma完成了marketing學位! 但覺得讀出來都沒有用!好像什麼工種都好像沒有方向! 在茶樓做侍應,做到成個人很累! 回到琴行又好像都唔知點! 可以說一事無成的感覺很強烈! 在我朋友中, 有一位與自己青梅竹馬的朋友,他苦口婆心說我要有信心和學電腦寫apps, 轉份電腦工作做, 他當年都只是1分會考,但今天的他,有家庭,有私家車,人工很好!

主任級,反觀自己! 什麼都沒有! 成哥,我可以怎樣? 是不是應該在這個年紀再學新野! 拋開舊思維,努力學好電腦! 還是怎樣? 我朋友介紹你這位作者比我認識,我立刻在商務印訂購了你的書! 而你在fb曾介紹一本講財富的書,原來多年來,我都有這本書! 只是沒有認真看過! 我感到人生很不開心! 方向很亂!

龔成老師:我相信你要做的是重整思維,好好想清楚自己想點,你要利用放假的時間,用一日好好去想,自己的強項、興趣、條件、弱點、夢想、目標,自己的因素,外在的環境,唔好一開始就氣餒,慢慢仔細想,每個人都有優點,已擁有的優勢,社會上無話有最好的工,但卻有最適合你的工。

你覺得吃力,是因為你用了大部分的時間去賺取生活費,而最終令自己無時間剩,但你朋友、又或是本人,我們不是用時間換生活費,而是用時間建立財富系統,當你只懂建立生活費時,你會無法剩下甚麼,但當你在建立時,你其實不斷在累積了一些東面,我稱這為資產,這不是一時間做到的,但這就是一般人與有錢人的不同。

你首先要思考自己的強項,然後找一份更適合你、人工較高、或更有前途的工,然後利用這做工餘下的時間,並行去建立生意或資產。同時,由於這工比之前的人工高,你應該可以開始儲蓄,起碼累積到一點財富,但記住唔好心急去炒股,而係要慢慢令財富合理增值,呢d再慢慢學,做左第一步先。

————————————————

Q422:其實咩位置平宜價?你所講的同出面講有d唔同。

龔成老師:我以股票的本質,即是所代表的企業來考慮。股價高低是沒有意思,坊間的單憑股價數字高低,就去說該股是平是貴,是極度極度錯誤的方法!

同樣市值$10億的企業,可以是股價$1,或$100,所以這是無意議。投資者要賺該企業的優質,以及賺錢能力,市值$10億但每年賺$1000萬,沒有特別的資產,沒有太大的增長潛力,這$10億當然是貴。

但另一企業同樣$10億,但每年賺$2億,盈利穩定,這$10億市值就是平。

若一間企業,市值$10億,每年賺錢只有$2000萬,但沒有負債,持有淨現金$15億,這企業現價就是平。

所以,定議平貴是一件不易的事,市盈率是其中一個衡量的方法,但都不全面。

————————————————

Q423:成,經常見到d公用事業加價,這是否代表佢地賺到錢?

龔成老師:係,大致可以咁講,因為有成本轉嫁的能力,可說處穩賺的位置,加上市場結構沒有對手。因此,從生活中選股是不錯的投資法,所以中電、港燈、煤氣、港鐵、領展,都是我推介過的優質股,因為穩賺,有買貴無買錯。

———————————————-

Q424:成哥我想問下,買債券收息好定月供股票好?

龔成老師:「買債券收息好定月供股票」,其實包含了兩個問題,首先要清楚自已想買債券還是股票,第二要知道自己的投資策略,是用一筆過、分段、還是月供。

首先債券與股票,這是不同性質的投資工具,簡單來說就是前者風險較低,有穩定的利息,但大多沒有增值能力,到期只收回本金,適金低風險人士,而入場費往往較高。股票則風險較高,當然擁增值的潛力,部分公司會分派股息,但股息卻不確定,入場費有多有少。

而投資策略方面,視乎你投資經驗與能力,若果你較有足低位的能力,那一筆過投資當然較好,但若然能力只屬一段,其實以月供的方法,最能減低風險。

———————————————–

Q425:龔先生 你好! 本人一直都是你的粉絲,對於你所言的「價值投資法」深表認同。而且亦欣賞你每周的分析。但有個問題想請教一下,你所說的從「現金流折現」方法去評估/找出該公司(股票)的價值作參考,這方法不太明白。盼賜教,謝謝!

龔成老師:這方法是最正統計企業值多少錢,出面的專業估價都係用呢個方法,但呢很方法卻最複雜,所以會用市盈率代替。

現金流折現係將企業往後所產生的現金流折現後相加,例如往後3年的現金流是:$1萬,$1萬,$1萬,而這企業做3年就無價值,這企業的價值就是這3個數相加,但由於有通脹等因素,所以下年的$1萬只是現在的$9500,再下年可能是$9000,那麼這企業的價值是:10000+9500+9000=$28500。

我用《80後百萬富翁》其中一節說明:
___________
現在以大家較少接觸的市區的士牌作例子,看看如何評估出這投資工具的合理價值(以下例子將會化繁為簡,例子只想帶出基本的概念),擁有的士牌(連相關所需),就可以將的士出租,以香港市區的士為例,每更可收到約三百多元的租金,扣成本後,即平均一天的淨回報$600,一個月$18,000,一年的收入就是$216,000,由於租金回報穩定,可以用5%的折現率來估值,假設每年收入不變$216,000,並一直收取。估值就是$216,000+$216,000÷(1+5%)+$216,000÷(1+5%)2+$216,000÷(1+5%)3+…一直加至無限,可運用數學的公式化成$216000÷5%=$4,320,000,這就解釋到的士牌這麼貴的原因。但要注意,這只是一個估計的合理價值,由於預估現金流,折現率等因素將會令最終估值有很大的差異,初學者運用時要很小心。

_____________

基本上,所有資產都是用這方法計,企業價值都是,但當中有兩個變數,就是預估的現金流,以及折現率,這是十分複的問題,所以我現在亦較少較學生用這方法,反而多教他們用市盈率。

————————————————

Q426:成哥,想問問債轉股點樣影響內銀股?謝謝。

龔成老師:債轉股呢個只會令內銀帳目上靚仔d,唔會有太大的實際作用。當一間企業欠銀行錢,去到要債轉股呢個地步,呢間企業當然唔係好野,轉左股票只係唔想企業破產,但存在係度的作用有限,銀行持有呢d股票,根本無太大價值。

不過,內銀雖然有壞帳問題,但市場對佢這方面已反映了,我不認為內銀太差。

———————————————–

Q427:現時差不多日日就有港鐵和領展加價令小市民苦不堪言的新聞出現,其實是否不問價買入這兩隻股票便可抵銷不斷瘋狂加價對日常生活的影響呢?

龔成老師:持有可以抵消部分的數,但由於佢地的股價都會波動,所以要以合理價買入,先可以做到類似的效果,因為若高位入,股價會跌,息率亦不吸引,咁就做唔到件事。不過,呢兩股本身優質,有長渣的價值,只要股價合理就可買入。

其實你的概念正確,但要計好條數唔易,不過以另一面角度,即企業家的思維去找股票、找資產,就可以知道那些是優質的。

而其實你可以以財富概念去思考,即係令自己整體財富增值,在資產增值上及產生的現金流上,整體能對沖到日常的通脹,呢個就係較易衡量的做法。

———————————————–

Q428:成哥,坊間有咩基金有5,6厘?

龔成老師:我知坊間有的,但你要問的投資顧問,因我沒有銷售產品,具體不太清楚。而股票市場上,不少房託,以及公用股,及一些收入及派息穩定的股票都有的。

———————————————–

Q429:你好,請教一下,我40.05持有友邦,目標應該睇幾多?

龔成老師:友邦保險(1299)本質不錯的,但近年的業績略有回落,不過我長期都對佢看好。佢有品牌,有銷售網絡,而具保險股本質不錯,但唯一較弱的,就是股本回報率不算強,每年只有10%,只屬一般水平。

我投資股票通常沒有目標價,但這股都可長期持有,連股息一年回報一成,我相信這股是可以的。

———————————————–

Q430:想問下你對外幣有咩諗見 覺得而家買咩紙較好?謝謝!!!

龔成老師:我自己對外幣有少少保留,因為外幣唔易玩,而且貨幣不是真資產,不具長期升值的前題,所以往往以週期的形式去運行,要捕捉不易。

當然,不少外幣都跌至較低水平,若果你日後有用,又或想利用外幣作資產分配,其實是可以投資的。

———————————————–

Q431:成哥你好。本人月入27k, 扣除家用及生活雜費後一個月大概可以蓄12k. 睇過你的文章都受到啟發,希望能夠把握青春努力理財。

投資方面我都係個初哥,主要持有883中海油同939建行。雖然不是以短期投機為目標,但最近市場波福大,你認為以上的估票是否值得長期持有的優質股?

龔成老師:中海油(0883)同建行(0939)的本質都唔差,可以長期持有,但股市波動,你要明白中短期股價上落是必然的事,所以要學會忽略短期股價。

另外,建議你不要集中在兩隻股票,因為你的投資能力仍有限,適當分散風險是必需的,你找優質股的方向已正確,之後的資金可投資其他股票。若你不懂找,就投資盈富基金(2800)。

另一方面,由於你的投資經驗仍少,對股市波動的見識仍不多,有可能會在日後高位入貨,所以建議你多用平均入市法或月供股票,減少一次過在高位買入的風險。

另外,知識是非常重要的,投資及理財對你來說都是新的範疇,你要多看書及上相關課程,這對你長遠來說是更重要的。

———————————————–

Q432:成哥,我是你的長期讀者,我想同步跟你買賣股票,可以嗎?

龔成老師:其實我之前都有po我的投資記錄上fb,1211同1928買入時都有po,其實你可以跟。當然我唔係次次po,但我po得上fb的,其實都是有信心,不想讀者輸錢的。所以你多留意我的fb就可。

若要了解我之後的投資動態,咩貨可能入,其實都會係投資講座度講,有興趣可留意下我的講座及課程。

———————————————–

Q433:你好 龔成 我係$1.18入左493國美電器 請問前景如何?

龔成老師:國美有品牌,有網絡、物流系統,但國內市場競爭激烈,網絡的興起,加上這企業的賺錢能力只屬是中等,整體來說是不過不失。

另外,由於企業規模大,當遇上市場不景時,難以在短期作出反應,若往後中國的消費市道繼續疲弱,對國美亦會有所打擊,所以中短期的股價只會一般。

你的買入價並不算貴,長遠價值雖有,但此股增長有限,往後以平穩形式增長。

———————————————–

Q434:Hello,我睇左你的書有好大反思,想創造更多金錢,尤其欣賞當中投資唔係睇短線,找尋有潛力的股票,以作長線投資,亦明白當其他人恐懼正是入股的最佳時機,令我改變了對投資的想法。請問有沒有好的投資工具,書籍,課程可以介紹呢?因為我完全是零知識。

另外,你會開關於投資的課程嘛?By小粉絲

龔成老師:其實要學一樣野,真係多接觸,多吸收相關知識,下面的書都好正,另外,你平時都要多吸收財經資訊。
《我十一歲,就很有錢》

《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》

坊間都有唔小講座課程,去多d對自己有益。我自己6月都有課程,你可留意下

龔成講座:【通往財務自由之路】
日期:6月4日(星期六)1500-1800
連結:https://80shing.skx.io/courses/6259629621248000

龔成課程:【投資倍升股課程】(共15小時)
日期:11/6、18/6、25/6、2/7、9/7(連續5個星期六1500-1800)
連結:https://80shing.skx.io/courses/6203837727637504

———————————————–

Q435:龔成你好。我買左隻460,之前升到2.59冇走到,而家跌返哂落黎倒輸,其實你點睇呢隻??因為醫療係內地都算重點

龔成老師:四環醫藥(0460)算是一般,雖然醫療係重點,但藥業股本身是較高風險的行業,無論是短炒定長渣,都要花多點時間去分析,當然風險高意味著潛力大。

———————————————–

Q436:成哥,你成日話盈富買得過,咁幾錢先值得入?

龔成老師:買盈富即係買恆指,恆指市盈率在長期多年計處8倍至24倍水平。當恆指20000點時大約9倍市盈率,只要忽略中短期波動,其實10倍率盈率以下都入得過,長期看唔貴。

———————————————–

Q437:龔成你好。如果一隻股票pe及市賬都較高,但每年收入都有增長 我係唔係應該忽略pe同市賬?

外在價值會反回內在價值,咁如果佢雖然每年有增長,又會唔會因為pe 市賬太高 會跌番去原本個位?

龔成老師:市盈率係過去一年的盈利除以現股價,所以呢個「過去的盈利」要有代表性,當一間企業的盈利變化不大時,市盈率的作用很大,但當該企業正處高增長期,過去的盈利往往未必適用,這時要估計一下將來的盈利,以預估市盈率作參考。

如果估計佢盈利每年以超過50%去增長,基本上可以不理過往市盈率。若企業每年都有20%以上的增長,市場一般估值較高,20倍-30倍的市盈率仍會覺得合理,如果這企業之後的盈利合符這市場要求,這個較高的股價就得以保持,但若果出來的增長不高,即是這股「受不起」這個高市盈率,結果就是股價下跌。

至於市賬率,參考價值只屬一般,賬面值是會計上的計算,計這企業值多少錢,可理解為假設企業清算,值多少錢。但企業最重要是持續經營,即是將來能賺多少錢,所以參考價值只算一般,同時往往要看該企業處那一個行業。

————————————————

Q438:您好,早前講到新鴻基地產16,低價應吸納,即應在什麼價格入貨,和長期持有,要數年嗎?

龔成老師:其實新地(0016)在$100不算貴,當然香港樓市正調整,這會令股價下跌,但這只是中短期,所以要睇你有無耐性等股價跌。

長期持有一般要3年或更多,因為原理不是炒買賣差價,而是長期持有企業,享受這企業本質的優質,令其在大環境中不斷發展,憑企業成長令股價上升,所以要有耐性。

————————————————

Q439:龔成師兄,想問下隻海通證券的投資價值如何?

龔成老師:海通證券(6837)唔係唔好,但生意的波動性太大,證券業本身生意已經波動,加上在中國這個投機大國,結果可想而知,好景時大賺,不好時可以大蝕,無得評估實質價值,加上之前證券熱炒,凡熱炒、多散戶買的我都無興趣,所以吸隻我唔會買。

不過,我咁講唔係話佢唔好,只係好難分析,所以我唔買。

————————————————

Q440:你好,龔成。小弟十分認同你的投資態度。看過你的兩本著作,相信在投資上努力加知識絕對可以成功的。

小弟是公務員,人工23k左右,晉升機會不大,往後人工都大約這個數字。住公屋,暫冇置業壓力,財務狀況 現金約100k 股票 60k 左右(5,939,2823,1816)

小弟經歷兩次金融風暴,第一次太怕,所有貨沽清,蝕了多少就不知了,最近這一次就繼續持貨。現在蝕20k左右。每月儲蓄連保驗大約8000+4000,我在節流方面也控制得到(有記帳)。每次買股票都沒做足功課,全部坐艇中。小弟想重新自學投資,應從那兒著手?有何書籍介紹?最近也有學習股票期權,感覺上比股票安全些,對嗎?我的目標是五年內儲一百萬。

龔成老師:你有手持的股票不算差,但只屬中等的優質度,建行(0939)算是較佳,中廣核電力(1816)就一般。

以你的收入來計,儲蓄連保驗的數目略高,不過唔緊要,如果你偏向低風險,而你又了解左你所買的項目的風險是適合自己的話,那繼續都無問題。由於你無置業壓力,所以只需保留6個月生活費,其餘的都可視作閒錢,用作投資增值。

以你收入及儲錢情況,要5年儲$100萬其實是可以的,合理儲蓄,以及平穩投資已可。

有投資股票方面,記住不是短炒賺差價,而是以合理價投資優質企業,而這企業長期成長帶動資本增值,坊間的確係好多股票書,但好多所講的都似是而非,所以我只信憑買股真正賺錢的人,若你有觀察佢地,佢地都係視買股如買企業般,長線投資,所以當你找投資書時,這是方向。

巴菲特的書絕對要看,另外,《非常潛力股》、《彼得林區選股戰略》都值得看。

我對期權有保留,不作評論。

———————————————-

多謝各位提問,若然你有問題想向本人發問,可在本人的facebook專頁中(www.facebook.com/80shing)inbox我,但要注意如無特別聲明,我有可能將問答放上網的,當然,我會將發問者的身份,以及有關個人的部分刪去。

另外,由於提問人數眾多,見諒我無法即日回覆,如果是普通的提問,預我起碼要5天以上才能回覆,若然是較複雜的提問,起碼要10天才能回覆,希望各位能諒解。