龔成問答信箱(Q481-Q520)

龔成問答信箱(Q481-Q520)

Q481:想問一下,應收帳款比上年增多一倍係唔係一定代表唔好?以博耳電力為例,係唔係影響大

龔成老師:好唔好要睇情況,如果企業的生意做大了,應收帳增加是合理的事,做生意大家都會有呢種情況,好正常,同時該公司都會有應付帳,以及其他負債類別增加,所以要睇個比例如何,同埋佢係咩公司,佢D客係咩人。

賺翻博耳電力(1685),佢上年的生意增加左兩成,而應收帳就由之前的26億,升至46億,比例比生意增加的明顯較大,要留意下。

而我地可以係年報的附註度,睇到佢應收帳的組成,見到主要為:貿易賬款、客戶貸款、應收保留金,而其中今年大增的原因,主要係貿易賬款同客戶貸款,呢D情況有可能係某D大客,要提供較長的數期或賒數先有得做生意,有可能有壞帳問題,所以有可能令企業有潛在風險。

加上佢一年做二十幾億生意,佢應收帳反而仲多,今人有點擔心。

如果再睇現金流量表,佢經營所動用現金係負11億,做生意但無正現金收入,唔,小心小心。

————————————————

Q482:你好, 龔成. 我想請問為什麼有些銀行如渣打, 每股盈利是負數和少於1的市脹, 但近期股價由$40上到$60,是怎樣回事呢?

龔成老師:渣打(2888)出現虧損代表業務不理想,這令股價從過百蚊下跌至40蚊,但若假設渣打的企業價值是$60,那麼有過百蚊下跌至$40就是跌過龍,當市起情緒穩定時,股價就會慢慢回歸到$60水平,即時就算仍處不利期,股價也有可能上升。其實這是複雜的問題,你唔好用直線思維去諗,危險的。你只能吸收多D經驗,慢慢你會明多D。

————————————————

Q483:龔成大師,超中意你平時講的股票分析,很認同你話要長線持有優質股,但其實,有無咩方法介定怎樣才是優質股?

龔成老師:優質股可說是生意與盈利都有不斷增值能力的企業,隨著時間愈長,企業會愈變愈大,同時產品的價格自主能力大。其實要講會是一本書的內容,以下是優質股的部分特點:

— 壟斷企業
— 消費壟斷企業
— 擁企業規模
— 有政府、制度保護
— 入行門欖高
— 擁競爭優勢
— 擁其他企業沒有的特質

— 賺錢能力比行業對手強
— 有一定的市場佔有率
— 擁有有價值的品牌
— 有成本轉嫁的能力
— 消費者對產品忠誠
— 消費者要持續購買
— 產品不斷有需求
— 增長擴展的市場
— 業務能持續發展
— 管理層理性
— 生意平穩增長
— 盈利持續上升
— 財務穩健
— 產品簡單
— 經營效率高
— 股本回報率高

————————————————

Q484:成哥,多謝你解答有關「賺差價」的思維,你說「投資不是賺差價」對我來說很新,我要時間理解,真的很多謝你的指導!亦多謝你的推介,《富爸爸》的確在書店碰見數次也沒買,原本以為裡面的內容是如何教我努力工作,儘快存第一桶金的陳腔濫調,但原來與我想的不同。《貨幣戰爭》系列剛剛也google了一下,4個系列都看上去很有意思,這個暑假我會用空閒時間研讀他們。謝謝推薦好書給我!

賺差價的概念的確存在我心中良久,譬如人們常說低買高賣,譬如股票,樓,新的iphone。任何交易的表面的交易額大於成本,就是賺。你的看法對我來說,是一個全新的看法,是課本上學不到的東西。但當你提及現金流的概念,有點熟悉了,在巴菲特自傳裡,巴菲特買下保險公司,因為保險公司向客戶收的保費對於巴菲特來說,是大量的現金流。但我們怎麼去產生現金流?靠收租得來的租金要拿去還銀行貸款;股息也不是很穩定的現金流呢。

龔成老師:你開始有點理解賺差價以外的投資了,其實當你睇所有有錢人,佢地都唔同睇差價概念,而係建立與購買資產,而這些資產會持續增值或產生現金流。

可以產生現金流的資產當然好,但就算這刻沒有現金流或只有很少現金流,而往後能保持增值,又或之後能產生更大的現金流,這都能成為資產。

企業(當你創造了一盤能持續產生現金流的生意,這就是資產),另外,固定資產(如物業)亦是資產,而優質股票都可成為資產,就好像港交所(0388),是曲型的優質企業(這就是資產項,可長線或永遠持有),十幾年前以$4上市,升到$6已有8成人放左,到升到$20有99%的人走左,佢地因為想賺現金差價,所以走。

即係佢地覺得賺左先,渣現金,比持有港交所更好。但這是優質股,即是資產項,一直持有都可,你看看現在,港交所$200,每股派息近$6。即係呢如果你當年在$4入左10000股,即係用左$40000買,到今日每年收息都$60000,市值約$200萬,呢個升幅只有少於1%的人賺到,因為其他人都只懂賺差價。

————————————————

Q485:您好,本人剛開始學投資,好多唔明,敬請賜教。其實如果長遠計,買入ETF作投資,可以嗎?有股息收嗎?因為覺得ETF係一籃子投資,事實係嗎?因為依家無方向入市,多謝

龔成老師:ETF即主易所買賣基金,現時在港有過百隻,他們都是28XX、30XX、31XX,當中會有不同的範疇,如港股、中國股票、外國股票,或其他資產,每隻ETF所投資的項目都不同,你可上該基金的網度看該基金的投資範圍。

盈富基金(2800)就是其中之一,當中所選的是恆指成份股,是在香港上市50隻最有代表及有一定質素的股票,所以不錯的。如果你不太懂選股,簡單買ETF如盈富,已能有平衡風險及平穩增值的作用,長線投資是可取的。

另外,如果作怕一次過買入可有風險,可以分段去入,又或以分供的形式進行,都能有效分散風險的。

————————————————

Q486:龔成兄你好:) 想問一下460 依家買唔買得過? 見佢ROE都幾高, 估值低,又係醫藥龍頭股。想問一問你點睇呢隻股? Thanks

龔成老師:表面上,四環醫藥(0460)盤數好靚,生意與盈利持有增長,加上頗高的股本回報率,而最吸引係佢市盈率好低,表面的確好正。

但可惜佢2014年被指控商業賄賂,然後到2015年停牌左一年,到2016年先復牌,其後股價大跌,而最令人擔心的,就係羅兵咸永道原本係佢的核數師,但後來辭任左。

即係咁,如果佢盤數有問題,咁之前分析佢點勁點勁,就會全部都錯。當然,佢盤數唔一定有問題,有可能無,又有可能只係d小問題。

不過,我自己唔會博呢類投資。

———————————————-

Q487:其實我係一位十九歲學生,睇完你兩本書,獲益良多,想抽新股,你對抽新股有何看法?

龔成老師:個人從來都不抽新股,除了政府上市的港鐵(0066)領展(0823)之外。

原因是企業上市的目的是將股份賣給你,你認為你熟該公司還是他熟呢?

管理層當然好了解他們的公司值多少錢,在這前題下,他們賣給投資者的價錢當然不會平,所以一般企業上市,都會以比企業價值略高或高的股價上市。不過亦有例外,就是政府上市的企業,因為政府並非為賺錢而存在,所以上市的定價較為合理。

另外,上市公司為舖路上市,往往都會用會計手法(可合法或不合法)去整靚盤數,用以提高招股價,這是大部分企業上市都會做,所以往往要一兩年後來能見真章。當然,我所講的是從本質去分析,這與有無得炒是無未必關係。

————————————————

Q488:成哥,本人有購買你的兩本大作,看完獲益兩多,以往只看重20%的中線買賣,導致兩次錯過倍升股

早前以平均$4.8買入北控水務,但早前有消息指371以3億多購入已停牌的桑德國際股權,百思不得其解,導致當時股價兩日跌10%,雖然之後升翻,但都想了解下

成哥,請問此舉可否視為管理層能力低及基本改變而需要考慮賣出股票,再次感謝成哥無私的指導,謝謝

龔成老師:北控水務集團(0371)主要從事興建污水及自來水處理廠、污水處理、自來水處理等,5年平均ROE大約為12%,屬一般水平,但這類水務企業都說是差不多,因為這類企業的回本期都較長,但好處是平穩增長,較少出現虧損情況。

早前北控水務購桑德國際近12%股份助取控股權,成為第二大股東,相信背後的目的是桑德國際的濾水產能,有助北控水務提升業務,所以相信不是管理層問題。當然,桑德國際(0967)是一間正停牌的企業,這難免令人有點擔心,所以當時股價有較大的反應。

不過,細心分析,北控水務投資的資金不算大,所以就算這是一綜有問題的交易,對北控水務的影響不會太大,所以就算繼續持有都可。

————————————————

Q489:龔成兄,我對投資方面仍迷茫,我係度講下而家財政狀況比你睇睇,你如果有時間 可以幫我析下應該作邊方面投資較好

-月入17000 已扣mpf
-每月有二份危疾保險 不含儲蓄 共1050
-另供二份基金 共3100
-珠海剛買左樓投資用 家人合供 每人月供1600
-家用3000

-之後得返每月幾千蚊用
-車費返工已去800,食飯彈性調節
-暫時目標想好似你咁每月儲一萬蚊 , 唔計已供的基本。

你有時間先幫我睇睇 ,知你應該非常忙 ! 謝謝你

龔成老師:你每月供基金3000,是合適的數目,這都是儲蓄投資的部分,是你財富的一部分,所以若以每月投入到財富的數目,相信你是可有$10000的。

但若然你唔計供基金,想每月儲到現金$10000,相信開源是方法,因為你的基本開支不算大,相信再縮減的空間已有限,增加收入是較好的方法。除了兼職外,一些小生意、網上生意都是方法,其實可以試下,有好多野試多先會知結果,選擇一些你熟識及有興趣的類別,以不用資本為前題去做小買賣,慢慢再搞大,其實是方法。

————————————————

Q490:成哥你好,我是中一學生,多謝你之前細心為我解答問題。呢排我發現左一樣野,點解小賣部D野甘貴,每日都平均有500人去買,點解?因為佢位置好囉,個小賣部位置係學校裏面。
咁我出街買一支茶,賣給同學
例:我出街買4.5$茶,買給同學6.5$茶,學校要8$,我點都賺,同學又覺平

龔成老師:你所想的正是生意的模式,其實搞生意唔係一定要有間店舖,要有資金先可搞到,好多日常生活的地方都存在。我小學時買賣閃卡、賣煙花玩具、做小導遊,都係從生活中開始。

但你要記住,「想」同做「做」係兩回事,呢個世界好多人都想到賺大錢的好翹,但100個想到的,只有少於5個人會去做,而這5個人,有4個會因種種困難而半途而廢,所以世上成功及有錢的人是少數,就是這原因。

所以我建議你試試做,落實做不同的小生意,從生活上開始。你有這方面的頭腦,但關鍵是你的執行力,以及你克服困難的能力,只要你在中學時期好好做好這事,落實不同的小生意,其實你已在當中學到很多學校不會教的事,你將來的發展會不錯。

————————————————

Q491:Kung Sir 你好:

我之前有上過D一個月課程,但上完我覺得都吾係太清楚。但係我又想試下投資,我係冇玩過股票同任何投資的有D問題想請下你:

想問下係咪呢個時候吾應該入市昵?(因為我既朋友都話會大跌)

如果新手應該買邊隻呢?

戶囗己經系銀行開左,大概存款有18萬,但只係想拎8萬黎投資,如果全部放落盈富同港交所會太冒險嗎?

龔成老師:根據過往的恆指市盈率,大多處8-22倍之間(市盈率是衡量平貴的其中一個指標)。恆指約22000以下,大約處10倍以下的市盈率,是長期投資的偏平水平。當然在買入後有可能跌(因為短期可能會上落),但以長期角度,其實已有投資價值。另外,我唔認為有人能預測到後市的升跌,所以預計後市會跌而等入市的做法,並不適合。

新手買盈富基金(2800)已可,因為這包括了50隻大型及不錯的股票,風險平衡之餘,長期的增長力不錯。若果你擔心買入後跌,其實將一注資金分成幾注入,令風險減少。

港交所都是優質股,可長線投資,但股價波動較大,所以投資的資金應比盈富少。如果你是低風險的投資者,這股其實一般,因為股價的波動大,但我認為$200以上就不宜投資。

————————————————

Q492:成兄,請問如何看2389.hk
之前不同價位入了多轉貨,你睇養老業在內地有潛力嗎?

龔成老師:北控醫療健康(2389) 主要從事進行醫療及護老業務,我雖然睇好內地養老業的潛力,但呢間企業有D保留。

佢唔單止生意唔穩定,近年仲出現虧損,佢早幾年無虧損時的盈利只有$1億,但而家市值就去到$30億以上,條數唔識計,我唔知佢有無短炒的價值,但暫時找不到長線投資的價值。

————————————————

Q493:想問00857中國石油公司投作長線投資可以嗎?

龔成老師:都可以,但中石油(857)係商品企業,產品售價被市場牽引,沒有價格自主能力,投資價值只屬中等。

但在油價處較低水平下,中石油的市場估值不高,所以風險已變得有限,在油價再跌有限,但有較大上升空間(長期計)的前題下,此股有穩中求勝的效果。

————————————————

Q494:成哥,你點睇溝貨,我在高位了某股,股價一直在低位走,眼見跌左10%想再入貨,可作溝淡,正確嗎?

龔成老師:如果你當初買入該股的資金是已設定的某數,那就不要溝貨,因會增加風險。但若當初你是設定了分注吸納,那當然不一樣,而分注入我亦建議每次分注間,最好隔10%-20%。

————————————————

Q495:特步1368 睇好受惠運動股,安踏都想買但股價較高 而且安踏會比特步好,如何選擇?

龔成老師:特步(1368)的股本回報率有13%,而安踏體育(2020)的股本回報率達20倍以上,生意同盈利報保持增長,從質素上安踏較佳。

而特步近期市盈率14倍,安踏則為20倍,的確是平有平買,貴有貴買,看你怎樣取舍。不過我一般會以優質為前題,然後再等平D先買。

————————————————

Q496:成兄,我認同你所講的擁有優質資產非常重要,但請問這個世界是否只有樓和股票(企業)算優質資產?

在香港,我覺得就算貸款買到地段好,回報高的住宅單位,譬如大圍的名城/九龍塘的陶源,一想到每月的要還高昂的銀行利息和貸款,心理壓力就很大,我有朋友也覺得這很綁手綁腳,這是否和心理質素有關?

鑒於樓價的高門欄和高額貸款,我覺得擁有優質股票是最好的選擇。但找到下一只〔港交所〕和等待下一個〔金融風暴〕要具備膽量,耐性,和知識。這也正在我需要向您學習的。

龔成老師:資產的定義很廣,而只要是有持續增值以及產生現金流能力的項目,就可稱為資產,而獲得的方法,主要有創造、改變、購買。所以優質股及物業是資產,但除此之外,車位、寫字樓、版權、專利權、系統、網站、品牌、配方、藥方、程式,甚至可以是商業系統、銷售系統、生意模式、賺錢模式、組織、概念、地位、知名度、人、人脈網絡等,都可以是資產。

要等下一個風暴要有較大的耐性,到時是盡入的時候,但中間若你只持有現金,其實並不是好事,雖然優質股處平宜價會有高回報,但在合理價時分注入,選擇較佳及略平的股,其實都有中長期增值的作用。港交所是優質資產,但除此之外,仍有很多優質股的,可耐心發掘。

———————————————-

Q497:龔SIR,我真係好想上你的股票班,我知你好有實力,唔同出面d吹水佬,但坦白講,對我黎講你個收費的確有d貴,坦白講,我呢一刻唔夠錢比,但我又想上的。

龔成老師:我想講一個思維,一般人持有$1000只會做$1000的事,但有錢人就算得$1000,也會做$5000的事。首先,佢地唔會限制自己,話做唔到,而係踏出第一步,再想方法進逼自己做到。

另外,佢地用逆向思維,之前我結識了時昌迷你倉的老版時生,佢同我分享了一個經歷:

金融海嘯期間,銀行唔肯為屯門工廈融資,係無人接貨下,部分工廈價下跌50%,時昌當時睇中某屯門工廈,地點唔錯,價格又非常吸引,很適合改成迷你倉。但當時整個市場都缺乏資金,銀行又不肯提供融資,手上現金又不足,點做?

當時,時昌先同業主磋商,結果雙方同意延長成交期,隨即開始裝修,並同步大肆宣傳,吸引客戶,在交收前已正式招租,最重要當然係預收租金,即時大大增加現金,成功手持充足現金進行交易,並完成整個購買過程,以零手頭現金情況下獲得物業。

所以,有錢人與人般人的思維往往唔同,而有錢人對於投資的重要性亦放到好前,用盡方法去做。投資無論在實物還是知識上,都能產生錢搵錢的作用。

———————————————-

Q498:有野想請教你!係我未識投資之前,我會用資產8成去買部車。當我係投資市場賺到一筆可觀利潤之後,而7月收取股息想用當中1/3買一部十幾萬電單車(只佔資產2%),反而左思右想。

因為如果我買左部車,每月平均要使$1500,但如果我用呢十幾萬去投資收息股(假設5%),每月收$600息(未計升值),一來一回成$2100。真係唔知點算好 ,好難選擇 ?

p.s. 自己真係好鐘意電單車,成日聽到要活在當下,但諗到支出筆錢可以換成收入,又唔捨得,但自己又唔係無能力 !
換轉係你會點 ?

龔成老師:我諗所有野都要平衡,用一些享受去獎勵自己過往的努力,作為成功的證明,這是可取的。而我自己都會定一些目標,例如賺到$50萬會買某物品給自己作獎勵,賺到$100萬又會得到某物品,這些獎勵能有效加強我去追這些目標,造成相輔相承的效果。

所以獎勵是可以的,但我多數會用一次性的消費模式,即是很少用要持續性支出的項目,所以你上述講買車,買不是問題,最大問題係每月都要持續消費,是負現金流,即「負債項」,所以我個人唔會咁做,而會將呢個慾望推遲。

記住,我唔係唔買,而係遲D買,你計現金流方法是一個好的方法,你可以以此定為目標,當資產項目再提升,另每月可額外產生多$2000的月現金流,就可比自己擁有這電單車。呢個係慾望目標法,當完成目標就可滿足慾望,由於你中意電單車,所以你想完成目標的決心會好大,你會盡快完成目標,呢個係好方法。

我過往都用呢類方法去完成目標,我好會「利用」自己的喜好,愈係心頭好就愈好比自己即刻買,用來「引誘」自己完成某些目標,方法好有效,當然你可按情況自行調整。

————————————————

Q499:成哥,我記得你說過,買優質股,買樓就是資產,是建立財富之道,咁無形資產係咪都係資產,係咪都值得建立呢?

龔成老師:「資產」有形無形都可以,而你要明白,資產可以以任何形式存在,不要有思維上的限制。

物業、優質股是較易理解的資產,但其實我的書亦是資產,而品牌、知名度亦是資產,我有個拍檔就是利用他的人際網絡,專搞名人收錢飯局,這就是資產,所以,資產會以各形式存在,絕對不能限制。

————————————————-

Q500:成哥,我想買股票,主要是儲錢為主,應該買入哪些股票呢?很多大籃籌例騰信700都想買入但股價太高

龔成老師:騰信確然是籃籌股,但我不確為這是穩健的投資,因為行業變化大,盈利的不確定性較大,所以投資宜小心。試想想過往的icq、msn、nokia,都是當時的王者,當時的分析員,十個有八個會說這幾間公司是優質、穩健、買得過,但結果大家都知。

我不是認為騰信會倒閉,而是騰信身處的行業,比其他行業存有較大的不確定性,而面對這種不確性,投資者應較小心以及有較大的安全邊際才投資。但現時市場上對騰信的估值,是假設這是高增長的大籃籌,絕不平宜,所以不建議。

不少大籃籌等下股價回落,已經可以買入,有長線投資及收息的價值:中電(0002)、煤氣(0003)、港鐵(0066)、港燈(2638)、領展(0823)、金沙(1928)等。

———————————————-

Q501:你好, 龔成. 多謝你解答了好多投資的問題. 我是一名新手, 覺得銀行股比較安全, 所以買了1手中銀香港, 回報在短短2月已不錯. 我打算把我另外8萬都投入中銀香港, 想請問你的看法.

龔成老師:中銀香港(2388)是優質股,比匯豐、渣打、內銀仲優質,可以長線投資,但我不建議你將所有資金集中在銀行股,因為銀行是特殊行業,當出現系統性的金融風險,銀行股可以有較大的影響,所以中銀可再買,但同時要將部分資金買其他行業的股票。

————————————————

Q502:龔生你好,我今年23, 岩岩出黎做左1年幾野, 但係因為去旅行同埋本身行業洗費一路都唔係幾儲到錢, 近日因為一D事令到自己想開始投資儲蓄, 所以諗住親早開始玩股票

但係諗唔到點樣入手, 睇左好多terms 同普通技術分析唔識應用, 諗住都係長遠投資, 唔係短炒, 現時有現金50k到, 本來有幾隻野想買, 但係發現好多都要好大本金 例如大家樂1手都40k up , 已經佔左我資金8/9成

如果我想分散風險係唔係應該再儲落多d 資金先開始買呢?

特別係我認為大市中短期(2-5年)內唔好(見好多分析同巴神話大陸經濟宜家好大風險)係唔係應該等大市跌再大手d買潛力/blue chip 呢?

我每月最盡儲到hk$8,000左右, 以我現在資金係唔係只係可以分注買2800? 本身計畫70%中低風險收息, 30% 高風險(親後生) 但係發覺自己資金有限又做唔到呢d野.

同時有人講債基都岩新人入場, 適合投資嗎?

同埋新手應唔應該投資美股呢?因為如果價值投資好似美股d brand清晰d 多d 潛力大d (i.e 覺得打機/硬件呢個行業會革新想買sony咁樣)

多謝解答我呢個新手問題!!謝謝!!

龔成老師:我相信你現時要做的,是閱讀理財類書籍,你可到圖書館睇大約10本,會對你的理財知識有幫助。

股票是投資的其中一環,而投資是理財的其中一環,沒有理財知識,買股票就如亂打一通一樣,沒有一套策略可言。而這裡可以大膽同你講,坊間有不少概念都是有問題的,無論是電視還是其他地方,所以我要你到圖書館,去尋找正確的知識,而不是坊間片面的知識。

真正的財富是資產,不是貨幣,不是產品,資產會按經濟與貨幣系統運行而不斷升值,同時有持續派現金流的能力,物業及股票是最易理解的資產,數十年間不斷升值。不過不是所有股票都能稱為資產,只有優質股才是。

而更重要的是,投資是將現金轉化成資產的過程,絕不是賺買賣差價,而是轉仍後長期持有,這是十分重要的概念,所有有錢人都明白這道理。

$50000雖不算多,但對於投資股票來說,已經可以了。當然你仍要不斷儲錢,因為初期資金是最重要,是以你這個年齡,增值是最重要的,至於債券,雖然都是理財工具,但不是資產,亦沒有太大的增值能力,所以不太適合年輕人。

我相信除盈富基金外,港股中仍有很多好股票,你暫時集中精力分析港股,下一步先美股。港股如煤氣(0003)、港鐵(0066)、港交所(0388)、金沙(1928)、領展(0823)都是有質素,有長期增值的能力,而買入價是其中一個關鍵,所以選股與投資時機,都是你要重點學的。

————————————————-

Q503:龔老師你好,我是中一學生,之前問過你問題的,多謝解答,我想試試你生意,我本身是想賣氣水,但是好似風險大,所以又改賣糖,一日平均50蚊,相信可以試下。

龔成老師:其實,賣甚麼,做甚麼生意,對你來說都不是關鍵,重點係你有無落實去做。只要你做,先知有無得做,之後就可慢慢調整

你這刻需要的不是賺錢,而是經驗,所以你無風險,你輸得起!

如果你因為怕這樣怕那樣,而最終甚麼都沒有做,這才是最大的失敗。

世上有唔少人都有好的想法,但100個中只有5個會去做,所以你要落實去做,一路做,一路進步,你慢慢會發現,「想」同「做」係兩回事,只要你肯踏出這一步,你就如同打開了成功的大門。

————————————————-

Q504:阿sir,我想問股票市場中的買入價賣出價,其實是甚麼?

龔成老師:股票市場的運作以排隊機制進行,例如股票A,有人想買入,有人想賣出,想買入的人會開價,例如在$100買入,而想賣出的人又會開價,例如開出$101賣出。由於人人都想平D買貴D賣,所以這個$100/$101只是買賣雙方的角力,這時候兩者只是開價,沒有成交的。

然後就看看那一方較沒耐性,例如買入的人心急,$100等了好耐都等唔到買入,那就只有用高少少的價,即$101去買入了,這時候就會以$101成交,到這一刻才是真正的成交價,而之的$100/$101,只是兩方的各自叫價,而簡單來說,股票市起的買入價及賣出價,就是現時在排隊中的叫價。

————————————————-

Q505:龔Sir, 一直有留意推介既股票, 的起心肝落手學投資..由其係1928, 金沙中國, 之前有段新聞關於拉斯維加斯金沙集團向證監會支付900萬美元民事罰金,就觸犯《海外反貪污法》的調查和解. 但 將來會唔會有更多呢D 不可遇見既風險 令到成間公司 受到好大既打擊?

龔成老師:金沙持有現金過百億,對呢d罰錢無驚過。金沙每年賺過百億,對佢盈利影響太少,暫時亦睇唔到之後會有更多及更大的罰款,所以不用擔心。

————————————————-

Q506:Hi 龔成,想問一下, 我之前買了 3882 天彩控股。3蚊招股價買 , 但可是現在 跌到 1.8元。
好想放左佢, 但不知 要等什麼價位放才好。 請問有沒有什麼意見?thanks.

龔成老師:其實,本人從不建議抽新股,亦不建議投資上市年期太短的企業,因為這些企業為上市鋪路,賬目會整到好靚,令上市價提高,之後往往會見真章。

天彩(3882)沒有分析過,亦不合我的選股原則,抱歉未能為你提供意見,但我認為如果發現自己錯誤,最好的方法是盡快處理。

雖然有點抱歉,但我不是坊間的股票佬,他們可以所有股票都吹到。我不懂的,就是不懂。

————————————————-

Q507:成哥,二十八歲,準備結婚,想買樓,但係d樓都好貴,幾百萬先得個一房單位,點算好?

龔成老師:坦白講,我地無水晶球,無人會知道樓價的真正走勢,而坊間的分析,其實都係估估下。

所以,你不如從實際生活上,負擔上去考慮,即係唔好將分析將來樓價放在第一位。表面聽來,幾百萬萬一個一房單位,的確唔平,但你唔好與過往比,因為無人知返唔返到轉頭,你從自身角度去諗。

————————————————-

Q508:成哥 我想問隻2333
五年來 roe 過 20
但我都明白而家係電動車既世界
但呢隻由60蚊 一拆三 再由20跌到而家
我想而家可以趁低吸納呢

龔成老師:其實一拆三對佢將來股價無影響,因為決定長遠股價的,是企業價值,所以呢類財技不是重點。

長汽(2333)本質不錯,在內地都算有品牌,股本回報率高,的確係吸引之處,但我相信高ROE之後未必可以持續,增長更為平穩。

長汽近幾年的生意都有上升,但錢就無賺多到,已反映開始進入平穩期,市場估值上亦已反映這點。長汽持續下跌後,市盈率已去到7倍左右,我認為不算貴。但你要明白,已過了過往高速增長的年代。

————————————————-

Q509:成哥, 有野想請教你
本人25歲 公務員 月入20k 今年開始每個月儲10k 暫時儲左30k

我希望5年後儲夠600k 睇下有冇機會按9成上車

1.)我想問下呢5年內我穩穩陣陣儲600k 或是 做一d投資,但買股票我又怕辛苦儲既錢冇哂,之前玩股票蝕過幾萬蚊

2.)如果買股票 有冇邊隻好穩陣既? 我自己睇過領展前景發展好似好唔錯,但而家個價位又好似好高 既高追

3.) 如果決定買股票 幾時開始入市 我而家得30k 定係再儲多d先? 定係再睇定d 唔洗急於入市? 因為我見好多實力股都處於個高位

龔成老師:由於你5年後有實際的用途,加上覺得你能承受的風險不大,因此宜以保本加增值為策略的重點。

首先你保持每月儲蓄$1萬,而你現時的$3萬不用投資,留作備用。

而每月而得的$1萬,其中$5000留現金,無必要都不用,另外$5000作月供股票,每月持續去供,由於每月都供,不怕一次過高位買入,就算5年後股價比現時無升跌,也會因為股價中間有波幅,而憑月供股票原理,都會有增值的,另外再加派息,每年都有一定的回報。幾年後這部分都能為你的財富帶來增值效果。

月供股票中,一半供盈富(2800),另外就選一隻收息的,如中電(0002)、港燈(2638),另外加一隻平穩增值,如港鐵(0066)、領展(0823)、金沙(1928)。已經是一個平穩的組合。

————————————————-

Q510:我看了你不少的文章,你在資產的概念上很強,我很想知道您怎麼累積資產?有故事可以分享嗎?每次長輩將他們的人生經歷分享給我,都是一堂無價的lecture。

龔成老師:《財務自由行》就係講點儲資產,同埋資產的概念、特點、運作。好多野我好難三言兩語係度講。

總之,初期資金好重要,然後就是運用工具去增值,當中不是一兩次好彩賺差價賺到錢,而係能持續增值,同時贏面高的,所以我近10年的投資成績,有半數是倍升股,就係有一套有系統的方法令財富增值。

————————————————-

Q511:龔老師你好,我是學生,由於本人股票基本功薄弱,不會估值,所以不敢擅自買賣,平時一定會等非常吸引的價格才買進,讓自己留點安全邊際,但自知實力不足,其實想到出面,又或想上你的股票班,但我又唔夠錢。

龔成老師:我相信你有能力自己賺到學費,試試推自己進步,憑自己一手一腳的努力,去賺一個15小時的完整股票知識,然後一生受用,為自己財富增值的能力大幅提升。

————————————————-

Q512:近期股市不穩應該點處理?

另外想長線持有1D股票應該搵邊D?

2318平保, 700騰信 見$153, 1299友邦 首季業績幾好, 777網龍, 1928金沙, 2020安踏, 2888渣打 發展新興市場

以上股票值得買入嗎 咩價買入才比較好?

若果只有15萬資金, 可以點分配?

龔成老師:我不理會5月不穩的理論,其他憑投資賺大錢的人不信的,其實長線投資不用考慮短期因素。

騰信(0700)、網龍(0777)都不是長線投資的對象,國為行業變化大,難以預計3、5、7年後的市場情況,今天的王者到下年可能不是,你看看過往科技行業的王者就明。

平保(2318)、友邦(1299)、金沙(1928)都有優質,可長渣,現價不算貴。

15萬不算大資金,將一部分買這類優質股先,留一半至1/3,作備用及下跌後再入。

————————————————

Q513:龔成,跌市中睇中327百富環球,無息收,但求增長,值唔值長放?

龔成老師:百富環球(0327)由高陽科技(0818)分拆上市,為一家電子支付(EFT-POS)終端機解決方案供應商,主要在中國從事開發及銷售EFT-POS產品並提供相關服務。

佢的產品及服務包括台式EFT-POS終端機、移動EFT-POS終端機、消費者操作設備、非接觸式讀卡設備及提供售後服務。

佢的客戶大致可分為收單機構(如支付交易處理商及金融機構),以及商戶服務供應商,主要客戶包括銀聯商務(UMS)、中國銀行、中國農業銀行、交通銀行等。

睇翻過往的生意,無論營業額定盈利,都有唔錯增長,加上內地這市場仍有,相信增長動力仍在,見佢市盈率唔算高,作為潛力股的投資,其實可考慮。

不過,這類終端機解決方案供應商在國內都唔少,行業變化大,將來生意存有不少的不確定性,所以要明白其中的風險,我自己較少投資這類股,若你投資,建議不要太大注。

———————————————–

Q514:想問下你點睇1766e隻股票

龔成老師:中車(1766)主要業務為鐵路機車、客車、貨車、動車組、城軌地鐵車輛及重要零部件的研發、製造、銷售、修理和租賃,以及軌道交通裝備專有技術延伸產業等業務。

其實本質唔差,生意同盈利都有增長,股本回報率都啊算低,平均有14%-16%,以鐵路相關這類資本密集的行業來說,這個回報率算很理想,有長線投資的價值。

2015年大時代由於這類股炒得太勁,所以本人一直沒有建議,但其實這股本質不差,到大時代泡沬爆破後,才開始出現投資價值,但就算大跌不少,現時的市盈率仍處14倍,只能說是合理的水平,未到平宜區域,所以就算要投資,也要分注去入。

———————————————–

Q515:成哥,如果我每月有一萬盈餘,假如我向銀行借十二萬每月還一萬,或借更多的錢用更長時間還,再用這筆錢投資,你覺得可行嗎?會否太大風險?
謝解答!

龔成老師:首先要知道借貸的息率,若果息率是2%,而投資得到的回報為10%,這便能賺到8%的息差回報。表面上借錢愈多愈好,但實際上運作前要知道風險。

第一,利息的變動,借貸利息可以上升的,第二,投資回報,有多大信心獲得10%回報,在你過往的投資記錄中,是否絕大部分年份都能獲得10%以上的回報。

另外,若預期的息率回報連8%都沒有,那就沒有足夠的安全邊際去抵嘗當中的風險,不值很做。

因此,若借貸只佔你總資產一小部分,而你又有足夠的還款能力,那適當運用其實不壞,但以你的情況,如同提前支付了一年的薪金,即是以利息換取早一年前投資的機會,由於還餘為每月盈餘,其實只是剛剛好,略有風險。因此,除非出現股災有絕佳的投資機會,否則不宜這樣做,同時金額也不建議多。

———————————————–

Q516:我想問問992 聯想,手機業競爭勁,又被大行降目標價 我差不多蝕10% 我認為10%止蝕是合理,但覺得聯想基本面唔差,跌到咁又變相想繼續持有,我發現聯想上年5~7月都係咁跌 是什麼緣故?手機業在5~7月都銷售差咩?我應該點部處??

龔成老師:唔清楚點解佢每年5-7月都跌,我長線投資好少分析呢類資訊的。若果你統計過往的數據,10年內有7年都有這情況,或許有週期性的銷售情況。

如果你最初佢中短線投資,咁定10%-15%止蝕位可以,但如果你當初係長線投資,當初從基本面出發,咁價位的變動並不是你止蝕的理由。

坊間一般用「價位」去定止蝕,但我自己會用「本質」去止蝕,如果你當初買入時,係以這企業的基本面與前景都不錯為理由去投資,那麼這刻是否止蝕,就要看這企業的基本面,比起你當初買入時,有沒有較大的轉變。

若果只是週期性不利,或行業的中短期不景,那麼股價波動10%在股票市場上,是經常發生的。

聯想(0992)近年有轉弱情況,這已有一段時間,而近半年情況有加劇,所以若中短線投資,要趁反彈沽出,但若果是長線,再觀察多3個月至半年,分析企業是本質有問題,還是週期性不景,若為前者就要走。

———————————————–

Q517:你好,我是一名大學生,之前向你反應過我想報你的股票班,但唔夠錢比的。

其實多謝你鼓勵了我呀!你叫我憑自己力量去賺錢支付學費,現在我已夠錢負擔學費,吸收課堂的價值,這也是第一次報讀股票班,對股票知識嚴重營養不良的我,可能是一次大補。堂上有notes嗎?

另外,你本新書幾時上架?尋日在書局閒逛,沒發現您的2本作品,反而買了本王迪詩的散文,她談及富二代什麼都有,所以人生沒有目標,相反那些不靠父幹的人,深明財要自掙,所以更努力地活著,反而更活得精彩。

龔成老師:《80後百萬富翁》、《80後2百萬富翁》部分書店已斷貨,不再加印了,所以若買,要同書店訂,才有機會買到。至於新書,《財務自由行》已出版,你可到書局買。

課堂有筆記的,若果你對股票認識不足,建議你上完第一堂後,一定要回家溫習,不明白的在第二堂開始時立刻問。因為第二堂開始較技巧的內容,之後會漸漸加深的,所以只要你每次都溫習,就可明白當中內容。

很高興你能憑自己的力量去支付學費,這次是你完全地為自己建立知識,我保證你獲得的知識一生受用。

———————————————–

Q518:想問下 而家算唔算一個好時機入市?

龔成老師:恆指在22000點,大約10倍市盈率水平,這可以參考一下。

中短期走勢我唔會分析,但以長期來說,過往恆指的市盈率,都處8倍至22倍鉅水平,所以以長線投資來說,當恆指低於10倍市盈率,其實已可尋找一些優質股,收貨作長線投資,雖然中短期可能會再跌,但長線回報不錯。

———————————————–

Q519:龔成您好

請問以現價黎講,渣打銀行,華潤發電中長期持有是合適策略嗎?

龔成老師:渣打(2888)本質不差的,但質素不及中銀及恆生,同時渣打的風險較大,不過近年股價大跌,市場估值已偏低,長線投資都可考慮,但不宜大注。

而華潤電力(0836)是不差的企業,雖然行業增長有限,但以穩健的角度來說是不錯的,加上有穩中求勝的效果,企業質素的程度算是中等。

華潤電力過往的派息比率約3、4成,算是中等,而過往的股息為穩定增長,對著重收息的投資者來說,此股有一定的投資價值,而投資者可從息率的角度去分析此股。

現時華潤電力的市盈率約6、7倍,並不算高,而息率約6%,均反映現價處合理水平,故此想投資的其實已值得考處,當然,有耐性的投資者可等股價再跌多一點,到息率近7%水平才投資。由於電力行業非高增長的行業,故投資此股的策略會是長期,而且投資者較著重股息,而非著眼於股價上升的。

———————————————–

Q520:龔Sir 你好,在下係學生一名,一直有追看你Facebook page,喜價值投資.想請教一下,九龍建業同路勁基建哪股長遠投資價值更高?

龔成老師:九龍建業(0034)主要從事物業發展及投資(香港╱澳門╱中國內地):業務包括發展、租賃及出售物業及投資物業主要為香港之等。

而路勁基建(1098)則較多係中國發展房地產,佢主力發展經濟型住宅專案。持有土地儲備主要位於長三角及渤海灣地區。另外亦於中國從事投資及營運收費公路。

九龍建業的生意啊差,盈利算穩定,而股息都算不錯。而路勁基建生意算穩定,但近一兩年的盈利有點不穩,見佢市盈率不高,股息都算穩定。

兩隻不錯大型的股票,回報率一般,但勝在市盈率低,股息不差,九龍建業會略好,但不要太大注。

———————————————–

多謝各位提問,若然你有問題想向本人發問,可在本人的fb專頁中(www.facebook.com/80shing)inbox我,但要注意如無特別聲明,我有可能將問答放上網的,當然,我會將發問者的身份,以及有關個人的部分刪去。

另外,由於提問人數眾多,見諒我無法即日回覆,如果是普通的提問,預我起碼要3天以上才能回覆,若然是較複雜的提問,起碼要7天才能回覆,希望各位能諒解。