龔成問答信箱(Q441-Q480)

龔成問答信箱(Q441-Q480)

Q441:龔成,你好,小弟今年還是在讀中一。我想問,我們小朋友徐左讀書,為未來開路。還有什麼方法開路

龔成老師:讀書是大路及較穩陣的方法,當然不是唯一的方法。

首先你要想想,你將來想做甚麼,以你這個年紀,已開始可以想這個問題,你想你的一生怎樣過?你想做甚麼職業?你想成為甚麼?你的夢想是甚麼?

可能對你來說,這些問題較難入手,但你可從以下的方向著手協助你思考:

你的興趣、強項、你喜歡讀甚麼、做甚麼、有沒有崇拜的職業?你的偶像是誰?你做他的職業嗎?

簡單來說,就是了解自己,這並非是一個容易的過程,但你終有一天都要想的,若果你不認真想,往往只會無無聊聊地過左一生。

當你想到你想做的職業,接下來你便能自己答到你問我的問題。例如你想做銀行家、做企業家、做運動員,你就可以找資料,了解在香港,在這些範疇成功的人,他的心路歷程是怎樣的。可能他們中有人是不用讀書,但他卻擁有其他的知識,又或經過比讀書更艱苦的路,所以你要了解現實的情況。

如果你想為未來打算,在這年紀最重要仍是讀書,但在讀學校書本的同時,可同步學習一些你想發展將來職業而要的知識或技能。

如果你是因為怕辛苦而唔想讀書,我可以話你知,現實中的確有人唔讀書都可以好成功,但佢地係現實中經歷的辛苦,肯定比讀書時還多,同埋佢地往往擁有某些獨特的技能。所以,如果你唔肯定自己係咪擁有呢D技能,令你係社會上較易獲得成功,讀書以獲個社會上基本的入場券,相信是正路的做法。

————————————————

Q442:龔SIR,你認為創科好嗎?呢隻股買得過嗎?

龔成老師:創科實業(0669)係優質股,佢同美國樓市的相關系數較大,而家的美國樓市已走出谷底,而房屋的銷售亦保持上升,係可見在未來美國經濟向好下,此企業的生意將保持增加,行業有望開展一個上升週期。加上佢擁有不錯的品牌、擴展中的業務,所以唔差。

雖然此股優質,但市場的估值經常處不低水平,好多時處20倍以上的市盈率,以創科的規模來說,增長不會太快速,故20倍以下才擁投資吸引力,但這股都可留意下。

————————————————

Q443:我想問點養成蓄錢習慣?

龔成老師:記得自己的收支,以及資產狀況,起碼要每月記低,當你見到自己每月都因為花錢在無意議的事,而令自己財富多月都停滯不前,你就知自己要儲蓄。當你養成每日記數後,我背定你會自然儲錢。

除此之外,定明確的儲錢目標、不用信用卡,分清想要與需要,都是有效的好方法。

————————————————

Q444:龔Sir,我係30.5入左金沙,雖然我想再入,但比起你的買入價可能高左小小。而家升左上去,若果而家走先,然後再等低入,到你所講既28蚊是平宜價再入返,這樣是好方法嗎?唔該!

龔成老師:我唔覺得$30唔貴,雖然不是平宜,但都算合理,所以唔洗放。雖然短期股價有上有落,但無人知佢會唔會落翻去,所以當你放左後,佢又可以升左,咁到時點?

所以,放左先等跌再入,看似是好策略,但實際操作好難,所以唔建議。除非股價處過熱水平,股價比合理值超過一倍,這才會先行沽出,等待股價回至合理值時才再次買入。

————————————————

Q445:龔成老師你好,我$6.5買左港燈到現在,股價已去到$7樓上,我放唔放好?

龔成老師:雖然我覺得$7的港燈(2638)唔算平宜價,但其實你唔洗放,因為放左無人知買唔買得翻,港燈有質素,長線持有收息都唔錯,建議你唔好理中短期的股價。

除非你放左後價位上賺左好多,可以抵嘗好多年的股息,咁先至會考慮。

————————————————

Q446:成兄你好,你怎樣看576這股價,可買嗎?

龔成老師:浙江滬杭甬(0576)主要做設計、建造、經營、維修及管理高等級公路,開發及提供配套服務,亦有提供證券經紀服務及自營證券買賣。

本質較穩定,生意同盈利都有增長,算唔錯,加上派息穩定,就算收息都唔錯。不過要注意,雖然股價從高位跌左唔少,但息率經常只有5%,吸引力只屬一般,如果等股價再跌多D,等息率有6%以上,相信投資價值會太D。

————————————————

Q447:成哥,我係富二代,我仲讀緊書,但我唔想做廢物富二代,我想超越我阿爸,但我讀書同體育都唔好。我對經濟等有D興趣,我應點做?請教!

龔成老師:我明白你的情況,你一句「要超越阿爸」,我睇得出你唔係某些一事無事的富二代,而係一個有用、有目標的人,只係你呢一刻未清楚。

首先,你要找到自己的夢想、興趣、強項、目標,先知道條路點行,你對經濟有興趣,你其實有幾個方向。

1.如果你老豆有公司,你大個可能會入去做,咁你要學的就是「生意」、「管理」,呢做方案你要讀書,最好選商科,入工商管理。同時有時間自己試下搞小生意。

2.你對做生意可能有興趣,這可能是你將來的發展,你而家已經可以試下做小生意,客戶是你的同學,我自己都係小學已自己做小生意賺錢。

3.你對投資方面有興趣,而家你可以從學校及以外去學,學校方面,就是讀商科,經濟、會計、商業理論,都係對投資有用的知識。以學校以外,就是自己主動睇多d投資書,甚至可聽下坊間的課程講座,認識左基礎後,叫個大人幫你開個投資戶口,細細地玩下,訊識咩係投資。

憑你一句「要超越阿爸」,我知道你將來可以有成就,問題係你點樣行呢條路,重要的係你要保持這樣的一顆心,你就總會做到的。

我強烈推介你睇幾本書:

《洛克菲勒寫給兒子的38封信》
《我十一歲,就很有錢》
《富爸爸,窮爸爸》
係呢幾本書中,你會找到你人生的方向,以及成功的方法。當然,你有興趣都可睇埋本人的《80後百萬富翁》,對你都有幫助的。

————————————————

Q448:對資金不足的人,約二十萬,應該如何起步?先投資什麼?將資金投放在哪裡才有高增長?

龔成老師:其實這要睇你的是否閒錢,太多人太心急去增值,用盡所有資金,這不是理想的做法。因為投資要合理增值,就要長線,如果那筆錢準備一年後買樓,那當然不是閒錢。

若果那筆是閒錢,而你又不算年紀大,其實可以用先增值,後平穩的方法,即是先將資金投放在潛力較大的股票中,待收成後,才慢慢將資金投放於潛力較低,但較穩健的股票中。

所以對你來說,平穩增長股是適合的。

————————————————

Q449:金沙巴黎人已開幕,前景比起其他賭場例如銀娛或新濠佢地既前景會,請問你會覺得更優勝嗎?

龔成老師:其實銀娛都有持續投資,所以金沙同銀娛都有前景的。簡單來說,在這兩年的澳門不景期,佢地無停止過投資,過百億的投資不斷進行,就知管理層唔係睇得太淡。

當然,澳門過往增長太快,之後會進入平穩增長期。

————————————————

Q450:成我真的很欣賞你,我經歷了低潮,我睇唔起我自己,我睇你的文令我重搭動力。我已經買了你的兩本書。我會用心去看。不會浪費你的心機。也希望成功。我的目標也是五年內有100萬。

龔成老師:加油,其實成功與否,關鍵唔係你的際遇,而係你用咩心態去面對。只要你keep往而家的心態,你已經同過往唔同,加油!!

————————————————

Q451:成哥,你好呀。其實我之前都有follow開你的fb,見到你的言論有時感觸很深的。我是做紙媒記者,眼見大部分紙媒一間一間摺,您覺得以這樣的趨勢是否應該及早轉行為佳?但記者這個工作亦可以說是我一直很想做的工作。感激

龔成老師:的而且確,紙媒唔係太睇好,長遠的生存空間少,職業可以影響一生,的確要認真思考。

我覺得你宜用做住先的策略,比幾年時間自己跳出去。如果我係你,我會利用記者的身份不斷建立人脈網絡,呢D係重要資產,同一時間建立生意,呢盤生意可以利用呢D人脈資產的。就算你唔做生意,呢D人脈他日都可能有用,所以不宜立刻跳出去,原工作對你前途有用的。

如果你唔想做生意,就要思考下,除紙媒外的其後出路,你中意做記者,但未必一定要停留在紙媒,紙媒減少不等如記者要減少,所以你要了解下記者的其他出路,我覺得完全轉行不宜,所以最好找相關的,了解下個行情先。

————————————————

Q452:成哥你好,我六七年前買入3988共32,000股,多年來只收息都不看升跌。但最年的債轉好像另此股前景不太明朗,想問問您的睇法,應如何部署?謝謝

龔成老師:的確有點影響,但我相信問題不算太,不用太擔心。其實內銀一向都有壞賬問題,所以這令內銀市盈率往往只有5倍左右。

債轉股,就是將有問題的債轉做股,其實問題都是存在,由原本收不到的債,變做無價值的股,本質上不大分別。當然這可能鼓勵了不良貸款,但這暫未成為問題的核心,大部分公司,都是想營運賺錢,而不是想比人吞併。

中行(3988)本質不算差,雖然增值能力有限,但收息不錯,你投資的目的是收息,其實可以繼續持有。不過,我不知這股佔你股票組合多少,因為所有銀行股(無論是內銀還是國際銀行),都同樣面對金融系統性風險,所以不要將資產太集中在銀行股之上。

————————————————

Q453:成哥,我想問長線既2333長城汽車同1685博耳電力,兩隻邊隻會較有成長能力及潛力?

龔成老師:長城汽車(2333)同博耳電力(1685)的性質有點不同。長城比較優質,但已較大隻,處較平穩增長期,適中低風險的投資者。

至於博耳,市值細,盈利波動較大,因為預期往後的盈利增長將不及之前。加上股價波動大,多散戶炒,適合中風險的投資者,當然股價的潛在升幅亦會較大。

————————————————

Q454:成哥,我聽你推介買左隻港燈收息,如果而家放都賺唔少,你話我放唔放好?

龔成老師:首先港燈(2638)是優質股,持有一世收息都可。如果你喜歡持有現金多於一個產生現金的資產,你可放,但我不太建議。

關鍵是考慮兩者的機會成本問題,我地無人會知,放左之後何時,以及會唔會落翻去之前的價位,你要諗,如果落唔翻,所賺的現金,是否足夠抵消往後收息的現金流。

如果你賣出後所賺的錢,多於往後5年的股息現金流,咁就值得放。

————————————————

Q455:成兄,想問699點睇?

龔成老師:神州租車(0699)佢提供租車服務,句括短租、長租同融資租賃服務,發展中國短租自駕市場,佢亦通過網上銷售二手車。

佢近年增長得好快,雖然早幾年仲蝕緊錢,得近一兩年已大賺,不過生意模式有待驗證,暫時未完全完善,盈利仍然不穩,雖然這刻估值不算貴,但略有風險。

————————————————

Q456:龔老師,想問下息率點計?派息除以股價?就派息來講,依家買tcl 2618係咪應該算唔錯?

龔成老師:息率用近一年的股息總和,除以現時的股價。所以當股價升,股息率就變少,吸引力減少。若該企業之後的派息增加,息率就增加,吸引力提升,就會帶動股價上升。

TCL通訊(2618)若果用近一年的派息計算,2015年中期息派$0.128,而2015年度未期息派$0.21(這未期息會在2016年8月派),即是一年合共股息為$0.338,佢近期股價處5蚊上下水平,若用$5計,息率就有6.8%,算係唔錯。

不過投資者亦要注意,這企業往後的股息怎樣,若果企業之後減股息,那麼之後的息率就會減小,就會與原有期望的不同。所以在分析時,過往的息率只是其中一個指標,企業往後的前景與派息,同樣是分析的重點。

————————————————

Q457:你好,因近期多留意價值投資的理念,亦偶遇上到你的文章,所以想請教一下! 近期在留意國泰(293), 見價位不高,又見你上年的一篇文章-“週期股的投資技巧–國泰航空”, 如作中長線投資,現價位算是吸引嗎?謝!

龔成老師:坦白講,以整體來說國泰的質素只屬一般,雖然佢本身唔差,但航空業太受油價影響,這令國泰有點不利。當油行高企時,國泰無論點做對沖,出來的業績都是一般,所以盈利的保障程度只係一般。

所以國泰不合太長線持有,反而可以利用週期,作中線投資,睇翻佢盈利:由2012年低位的幾億盈利開始上升,去到2015年盈利有$60億,這是承油價下跌而產生的,但問題係油價再跌已有限,國泰的盈利再升都有限。

國泰市盈率8倍並不高,反而擔心油價進入平穩上升週期,這令國泰的盈利上升週期已差不多。不過,8倍的市盈率已反映這點,只要油價沒有急升,其實這股已經存有值博率。

————————————————

Q458:成哥你好,本人今年28 ,年尾結婚 ,並唔打算生小朋友 ,所以年老時就要自己養自己 ,諗住靠股息黎做老年既生活費 ,一年前開始月供2800, 家陣想供多一隻 應該揀3定6或者66好?

3同66有壟斷優勢 ,其中3又有紅股 ,但66前景應該比3好 ,6仔就有大量現金要黎投資,前景好似都唔錯,真係好難揀 求指教

龔成老師:如果你只係28歲,目標係他日靠股息生活,其實可以用先增值,後現金的方法。因為你現時未需要現金流收入,反而財富增值的需求較大,所以先將財富增值,到增值後,到年齡漸大後,才慢慢轉到有現金流的資產,策略上會是最好的。

其實你所選的三隻:煤氣(0003)、電能(0006)、港鐵(0066)都係優質股,都有這效果,而在前景方面,我略看好港鐵(其實三隻都唔錯),香港發展將愈來愈靠鐵路,港鐵更有沿線物業發展權,地產長期計我一向睇好,加上港鐵有成本轉嫁的能力,雖然現價不算平,但由於你做月供,所以價格將平均,因此個人略為偏向選港鐵。

————————————————

Q459:每年10%回報率,怎做到?可否俾些提示

我計過,如果我現在有160萬現金,第一年10% 回報係16 萬,每個月要有13333 。好似好多

龔成老師:就以港燈(2638)來說,派息6%,只要股價每年升4%,已經有10%回報,當然要睇買入時機。

我阿媽目標係收息,我同佢買港燈,我係$5-$5.5之間同佢掃貨,買入後諗住永遠持有收息,佢D股息率不斷增加,2015年度合共派息$0.4,即係話佢收息都有7%、8%,預計之後慢慢增加。

仲未計股價上升的賬面回報,隻港燈現期升到上$7,股價升值的回報已有3、4成,不過我同佢講,唔好放,一直持有收息。

如果你有跟開我每星期分析的一股的文章,你會發現唔少股都有6%息,只要等到個靚位入貨,要有7%、8%息唔難,連股價的升值計就更高了。若選一直持有,只有選一些股息會穩定增值的,過幾年後有10%息不難。

另外,我6月有課程,股票班有講唔少收息資產,運作原理,投資時機,你有興趣可睇睇

龔成講座:【通往財務自由之路】
日期:6月4日(星期六)1500-1800
連結:https://80shing.skx.io/courses/6259629621248000

龔成課程:【投資倍升股課程】(共15小時)
日期:11/6、18/6、25/6、2/7、9/7(連續5個星期六1500-1800)
連結:https://80shing.skx.io/courses/6203837727637504

————————————————

Q460:本人為股票新手,近期讀完你的著作,獲益良多,希望開始投資

最近留意到00509 世紀陽光 ,看了它的財務報表,除了上2015因收購權智而利潤下降,其餘的業務 如農業肥料 及 金屬 皆有不錯的發展。現時它的市盈率只有6左右,它的股價有否比低估?值得持有嗎?謝謝

龔成老師:就投資新手來說,世紀陽光(0509)未必是初階者適合的投資,因為分析不易,波動性不低。

世紀陽光主要從事有機肥、複合肥、生物農藥、原料及金屬鎂相關產品的生產及銷售。可以話係做研發、生產同銷售生物有機肥料為主業的現代農業產業化公司。呢類股的估值不易,盈利變化大。

的確,以市盈率計佢唔算貴,但內地農業股過往有不少問題,如歐亞農業被除牌,超大現代(0682)停牌幾年後股價跌9成,內地農業股都有一些風險。而世紀陽光研發亦存有風險。

就優質股及長線投資來說,這股不適合。

————————————————

Q461:成哥,想問下8號仔長線現價入ok ma? 看好他的viu tv

龔成老師:電盈(0008)的市值有$400億,當中包括很多業務,而電視廣播(0511)的市值不足$150億,每年獲利十幾億。

你可以假設一下,viu tv可以做到有多大,相比起TVB,可唔可以欏到4分1市起份額?如果可以的話,又可以貢獻到多少盈利呢?你要理性分析一下,viu tv可以賺到幾多錢,又或最理想的情況可以賺到幾多錢。

你會發覺,當TVB每年都只係賺十幾億的情況下,viu tv最理想也是數億(當然,若日後愈開愈多台,可以取得一半的佔有率又另作別論)。

當你分析到新台為電盈賺多少的情況,而過往電盈憑原有業務,本身每年賺約$20億,你可以計到對其實質價值不會太多,起碼在這一刻不算多。所以,要看你自己對viu tv有多看到,以目前情況,對電盈的價值提升作用不多(因為電盈原有業務唔算細)。

————————————————

Q462:成哥,我只注重平穩收息。我是否陽光房地產 and 港燈就等6厘開始慢慢吸。華潤電力就現在5.6厘開始吸?

龔成老師:你主要問左兩個行業,地產行業及電力行業,陽光房產(0435)本質不錯,有一定的股息,但股息來源是租金,香港租金有機會回落,雖然不多,但有可能令這股的股價回落,所以這股較好的策略是等香港租金跌多少少,然後先入這股。因香港租金長遠總上升,所以可永遠持有收息,原理同買樓收租一樣。

至於港燈(2638)同華潤電力(0836)則為電力類別,兩者的分別在於股息的穩定性及潛力,港燈的業務不會增長,但就相當穩定,股息會平穩慢慢上升,收息不同擔心。

華潤電力的潛力則較大,你睇翻佢5年前的股息只有現時的一半,反映有較大的增長動力,當然,當中的不穩定性會較大,當盈利下跌時,不排除會減少派息,所以看你想買甚麼。

————————————————

Q463:成哥你好,小弟行年20,月入約13000,希望五年後有50萬以上作置業結婚之用。

我本身係投資方面經驗不多,所以只選擇了月供2800作投資(每月3000元),想請教成哥,我仲可以做d咩投資幫到我資產增值呢。謝謝。

龔成老師:每月儲$3000,一年約$3.6萬,若果要在5年後累積$50萬,每年的回報率要超過30%,呢個回報率其實唔易,除非把握到一些大跌市大升市的買賣機會,否則做唔到。

所以建議你每月仍然保持供$3000盈富(2800),但同時要投入更多資金去其他的工具上,最好每月另外投資多$3000,可能對你現時的人工有點吃力,所以你要在這一兩年內,盡快提升額外收入,又令自己加人工,你還年輕,有這樣的能力。

至於這筆額外的每月資金,可投資平穩增值的股票,雖然你年輕,但由於你打算5年後要用這些資金,所以不建議買高風險的工具,故平穩增值較適合你,可月供多數隻這類的股票,如港鐵、領展、六福、金沙、中銀等,穩中求勝。

————————————————

Q464:成先生你好,小弟今年28同朋友一齊創業開店自僱,成績不錯,一年內我們又在決定擴充並搬至理想地點,現位置不理想。跟銀行各再借了10萬作為新鋪開業成本,本身已負債,但一直計算埋還款都收支平衡。扣除成本仍有盈利。有甚麼意見能給我們?

假設我想借中小企貸款作為公司的現金流,或用來買入一些我們認為有前景的股票,有人會這樣做嗎,風險高嗎?你怎樣看Tesla motors 這支股票,因我們做的生意經常接觸到他們。謝謝賜教

龔成老師:我認為你們應專注本業,唔應該將借來的錢去買股票,而借來的錢可能第日有用,若不幸當然股價跌左,到時放唔放好?

做生意同買股是有點不同,有唔少老版就係玩一個不在行的範疇,甚至將公司上市後,炒翻自己隻股票,最後將自己D股票抵押埋,股價跌被斬倉,公司被人食左。

所以,你而家最重要係搞好自己間公司,到真係有閒錢剩,先用來買優質股長線持有。

你想開分店,如果地點唔好就慢慢找,唔好找一個不適合的地方,因為投資唔少,做錯了會錯過發展機會。你生意上接觸Tesla,可能你做緊一D新興的生意,呢D生意一定要快D搶地盤,唔夠快對家就搶住做。

至於Tesla motors呢隻股票,與比亞迪(1211)一樣我都係睇好的,有前景,但要注意股價波動,雖然有人話佢兩間係競爭對手,但我反而興得佢地共同做大個餅,兩隻都有投資價值。

————————————————

Q465:成兄,我想問電腦程式也是不是資產?

龔成老師:電腦程式可以是資產,但關鍵是能否市場化,其實所有程式、藥方、配方,都可以好值錢,又可以唔值錢,關鍵是能否定位在市場化。

舉一個藥方的例子。可樂的配方原本只是藥用,但後來持有人將可樂的配方以$500美金賣出,之後就用作汽水,創造巨大的價值。所以,你要諗將個程式放在那裡?如何定位?如何找到真正需要他的客戶。

————————————————

Q466:成哥想問2萬蚊有邊隻好/穩定 ,現在的 005、渣打好嗎?

龔成老師:滙豐(0005)比渣打(2888)穩定,當然渣打潛力高。但就派息而言,匯豐會較好,就長期時言,兩隻都唔貴,但要忍受中短期股價波動。

其實有不少公用股收息都唔錯,但有些不算平的水平,如港燈(2638),所以如等到低少少入就更好。

————————————————

Q467:你好 龔成兄!小弟拜讀了你的著作後 十分喜歡 也決定儲錢投資!想問你對2333 長城汽車有什麼看法?我買入後佢股價一直下跌,因此很擔心。謝謝!

龔成老師:其實長城(2333)的本質唔差,過往的生意都唔錯,賺錢能力都唔差。其實佢近一兩年跌左好多,市盈率已經去到不貴的水平,已經反映了內地經濟的放緩因素,此股具長期的投資價值,不用擔心。

反而你的心理質素要較大的訓練,其實股價中短期可以因各種因素而波動,未必一定有合理的解釋,可能是市起情緒、版塊間的資金流向,短期的各種利好與利淡消息。

坦白講,我認為股價波動10%是很普通的,這是短期內經常發生的事,你要冷靜應對這些感覺,你絕不能被心理因素牽引了你的投資決定。

————————————————

Q468:你好,我今年20歲,之前暑假遇上”港股大時代”而開始研究股票,並在暑假本身研讀多本投資書籍. 一轉眼就快一年了,自己憑著4萬蚊本,只賺了4000多。可惜身邊的大學同學對股票並沒興趣,認為股票的危險的,是騙人的.個個只想畢業,找份好工.

我想找個人生導師指導我未來應該如何走,希望在畢業前找到目標和方向。請問你有什麼建議給我嗎?謝謝

龔成老師:你要從你的興趣、強項、想成為甚麼去思考你將來的路,這不是不件易事,所以很多人都逃避思考這個問題,以至最後一世人都唔知自己做過d咩。

其實理財對每一個都十分重要,而在理財中,股票是十分重要的工具,所以,認識股票是必需的。

但你有一點要知道,坊間的買股賺差價概念並非真正的投資,長期計亦無法令你真正賺錢,所以你要學懂分懂知識真偽的能力,你讀大量的投資書是正確的,但當你累積到一定的知識後,你應該懂得分可為投資的真知識,何謂投資的假知識。

如果你有睇過投資大師的書,如巴菲特的書,你就知道真正賺錢的投資方法,原來與我們無日電視報紙上接觸的方法大不同。

建議你保持學習,睇書、上堂、實戰,保持思考。

———————————————–

Q469:我只是一個新手投資者,在看過你的2本百萬富翁的書,當中知道要明確定下一個目標,假設我定下的是要3年後要有100萬資金,如我有10萬元可投資資金,按照你的價值投資法去做,又假設我購入的是你經常提及的比亞迪及金沙,以假設價格比亞迪35元買入3手,即52500,以28元買入4手金沙,即44800。

假設我耐心持有1年半的時間,以60元及40元沽走所有,總獲利是6萬元左右。依照以上假設,雖然加起來有6成的獲利,以16萬再資,假如獲利又有6成,3年後我也最多擁有不過30萬的資金。依照以上算法,價值投資法的成效是不是太緩慢去達到這些賺錢的目標?

雖然我明白再其後複利息的威力很驚人,但我所假設的年半獲利6成其實已經是很樂觀的。還是我的計算方法有很大錯誤嗎?希望龔成指教一下,好讓新手的我能夠解開我的疑惑。

龔成老師:坦白講,年半賺到6成回報是很樂觀的假設,每年平均計有37%回報,已經是很可觀。

複利息的威力的確很驚人,但要有充足的時間才可程現,若以年複息37%回報率為基礎,持有10萬,10年後就變成229萬,20年後為5267萬,30年後為12億。所以長期愈長,發揮的力量愈大。

如果你想3年後有100萬,其實要想想如何增加本金,因為時間的確不足,這令投資發揮到的作用未明顯。當然,你可選擇投機,這有可能令本金快速增值,但原理如同賭博,所以不建議。因此還原基本步,以平穩方法去做財富增值,其實是最好的。

巴菲特是價值投資法的代表,他之所以成為投資界最賺錢的人,是因為他的平均回報能保持,雖然唔算多(只有20%),但只要每年保持,長遠計就會好大威力。

價值投資法未必能在短時間發揮到很明顯的效果,但勝在長期穩健,以我自己未說,我會在低風險的前題下,爭取3-5年賺一倍的回報,財富這樣最能合理增值。

當然,你會見到坊間有不同的投資方法,有些短期會有快速的回報,但如果當中風險較大,回報不穩,有時賺錢,但有時又蝕錢,在長期計,只會得不償失。所以有些方法看似吸引,但當全球賺最多錢的人地唔會用,你就知道當中有些問題存在。

————————————————

Q470:成哥,想問一下,如果我追那隻股準備派息就買,收完息就放,這方法可行嗎?

龔成老師:你要注意,除淨後股價會調整,所以刻意追那隻股將會派息,其實作用不大。假設這股是$100,派息$5,除淨日當天股價會自行調整至$95,所以刻意追是無用。

其實買股票就是持有企業,今年賺了10億,打算將其中5億派出,當派出前市場認為這企業值100億,當派出了5億後,這間企業就只會值95億。

然後企業繼續做生意,漸漸又賺到錢,市場慢慢又會覺得這企業值100億,而長線投資者,就是憑企業持續增值,以及所派出的現金流去獲利,所以不會買買賣賣,而是一直持有。

————————————————

Q471:成哥,常聽你講話〔賺差價並非真正的投資〕這個概念,你話賺差價無用,可能我造詣尚淺,沒有到您的境界,但都好想知點解?

龔成老師:你停留在「賺差價」概念,這不怪你,因為你與99%人一樣,從小開始以「現金」為財富的唯一單位,但可以話你知,如果你有機會接觸多d有錢人,又或睇有錢人寫有關財富概念的書,你就會發現佢地對財富的理解會一般人唔同。

佢地唔會用「現金」去作為財富的單位,而係用「資產」,所以當絕大部分人停留係「賺差價」的概念時,但有錢人唔會追求賺現金差價,而係持有會增值及產生現金流的資產項。

呢個係好唔同的思維問題,一般人睇股票、睇樓、睇生意,要用現金單位去思考,當有現金數字上的差額就為賺,但佢地唔會這樣想,佢地以資產做單位,著重真正財富的持續增值。

呢個概念對好多人來說都好難明,因為人們已習慣了「現金」是衡量財富的單位,但現金只是人類創造出來無意義的借據,以此去作為財富單位當然不適合,追求現金差價同樣是有問題。

建議你睇多幾本《富爸爸》系列、《貨幣戰爭》等,盡你最大能力去理解「為何賺差價無用」,當你明左後,你發現致富唔難,同埋知道點解d有錢人愈來愈有錢,亦明白9成香港人炒股票長期計輸多贏少。

————————————————

Q472:成哥,你點睇香港呢1、2年的經濟前景?

龔成老師:香港係外向形經濟,受外國同中國影響。世界經濟一般般,而中國經濟已無以前咁高速,呢點令香港有d隱憂,加上自由行,所以中短期都唔睇好。

不過我自己又唔算睇得太淡,相住唔會太差,當然未能用個好字去形容。

不過我自己咁睇,好經濟時生意好但成本高,差的時侯成本際,所以其實咩環境,都有機會,我都幾相信呢d野,所以我自己做野,keep住去,唔太理出面d經濟環境。

————————————————

Q473:想問一下,互太紡織1382依家跌左唔少,投資價值係咪已經存在?

龔成老師:互太紡織(1382)本質唔差,佢同Calvin Klein、Liz Claiborne、Maidenform、馬莎、黛安芬、UNIQLO、VF Intimates、Victoria’s Secret、安踏體育都建有長期合作關係,有唔少都係穩定的訂單。

不過較特別的係,佢會將賺到的錢絕大部分用於派息,所以息率有成8%,收息算係唔錯。但呢個亦反映一點,佢的增長力已有限,管理層都知這企業增長有限,賺來的錢都唔會作保留盈餘,企業唔會有咩發展。

而此企業另一缺點,就係佢只做生產,無自己的品牌,而只係同大品牌合作。當經濟逆轉時,大品版就會壓佢價,佢無價值自己能力,就算成本上升,無未必能將成本轉嫁,這是風險所在,不過當息率去到8%,都有一定的投資價值,但你要知佢的特性。

————————————————

Q474:小第有幾萬人仔,又唔想換番港紙,如果想用佢投資,應該買87001定80737呢?牌面87001息高,但市盈率又非常高,80737呢,交投又好少喎,俾D意見好嗎?或者有咩建議?謝謝

龔成老師:交投不活躍會令買賣差價較大,這會增加交易成本,但如果你長線投資,影響相對較少,仍可以考慮。

匯賢產業(87001)屬於收租類別,盈利上由於有投資物業的重估增減,所以盈利數字無乜作用,2015年由於有物業減值,所以令盈利數字變很好低,但其實唔洗理。由於匯賢產業會將可分派的盈利作派息,所以息率唔錯,反而分析息率比率盈率仲有用。近期息率有8%、9%,有一定的投資收息價值。

合和公路基建(80737)其實係合和公路(0737)的人民幣交易號碼,而合和公路有質素,不差的,原理是收路費,增長雖有限,但勝在穩定,收息同樣不錯。注意佢上年派左特別股息,令息率大升至10%,但不能作準,你可用過往股息的平均數去計,會有更立體的概念。

————————————————

Q475:你好,我想問如何定義一間公司的股價的貴與平?有冇咩指標參考?Thx!!

龔成老師:市盈率係其中之一,但由於市盈率只用剛過去一年盈利,所以要分析其代表性,一般企業8-15倍算合算,但高增長或存有獨特優勢的,市場估值會較高,所以港交所值30倍市盈率(約$200),不過坦白講,30倍已難用平去形容,但如果去到$300,市盈率就達45倍,已能評估到過高了

————————————————

Q476:你好,想問1447(新福港),呢隻股無記錯應該係以前孫福記,以前孫福記都有上市,後尾又賣又買又拆到今日再上市,價錢係幾抵,自己覺得建築唔係人人可以做,但樓一定會起,所以有興趣,但怕唔怕係玩財技呢?唔該俾俾意見。謝!

龔成老師:先抱歉,不論是新福港(1447),還是孫福記,我都無研究過,亦沒有太多的認識,所以難以作深入的分析。但若果如你所說的情況,佢之前上市後又搞好多野,而家又上市,咁好有可能係財技股,要小心。

而家呢隻1447上市唔耐,盤數未見真章,無得分析,如果從基本面去睇呢隻股票,暫不會考慮。

————————————————

Q477:你好 成哥,小弟於$6.4買入長城汽車 原因為ROE 幾年高於20% 及5%利息 dan請問長期持有還是輸少離場好?##但期內期內純利23﹒96億元(人民幣.下同),按年跌5﹒51%,會否持續惡化而失去長期持有價值?謝成哥指教

龔成老師:如果你當初買入是長線投資的話,其實啊洗太在意中短期的數據,R0E係股本回報率,一般都會分析多幾年,對企業長遠的價值有立體的概念,長城多年的ROE都過20%,反映佢本質上不錯,有一定的賺錢及再投資能力。

如果原有分析角度係長期,咁就唔應該比短期因素及股價影響到。

如果要立體分析,其實你見佢近期年的業績,盈利都無特別增長,所以就算現在季度盈利按年跌5%,其實已不是甚麼大變動,只是反映近年的情況,中國消費放緩,而長城亦受影響,中短期本見好轉,但長期價值未有大變動。

更何況,現時市盈率5、6倍,已反映了長城正面對的情況,雖然中短期不能再跌,但以長線角度,其實不用太擔心。

————————————————

Q478:龔成你好,你書入面提到巴菲特會用保留盈餘計算能否創造超過$1既價值,如果用5年計既話就係話(除稅及股息後盈利) 總數細過5年市值既增長就叫做成功創造超過$1既價值?

例如,5年保留盈餘30億,市值由20億升到70億,50億增長>保留盈餘30億,就代表公司創造超過$1價值?BTW..你又會唔會每次都用呢種方法黎分析一間公司既投資能力呢?

龔成老師:係,你理解的正確。巴菲特會以此衡量企業有沒有「增值」,因為有些企業,每年雖然有錢賺,但派息不多,不少資金都用作保留盈餘,但這些盈餘用作提升機器等方面,可惜無法令賺錢能力增加,即是要不斷將資金投入,以維持基本的效率及競爭力,而市場估值及盈利卻沒有提升。

即是過往的保留盈餘,只能令企業「維生」,而無法「增值」,這不是巴菲特想要的企業。所以,他以$1保留是否能創超過$1的價值為指標。

我都會參考這指標,分析保留盈餘多少,以盈利有否比過往增加,同時股價有否上升。但由於股價會變動,所以會以長期去分析,比較起5年前、10年前是否有增值。

————————————————

Q479:誠哥,之前見你寫過隻435,但好似股價有點高喎,不過真心想問您,您覺得佢會破頂定係跌?我覺得現價值博率唔高

龔成老師:我唔知佢會跌定破頂,價值投資法唔分析後市的。我分析陽光房產(0435)的時候主要係分析質素,重點係呢間企業的本質,佢持有的物業組合唔差,租金每年都上升,而且出租率98%,有一定質素。

分析重點係質素,文中無叫人即刻入,我都有講要6%先算有投資價值,若現價息率不足,投資者可將呢隻存於觀察名單,等股價回d先入亦可。

————————————————

Q480:想買港燈,但幾錢為之抵?

龔成老師:如果你講真係平,其實要落翻$6以下,因為我自己幫阿媽入,就係$5-$5.5度儲貨,長渣收息,不過坦白講,股價未必落得翻去,所以,就算股價處合理略平水平,已經可以分注入。

港燈(2638)業務無增值能力,只是純收息,所以以息率去評估就最好,上年度港燈派息$0.4,若要求6%股率息,股價要在$6.7以下,相信這才算勉強吸引的股息率。

———————————————-

多謝各位提問,若然你有問題想向本人發問,可在本人的facebook專頁中(www.facebook.com/80shing)inbox我,但要注意如無特別聲明,我有可能將問答放上網的,當然,我會將發問者的身份,以及有關個人的部分刪去。

另外,由於提問人數眾多,見諒我無法即日回覆,如果是普通的提問,預我起碼要3天以上才能回覆,若然是較複雜的提問,起碼要7天才能回覆,希望各位能諒解。